ബഹിരാകാശ ഗവേഷണ രംഗത്ത് വിപ്ലവകരമായ മാറ്റത്തിനൊരുങ്ങി ഇന്ത്യൻ ബഹിരാകാശ സ്റ്റാർട്ടപ്പായ എക്സ്ഡിഎൽഐഎൻഎക്സ് (XDLINX) സ്പേസ് ലാബ്സ്. ബഹിരാകാശത്ത് വെച്ച് തന്നെ ആവശ്യാനുസരണം സോഫ്റ്റ്വെയറിലൂടെ ദൗത്യങ്ങൾ മാറ്റാൻ സാധിക്കുന്ന ‘ഷാമിലിയൻ’ (Chameleon – പച്ചക്കുതിര) ഉപഗ്രഹമാണ് കമ്പനി വികസിപ്പിക്കുന്നത്. സാധാരണയായി ഒരു പ്രത്യേക ദൗത്യത്തിനുവേണ്ടി മാത്രം ഉപഗ്രഹങ്ങൾ നിർമ്മിക്കുന്ന പരമ്പരാഗത രീതിക്ക് പകരമായാണ് ഏത് ദൗത്യത്തിനും അനുയോജ്യമായ രീതിയിൽ മാറ്റിയെടുക്കാവുന്ന ഒരു ബേസ് ഡിസൈൻ സാങ്കേതികവിദ്യ ഹൈദരാബാദ് ആസ്ഥാനമായുള്ള ഈ സ്റ്റാർട്ടപ്പ് വികസിപ്പിച്ചിരിക്കുന്നത്. ഇത്തരത്തിൽ സോഫ്റ്റ്വെയർ അധിഷ്ഠിതമായി പ്രവർത്തിക്കുന്ന ഉപഗ്രഹങ്ങൾ വഴി ഭൂമിയുടെ ചിത്രങ്ങൾ പകർത്താനും, ആശയവിനിമയങ്ങൾ കൈമാറാനും, നാവിഗേഷൻ സുഗമമാക്കാനും ഒരൊറ്റ ഉപഗ്രഹത്തിന് സാധിക്കും. ആഗോളതലത്തിലെ വൻകിട കമ്പനികൾ പരീക്ഷിക്കുന്ന ഈ അത്യാധുനിക സാങ്കേതികവിദ്യ ഇന്ത്യയിൽ ആദ്യമായാണ് ഒരു സ്വകാര്യ കമ്പനി ഇത്രയും വലിയ തോതിൽ നടപ്പിലാക്കുന്നത്.
ഈ വർഷത്തിന്റെ (2026) അവസാന പാദത്തിൽ പൂർണ്ണമായും സ്വന്തം ചിലവിൽ നിർമ്മിച്ച അത്യാധുനിക ഇമേജിംഗ് ഉപഗ്രഹം വിക്ഷേപിക്കാനാണ് കമ്പനി ലക്ഷ്യമിടുന്നത്. ഒരു ഉപഭോക്താവിനായി കാത്തുനിൽക്കാതെ, തങ്ങളുടെ സാങ്കേതികവിദ്യയുടെ കരുത്ത് തെളിയിക്കുക എന്ന ലക്ഷ്യത്തോടെയാണ് കമ്പനി സ്വന്തം ഫണ്ട് ഉപയോഗിച്ച് ഈ ദൗത്യത്തിന് മുതിരുന്നത്. ബഹിരാകാശ കോൺഗ്രസിൽ വെച്ച് മുൻ ഐഎസ്ആർഒ ശാസ്ത്രജ്ഞനും എക്സ്ഡിഎൽഐഎൻഎക്സ് ഗ്ലോബൽ സ്ട്രാറ്റജി വൈസ് പ്രസിഡന്റുമായ ഡോ. സുധീർ കുമാർ എൻ. ആണ് ഇക്കാര്യം വ്യക്തമാക്കിയത്. സാധാരണ ക്യാമറകൾ പോലെ ദൃശ്യപ്രകാശം ഉപയോഗിച്ച് ഭൂമിയുടെ അതികൃത്യതയാർന്ന ചിത്രങ്ങൾ പകർത്താൻ കഴിയുന്ന ഒപ്റ്റിക്കൽ പേലോഡാണ് ഈ ഉപഗ്രഹത്തിൽ ഉണ്ടാകുക. ദുരന്ത നിവാരണം, കാർഷിക സർവേകൾ, ഭൂപട നിർമ്മാണം എന്നിവയ്ക്ക് ഈ ചിത്രങ്ങൾ ഏറെ സഹായകരമാകും.
ഐഎസ്ആർഒയുടെ ഏറ്റവും ചെറിയ റോക്കറ്റായ എസ്എസ്എൽവി (SSLV – Small Satellite Launch Vehicle) വഴിയായിരിക്കും ഈ ഉപഗ്രഹം ഭൂമിയിൽ നിന്നും നൂറുകണക്കിന് കിലോമീറ്റർ മുകളിലുള്ള താഴ്ന്ന ഭ്രമണപഥത്തിൽ എത്തിക്കുക. വിക്ഷേപണത്തിനായുള്ള സ്ലോട്ട് ലഭിക്കുന്നതിനായി കമ്പനി ഇതിനകം അപേക്ഷ നൽകിയിട്ടുണ്ട്. കേവലം 10 മാസത്തിനുള്ളിൽ ‘ജാനസ്-1’ (Janus-1) എന്ന തങ്ങളുടെ ആദ്യ ഉപഗ്രഹം നിർമ്മിച്ച് ഐഎസ്ആർഒയുടെ എസ്എസ്എൽവി റോക്കറ്റിൽ വിജയകരമായി വിക്ഷേപിച്ച ചരിത്രം ഈ സ്റ്റാർട്ടപ്പിനുണ്ട്.
എഡ്ജ് കമ്പ്യൂട്ടിങ് (Edge Computing) സാങ്കേതികവിദ്യയാണ് ഈ പുതിയ ഉപഗ്രഹത്തിന്റെ മറ്റൊരു പ്രത്യേകത. ബഹിരാകാശത്ത് വെച്ച് തന്നെ ചിത്രങ്ങൾ തരംതിരിക്കാനും, സമുദ്രങ്ങളുടെയോ ശൂന്യമായ പ്രദേശങ്ങളുടെയോ ചിത്രങ്ങൾ ഒഴിവാക്കി കൃത്യമായ വിവരങ്ങൾ മാത്രം ഭൂമിയിലേക്ക് അയക്കാനും ഇതിന് സാധിക്കും. ഇത് ഉപഗ്രഹത്തിന്റെ ഊർജ്ജവും സമയവും ലാഭിക്കാൻ സഹായിക്കും. ഈ ദൗത്യത്തിന് പിന്നാലെ 2027-ന്റെ തുടക്കത്തിൽ പങ്കാളിത്ത കമ്പനികളുടെ പേലോഡുകൾ കൂടി ഉൾപ്പെടുത്തിയുള്ള രണ്ടാമത്തെ വിക്ഷേപണവും കമ്പനി ലക്ഷ്യമിടുന്നുണ്ട്. സ്വകാര്യ ബഹിരാകാശ മേഖലയിൽ ഇന്ത്യ കൈവരിക്കുന്ന അസാധാരണമായ വളർച്ചയുടെയും വേഗതയുടെയും തെളിവാണ് എക്സ്ഡിഎൽഐഎൻഎക്സിന്റെ ഈ പുതിയ ദൗത്യം.
