ന്യൂഡൽഹി : ഓടിക്കൊണ്ടിരിക്കുന്ന ഇ-റിക്ഷകൾ നടുറോഡിൽ വച്ച് നിർത്താൻ യുവാക്കൾ ചൈനീസ് ആപ്പ് ഉപയോഗിക്കുന്നതിന്റെ ദൃശ്യങ്ങൾ സമൂഹമാധ്യമങ്ങളിൽ വ്യാപകമായി പ്രചരിക്കുന്നു. ഈ പ്രവണത മനുഷ്യജീവന് തന്നെ വലിയ അപകടങ്ങൾക്ക് കാരണമാകുമെന്ന് ചൂണ്ടിക്കാട്ടി നിരവധി പേർ രംഗത്തെത്തിയിട്ടുണ്ട്. ‘ബാറ്റ്-ബിഎംഎസ്’ (BAT-BMS) എന്ന പേരിലുള്ള ചൈനീസ് സ്മാർട്ട്ഫോൺ ആപ്ലിക്കേഷനാണ് യുവാക്കൾ ഇതിനായി ഉപയോഗിക്കുന്നത്. ബ്ലൂടൂത്ത് വഴി ഇ-റിക്ഷകളുമായോ ഇലക്ട്രിക് സ്കൂട്ടറുകളുമായോ കണക്ട് ചെയ്ത ശേഷം വാഹനത്തിൻ്റെ ബാറ്ററി ഡിസ്ചാർജ് സ്വിച്ച് ഓഫ് ചെയ്യുന്നതാണ് ഇവരുടെ രീതി. ഇത് കാരണം വാഹനം പെട്ടെന്ന് വഴിയിൽ നിൽക്കുകയും ഡ്രൈവർമാർ പ്രതിസന്ധിയിലാകുകയും ചെയ്യുന്നു.
ചൈനയിലെ ഷെൻസെൻ ഗ്രീനർജി ടെക്നോളജി വികസിപ്പിച്ചെടുത്ത ഈ ആപ്പ് യഥാർത്ഥത്തിൽ ബാറ്ററി മാനേജ്മെന്റിനുള്ള ഒരു ടൂളാണ്. ഇന്ത്യയിലെ പല ബജറ്റ് ഇ-റിക്ഷകളിലും ഇലക്ട്രിക് സ്കൂട്ടറുകളിലും പാസ്വേഡുകളോ മറ്റ് സുരക്ഷാ സംവിധാനങ്ങളോ ഇല്ലാത്ത ചൈനീസ് ബാറ്ററി മാനേജ്മെൻ്റ് സിസ്റ്റം (BMS) ഉപയോഗിക്കുന്നതാണ് ഈ പ്രശ്നത്തിന് പ്രധാന കാരണം. ഇത്തരം സിസ്റ്റങ്ങളിൽ ഓപ്പൺ ബ്ലൂടൂത്ത് ക്രമീകരണങ്ങളുള്ളതിനാൽ വെരിഫിക്കേഷനുകൾ ഇല്ലാതെ തന്നെ സമീപത്തുള്ള ആർക്കും സ്മാർട്ട്ഫോൺ വഴി എളുപ്പത്തിൽ സിസ്റ്റത്തിലേക്ക് കണക്ട് ചെയ്യാൻ സാധിക്കും. 10-15 മീറ്റർ ചുറ്റളവിലുള്ള വാഹനങ്ങളുടെ പവർ കട്ട് ചെയ്ത് പെട്ടെന്ന് പ്രവർത്തനരഹിതമാക്കാനാണ് ഇതിലൂടെ സാധിക്കുന്നത്.
ഇൻസ്റ്റാഗ്രാം, യൂട്യൂബ്, എക്സ് (ട്വിറ്റർ) തുടങ്ങിയ പ്ലാറ്റ്ഫോമുകളിലൂടെയാണ് ഇത്തരം വീഡിയോകള് കൂടുതലായി പ്രചരിക്കുന്നത്. ഇ-റിക്ഷ ഡ്രൈവർമാർ അലക്ഷ്യമായി വാഹനം ഓടിക്കുന്നതിനോടുള്ള പ്രതികാരമെന്ന പേരിലാണ് പലരും ഈ പ്രവൃത്തിയെ ന്യായീകരിക്കുന്നത്. എന്നാൽ ഓടിക്കൊണ്ടിരിക്കുന്ന വാഹനം പെട്ടെന്ന് റോഡിന് നടുവിൽ നിൽക്കുന്നത് വലിയ അപകടങ്ങൾക്കും മരണത്തിനും വരെ കാരണമായേക്കാമെന്ന് സോഷ്യൽ മീഡിയ ഉപയോക്താക്കൾ മുന്നറിയിപ്പ് നൽകുന്നു. കൂടാതെ ഈ വാഹനങ്ങൾ മാത്രം ആശ്രയിച്ച് ജീവിക്കുന്ന ഡ്രൈവർമാരുടെ ഉപജീവനത്തെ ഇത്തരം പ്രവർത്തികൾ സാരമായി ബാധിക്കുന്നുണ്ട്. വാഹനം വീണ്ടും സ്റ്റാർട്ട് ചെയ്യുന്നതിനായി ഡ്രൈവർമാർക്ക് പലപ്പോഴും നൂറും ഇരുന്നൂറും രൂപ മറ്റുള്ളവർക്ക് നൽകേണ്ടി വരുന്നതായും റിപ്പോർട്ടുകളുണ്ട്. സുരക്ഷാ പ്രശ്നങ്ങളെ തുടർന്ന് ആപ്പിൾ ആപ്പ് സ്റ്റോറിൽ നിന്ന് ഈ ആപ്പ് നീക്കം ചെയ്തിട്ടുണ്ടെങ്കിലും ഗൂഗിൾ പ്ലേ സ്റ്റോറിൽ ഇത് ഇപ്പോഴും ലഭ്യമാണ്. ഒരു തമാശയ്ക്ക് വേണ്ടി ചെയ്യുന്ന ഇത്തരം കാര്യങ്ങൾ അതിവേഗം വലിയൊരു പൊതുജന സുരക്ഷാ പ്രശ്നമായി മാറുകയാണെന്ന് പലരും ചൂണ്ടിക്കാണിക്കുന്നു.
