ദുബായിൽ നിന്ന് ഇസ്രായേലിലെ ടെൽ അവീവിലേക്ക് പറന്ന ഫ്ലൈ ദുബായ് (FZ1073) വിമാനത്തിന്റെ കോക്ക്പിറ്റിൽ വെച്ച് ചീഫ് പൈലറ്റിനെ ആക്രമിക്കുകയും വിമാനം തകർക്കാൻ ശ്രമിക്കുകയും ചെയ്ത ഒമാൻ സ്വദേശിയായ സഹപൈലറ്റ് ഹമാം അൽ-ഹമ്മാമിക്ക് ഭീകരവാദ കുറ്റം ചുമത്തി വധശിക്ഷ ഉറപ്പാക്കാൻ യു.എ.ഇ നീക്കം തുടങ്ങുന്നു. 170-ലധികം യാത്രക്കാരുമായി പറന്ന ബോയിംഗ് വിമാനത്തിൽ വെച്ച് ക്രൂരമായ ആക്രമണം അഴിച്ചുവിട്ട 29-കാരനായ ഹമ്മാമിക്കെതിരെ വിട്ടുവീഴ്ചയില്ലാത്ത നിയമനടപടികളാണ് യു.എ.ഇ സ്വീകരിക്കുന്നത്. സംഭവത്തിൽ ഇസ്രായേൽ സുരക്ഷാ ഏജൻസികളും അന്വേഷണത്തിൽ യു.എ.ഇയെ സഹായിക്കുന്നുണ്ടെന്ന് വിദേശ മാധ്യമങ്ങൾ റിപ്പോർട്ട് ചെയ്യുന്നു.
സെപ്റ്റംബർ 30-നായിരുന്നു ലോകത്തെ ഞെട്ടിച്ച വിമാന ആക്രമണ സംഭവം നടക്കുന്നത്. വിമാനം ആകാശത്തുവെച്ച് കുത്തനെ താഴേക്ക് പതിക്കാൻ തുടങ്ങിയതോടെ കോക്ക്പിറ്റിലുണ്ടായിരുന്ന ഇന്ത്യൻ വംശജനായ പൈലറ്റ് ക്യാപ്റ്റൻ സ്മിത് മച്ചാറിനെ സഹപൈലറ്റ് അൽ-ഹമ്മാമി ആക്സ് (Crash Axe) ഉപയോഗിച്ച് ക്രൂരമായി വെട്ടിപ്പരിക്കേൽപ്പിക്കുകയായിരുന്നു. ഗുരുതരമായി പരിക്കേറ്റ് ചോരയിൽ കുളിച്ചപ്പോഴും അസാമാന്യ ധൈര്യത്തോടെ സ്മിത് മച്ചാർ കോക്ക്പിറ്റ് വാതിൽ അൺലോക്ക് ചെയ്യുകയും, തുടര്‍ന്ന് ശബ്ദം കേട്ട് ഓടിയെത്തിയ യാത്രക്കാരും ക്യാബിൻ ക്രൂവും ചേർന്ന് അക്രമിയെ കീഴടക്കുകയുമായിരുന്നു. തുടർന്ന് വിമാനം സൗദി അറേബ്യയിലെ തബൂക്കിൽ അടിയന്തിരമായി ഇറക്കി.
തനിക്ക് മരണത്തെ ഭയമില്ലെന്നും വിമാനം തകർക്കാൻ തന്നെയാണ് ആഗ്രഹിച്ചതെന്നും സൗദിയിൽ വെച്ച് നടന്ന ആദ്യഘട്ട ചോദ്യം ചെയ്യലിൽ ഹമ്മാമി സമ്മതിച്ചതായി അന്താരാഷ്ട്ര മാധ്യമങ്ങൾ വ്യക്തമാക്കുന്നു. തീവ്രവാദ ആശയങ്ങളിൽ ആകർഷിക്കപ്പെട്ട ഇയാൾ ഒമാൻ എയറിൽ ജോലി ചെയ്യുന്ന സമയത്ത് വിലക്ക് നേരിട്ടിട്ടുള്ള വ്യക്തിയാണെന്നും അന്വേഷണത്തിൽ കണ്ടെത്തിയിട്ടുണ്ട്. സൗദി കസ്റ്റഡിയിലായിരുന്ന അക്രമിയെ കൂടുതൽ ചോദ്യം ചെയ്യലിനായി പിന്നീട് യു.എ.ഇക്ക് കൈമാറുകയായിരുന്നു. സംഭവം വൻ ഭീകരാക്രമണ ശ്രമമാണെന്ന് യു.എ.ഇ പ്രോസിക്യൂഷൻ ഔദ്യോഗികമായി സ്ഥിരീകരിച്ചു കഴിഞ്ഞു.
