വാഷിംഗ്ടൺ : ഹോർമുസ് കടലിടുക്കിലൂടെ കടന്നുപോകുന്ന ചരക്കുകപ്പലുകൾക്ക് മേൽ ചുമത്താൻ നിശ്ചയിച്ചിരുന്ന 20 ശതമാനം നികുതി അഥവാ സുരക്ഷാ ഫീസ് അമേരിക്ക പിൻവലിച്ചു. യുഎസ് പ്രസിഡന്റ് ഡൊണാൾഡ് ട്രംപ് തന്നെയാണ് തന്റെ മുൻ തീരുമാനത്തിൽ നിന്നുള്ള ഈ പെട്ടെന്നുള്ള നാടകീയമായ പിന്മാറ്റം പ്രഖ്യാപിച്ചത്. കടലിടുക്കിലൂടെയുള്ള കപ്പൽ ഗതാഗതത്തിന് നികുതി ഈടാക്കുന്നതിന് പകരം, പശ്ചിമേഷ്യൻ ഗൾഫ് രാജ്യങ്ങൾ അമേരിക്കയിൽ വൻതോതിൽ സാമ്പത്തിക നിക്ഷേപങ്ങളും വ്യാപാര കരാറുകളും നടത്തുമെന്നാണ് പുതിയ ധാരണയെന്ന് ട്രംപ് വ്യക്തമാക്കി. മിഡിൽ ഈസ്റ്റിലെ പ്രമുഖ ഭരണാധികാരികളുമായി നടത്തിയ അതീവ നിർണായകവും ഫലപ്രദവുമായ ചർച്ചകൾക്ക് ശേഷമാണ് 20 ശതമാനം വരുന്ന യുഎസ് റീഇംബേഴ്സ്മെന്റ് ഫീസിന് പകരം ഈ പുതിയ നിക്ഷേപ പദ്ധതി കൊണ്ടുവരാൻ തീരുമാനിച്ചതെന്ന് ട്രംപ് തന്റെ ട്രൂത്ത് സോഷ്യൽ പോസ്റ്റിലൂടെ അറിയിക്കുകയായിരുന്നു.
ഈ നിക്ഷേപങ്ങൾ വളരെ വലുതായിരിക്കുമെന്നും അമേരിക്കയിൽ ചരിത്രപരമായ തോതിൽ പുതിയ ഫാക്ടറികളും പ്ലാന്റുകളും ഉപകരണങ്ങളും കുന്നുകൂടാൻ ഇത് കാരണമാകുമെന്നും ദശലക്ഷക്കണക്കിന് അമേരിക്കക്കാർക്ക് ഉയർന്ന ശമ്പളമുള്ള ജോലി ലഭ്യമാക്കാൻ ഇത് സഹായിക്കുമെന്നും ട്രംപ് അവകാശപ്പെട്ടു. നികുതി ഈടാക്കാനുള്ള മുൻ തീരുമാനം നടപ്പിലാകാൻ വെറും അഞ്ച് മണിക്കൂറുകൾ മാത്രം ബാക്കിനിൽക്കെയാണ് ട്രംപ് നിലപാട് മാറ്റിയത്. ഹൊർമുസ് കടലിടുക്കിന്റെ സുരക്ഷാ ചുമതല അമേരിക്ക ഏറ്റെടുക്കുകയാണെന്നും അതിനുള്ള ചിലവിലേക്കായി 20 ശതമാനം നികുതി വേണമെന്നുമായിരുന്നു ട്രംപ് മുൻപ് പ്രഖ്യാപിച്ചിരുന്നത്. എന്നാൽ അന്താരാഷ്ട്ര നിയമങ്ങൾക്ക് വിരുദ്ധമായ ഈ നടപടിക്കെതിരെ ആഗോള കപ്പൽ ഗതാഗത മേഖലയിൽ നിന്നും ഇന്റർനാഷണൽ മാരിടൈം ഓർഗനൈസേഷനിൽ (IMO) നിന്നും കടുത്ത എതിർപ്പാണ് ഉയർന്നത്. അന്താരാഷ്ട്ര ജലപാതകളിൽ യാത്ര ചെയ്യുന്ന കപ്പലുകളിൽ നിന്ന് ഇത്തരത്തിൽ നികുതി ഈടാക്കുന്നത് നിയമവിരുദ്ധമാണെന്നും ഇത് ലോകമെമ്പാടുമുള്ള മറ്റ് കടലിടുക്കുകളിലും ഇതേ രീതിയിലുള്ള നികുതി പിരിവിന് വഴിതുറക്കുമെന്നും വിദഗ്ദ്ധർ ചൂണ്ടിക്കാട്ടിയിരുന്നു. വൻകിട കപ്പലുകൾക്ക് ഒരു യാത്രയ്ക്ക് തന്നെ 30 മില്യൺ ഡോളറിലധികം നികുതി നൽകേണ്ടി വരുമായിരുന്നു എന്നതുകൊണ്ട് തന്നെ ഇത് ആഗോള വ്യാപാര മേഖലയെയും എണ്ണവിലയെയും പ്രതികൂലമായി ബാധിക്കുമെന്ന ആശങ്ക ശക്തമായിരുന്നു. ഈ സാമ്പത്തിക പ്രതിസന്ധിയും നിയമപരമായ വെല്ലുവിളികളും ഒഴിവാക്കാനാണ് നികുതിക്ക് പകരം അമേരിക്കയിലേക്ക് ഗൾഫ് പണം നേരിട്ട് എത്തിക്കുന്ന പുതിയ തന്ത്രത്തിലേക്ക് ട്രംപ് മാറിയതെന്നാണ് വിലയിരുത്തപ്പെടുന്നത്.
നികുതി ഒഴിവാക്കിയെങ്കിലും ഇറാനെതിരെയുള്ള നാവിക ഉപരോധത്തിൽ ഒരു വിട്ടുവീഴ്ചയും ഉണ്ടാകില്ലെന്ന് ട്രംപ് ആവർത്തിച്ചു. ഹൊർമുസ് കടലിടുക്ക് ഇറാൻ ഒഴികെയുള്ള മറ്റെല്ലാ രാജ്യങ്ങളുടെയും ചരക്കുകപ്പലുകൾക്കായി തുറന്നുനൽകുമെന്നും എന്നാൽ ഇറാനിയൻ തുറമുഖങ്ങളിലേക്ക് പോകുന്നതോ അവിടെ നിന്ന് വരുന്നതോ ആയ കപ്പലുകൾക്കും ഇറാന്റെ ചരക്കുകൾ വഹിക്കുന്ന കപ്പലുകൾക്കും മേൽ പൂർണ്ണമായ യുഎസ് നാവിക ഉപരോധം തുടരുമെന്നും അദ്ദേഹം വ്യക്തമാക്കി. ഇറാന്റെ വഞ്ചനാപരവും അക്രമപരവുമായ ഭരണനേതൃത്വമാണ് അവരെ സമ്പൂർണ്ണ നാശത്തിലേക്ക് നയിക്കുന്നതെന്നും ഇറാനെ ഒരു കാരണവശാലും ആണവായുധം നിർമ്മിക്കാൻ അമേരിക്ക അനുവദിക്കില്ലെന്നും ട്രംപ് കൂട്ടിച്ചേർത്തു. ട്രംപിന്റെ പുതിയ സാമ്പത്തിക പ്രഖ്യാപനത്തോടെ ആഗോള വിപണിയിൽ എണ്ണവിലയിലുണ്ടായ വൻ കുതിപ്പ് നേരിയ തോതിൽ കുറഞ്ഞിട്ടുണ്ട്. എന്നിരുന്നാലും മേഖലയിൽ യുഎസും ഇറാനും തമ്മിലുള്ള സൈനിക ഏറ്റുമുട്ടലുകളും വ്യോമാക്രമണങ്ങളും ശക്തമായി തുടരുന്നത് മിഡിൽ ഈസ്റ്റിലെ സംഘർഷാവസ്ഥ ഇപ്പോഴും അതീവ ഗുരുതരമായി നിലനിർത്തുന്നു.
