കൊൽക്കത്ത നേതാജി സുഭാഷ് ചന്ദ്രബോസ് അന്താരാഷ്ട്ര വിമാനത്താവളത്തിന്റെ റൺവേയ്ക്ക് സമീപം പതിറ്റാണ്ടുകളായി നിലകൊള്ളുന്ന ചരിത്രപ്രസിദ്ധമായ ബൻക്ര മസ്ജിദ് (ഗൗരിപൂർ ജമാ മസ്ജിദ്) സുരക്ഷാ കാരണങ്ങളാൽ മാറ്റിസ്ഥാപിക്കാനുള്ള നീക്കങ്ങൾ സജീവമാക്കി പശ്ചിമ ബംഗാളിലെ ബിജെപി സർക്കാർ. വിമാനത്താവളം നിർമ്മിക്കുന്നതിനും മുൻപ്, അതായത് ഏകദേശം 136 വർഷങ്ങൾക്ക് മുൻപ് സ്ഥാപിതമായ ഈ പള്ളി മാറ്റുന്നത് സംബന്ധിച്ച് വർഷങ്ങളായി തർക്കങ്ങളും ചർച്ചകളും നിലനിന്നിരുന്നു. എന്നാൽ കേന്ദ്രത്തിലും ഇപ്പോൾ പശ്ചിമ ബംഗാൾ സംസ്ഥാനത്തും ബിജെപി അധികാരം കൈയാളുന്ന പശ്ചാത്തലത്തിലാണ് മുഖ്യമന്ത്രി സുവേന്ദു അധികാരിയുടെ നേതൃത്വത്തിലുള്ള സർക്കാർ പള്ളി മാറ്റുന്നതിനുള്ള നടപടികൾക്ക് വേഗത കൂട്ടിയിരിക്കുന്നത്. ഇതിന്റെ ഭാഗമായി കഴിഞ്ഞ ഒരാഴ്ചയായി സുരക്ഷാ കാരണങ്ങൾ മുൻനിർത്തി പള്ളിയിലേക്കുള്ള വിശ്വാസികളുടെ പ്രവേശനം താൽക്കാലികമായി അധികൃതർ തടഞ്ഞിരിക്കുകയാണ്.
1924-ൽ ബ്രിട്ടീഷുകാർ ഡംഡം എയറോഡ്രോം നിർമ്മിച്ച കാലം മുതൽ വിമാനത്താവള വളപ്പിൽ തന്നെയുള്ള ഈ പള്ളി വലിയ സുരക്ഷാ ഭീഷണിയാണ് ഉയർത്തുന്നതെന്ന് ബ്യൂറോ ഓഫ് സിവിൽ ഏവിയേഷൻ സെക്യൂരിറ്റി (BCAS) നിരന്തരം മുന്നറിയിപ്പ് നൽകിയിരുന്നു. വിമാനത്താവളം പോലുള്ള അതീവ സുരക്ഷാ മേഖലയിലേക്ക് മതിയായ ബയോമെട്രിക് പരിശോധനകളോ പശ്ചാത്തല പരിശോധനകളോ ഇല്ലാതെ കേവലം തിരിച്ചറിയൽ രേഖകൾ മാത്രം കാണിച്ച് ആളുകളെ പ്രവേശിപ്പിക്കുന്നത് ഗുരുതരമായ സുരക്ഷാ വീഴ്ചയാണെന്ന് സുരക്ഷാ ഏജൻസികൾ ചൂണ്ടിക്കാണിക്കുന്നു. സാധാരണ ദിവസങ്ങളിൽ സിഐഎസ്എഫ് (CISF) കവാടത്തിൽ നടത്തുന്ന പ്രാഥമിക പരിശോധനകൾക്ക് ശേഷം പ്രത്യേക ബസുകളിലാണ് അമ്പതോളം വിശ്വാസികളെ പള്ളിയിലേക്ക് കൊണ്ടുപോകാറുള്ളത്. എന്നാൽ വെള്ളിയാഴ്ചകളിലെ ജുമുഅ നമസ്കാരത്തിന് ഇത് എൺപതിലധികം ആളുകളായി ഉയരാറുണ്ട്. ഇത് വിമാനത്താവളത്തിന്റെ സുരക്ഷയെ ബാധിക്കുമെന്നാണ് വിലയിരുത്തൽ.
സുരക്ഷാ പ്രശ്നങ്ങൾക്ക് പുറമെ വിമാനത്താവളത്തിന്റെ രണ്ടാമത്തെ റൺവേയുടെ വികസനത്തിനും ഈ പള്ളിയുടെ സ്ഥാനം വലിയ തടസ്സമാണ് സൃഷ്ടിക്കുന്നത്. വ്യോമയാന നിയമപ്രകാരം റൺവേയിൽ നിന്നും ഏതൊരു നിർമ്മിതിക്കും കുറഞ്ഞത് 240 മീറ്റർ അകലം ഉണ്ടായിരിക്കണം. എന്നാൽ നിലവിൽ ഈ പള്ളി സ്ഥിതി ചെയ്യുന്നത് സെക്കൻഡറി റൺവേയുടെ വടക്കുഭാഗത്തുനിന്ന് വെറും 165 മീറ്റർ മാത്രം ദൂരത്തിലാണ്. ഇത് വിമാനങ്ങളുടെ സുരക്ഷിതമായ ലാൻഡിംഗിനും ടേക്ക് ഓഫിനും വലിയ വെല്ലുവിളിയാണ്. വിമാനത്താവളത്തിന്റെ സുരക്ഷയും ആധുനികവൽക്കരണവും മുൻനിർത്തി സർക്കാർ നടത്തുന്ന ഈ പുതിയ നീക്കം സോഷ്യൽ മീഡിയയിലും രാഷ്ട്രീയ വൃത്തങ്ങളിലും വലിയ ചർച്ചകൾക്കാണ് വഴിതുറന്നിരിക്കുന്നത്.
