ആത്മനിർഭർ ഭാരതത്തിന്റെ കരുത്തിൽ ആഗോള വൻശക്തികളെപ്പോലും അമ്പരപ്പിച്ചുകൊണ്ട് പ്രതിരോധ-വ്യവസായ രംഗത്ത് സമാനതകളില്ലാത്ത കുതിപ്പുമായി ഇന്ത്യ. വിദേശ സാങ്കേതികവിദ്യകളെ മാത്രം ആശ്രയിച്ചിരുന്ന ഒരു കാലഘട്ടത്തെ പൂർണ്ണമായും തകിടം മറിച്ചുകൊണ്ട് ഇന്ത്യയുടെ ആദ്യ തദ്ദേശീയ ബുള്ളറ്റ് ട്രെയിൻ പ്രോട്ടോടൈപ്പ് ‘B28’ (Bharat Bullet) 2027-ന്റെ തുടക്കത്തിൽ ട്രാക്കിലിറങ്ങാൻ ഒരുങ്ങുന്നു. ജപ്പാന്റെ ഷിൻകാൻസെൻ (Shinkansen) സാങ്കേതികവിദ്യയ്ക്ക് ബദലായി ഭാരതത്തിലെ എൻജിനീയർമാർ സ്വന്തമായി വികസിപ്പിച്ചെടുക്കുന്ന ഈ അത്യാധുനിക അതിവേഗ ട്രെയിൻ നിർമ്മിക്കുന്നത് പൊതുമേഖലാ സ്ഥാപനമായ ബിഇഎംഎൽ (BEML) ആണ്. പ്രധാനമന്ത്രി നരേന്ദ്ര മോദിയുടെ ‘മേക് ഇൻ ഇന്ത്യ’ പദ്ധതി വെറുമൊരു മുദ്രാവാക്യമല്ല, മറിച്ച് രാജ്യത്തിന്റെ പരമാധികാരവും സാങ്കേതിക സ്വയംപര്യാപ്തതയും ഉറപ്പാക്കുന്ന ശക്തമായ ആയുധമാണെന്ന് തെളിയിക്കുന്നതാണ് ഈ പുതിയ മുന്നേറ്റം.
ബെംഗളൂരുവിലെ അത്യാധുനിക ‘ആദിത്യ’ പ്ലാന്റിലാണ് ഈ ബുള്ളറ്റ് ട്രെയിൻ പൂർണ്ണമായും തദ്ദേശീയമായി നിർമ്മിക്കുന്നത്. ആദ്യ ഘട്ടത്തിൽ ബെംഗളൂരുവിൽ വച്ച് വിവിധ സുരക്ഷാ പരിശോധനകൾ പൂർത്തിയാക്കിയ ശേഷം ട്രെയിൻ കൂടുതൽ ട്രയൽ റണ്ണുകൾക്കായി ഗുജറാത്തിലെ സൂററ്റ് ഡിപ്പോയിലേക്ക് മാറ്റും. മണിക്കൂറിൽ 280 കിലോമീറ്റർ വരെ വേഗത കൈവരിക്കാൻ ശേഷിയുള്ളതാണ് ഈ ഭാരത നിർമ്മിത ബുള്ളറ്റ് ട്രെയിൻ. തുടക്കത്തിൽ സൂററ്റ് മുതൽ വാപി വരെയുള്ള 97 കിലോമീറ്റർ നീളമുള്ള റൂട്ടിൽ 2027 ഓഗസ്റ്റിൽ ഇന്ത്യയുടെ ഈ ആദ്യ തദ്ദേശീയ ബുള്ളറ്റ് ട്രെയിൻ സർവീസ് ആരംഭിക്കാനാണ് റെയിൽവേ മന്ത്രാലയം ലക്ഷ്യമിടുന്നത്. ആദ്യകാലത്ത് ഇത്തരം വൻകിട പ്രൊജക്റ്റുകൾക്ക് വിദേശ രാജ്യങ്ങളുടെ അനുമതിക്കും സഹായത്തിനുമായി കാത്തുനിന്നിരുന്ന ഇന്ത്യ, ഇന്ന് സ്വന്തം കഴിവ് കൊണ്ട് ലോകത്തിന് മാതൃകയാവുകയാണ്.
ഈ ചരിത്രപരമായ പദ്ധതിയിലൂടെ ഇന്ത്യയുടെ സ്വന്തം എൻജിനീയർമാർക്കും സാങ്കേതിക വിദഗ്ദ്ധർക്കും അതിവേഗ റെയിൽ സാങ്കേതികവിദ്യയിൽ ലോകോത്തര വൈദഗ്ദ്ധ്യം നേരിട്ട് ലഭിക്കുകയാണ്. ലക്ഷക്കണക്കിന് തൊഴിലവസരങ്ങൾ സൃഷ്ടിക്കുന്നതിനൊപ്പം ഇന്ത്യൻ നിർമ്മാണ മേഖലയ്ക്ക് (Local Manufacturing) വൻ ഉത്തേജനമാണ് ഈ പദ്ധതി നൽകുന്നത്. വന്ദേ ഭാരത് എക്സ്പ്രസുകളിലൂടെ ഇന്ത്യൻ റെയിൽവേയുടെ മുഖച്ഛായ മാറ്റിയ മോദി സർക്കാർ, ഇപ്പോൾ ബുള്ളറ്റ് ട്രെയിൻ രംഗത്തും വിദേശ കുത്തകകൾക്ക് കനത്ത പ്രഹരമേൽപ്പിച്ച് ഭാരതത്തിന്റെ സ്വന്തം മുദ്ര പതിപ്പിക്കുകയാണ്. ലോകത്തിന് മുന്നിൽ ശിരസ്സ് നമിക്കാത്ത, സ്വന്തം കാലിൽ നിൽക്കുന്ന നവഭാരതത്തിന്റെ പ്രതീകമായി ‘B28’ റെയിൽവേ ട്രാക്കുകളിൽ ചരിത്രമെഴുതാൻ ഇനി ഏതാനും മാസങ്ങൾ മാത്രം ബാക്കി.
