ന്യൂഡൽഹി : ഡൽഹി ജന്തർ മന്തറിൽ കോക്രോച്ച് ജനതാ പാർട്ടി (സിജെപി) നടത്തുന്ന സമരത്തിനിടെ നടന്ന അക്രമ സംഭവങ്ങളിൽ നേരിട്ട് പങ്കാളികളായവരുടെ പാസ്പോർട്ടുകൾ റദ്ദാക്കാനൊരുങ്ങി ഡൽഹി പോലീസ്. പ്രതിഷേധം വൻതോതിൽ അക്രമാസക്തമാകുകയും പോലീസുകാർക്ക് നേരെ ആക്രമണങ്ങൾ ഉണ്ടാകുകയും ചെയ്ത പശ്ചാത്തലത്തിലാണ് കുറ്റക്കാർക്കെതിരെ ഏറ്റവും കടുത്ത നടപടികളിലേക്ക് കടക്കാൻ പോലീസ് നീക്കം ആരംഭിച്ചത്. ജന്തർ മന്തറിന് സമീപം ഡ്യൂട്ടിക്കായി എത്തിയ ഇൻസ്പെക്ടറെ പ്രക്ഷോഭകർ ലാത്തികളും കല്ലുകളും മൂർച്ചയേറിയ ആയുധങ്ങളും ഉപയോഗിച്ച് ക്രൂരമായി ആക്രമിച്ചിരുന്നു. യൂണിഫോമിലായിരുന്ന താൻ കഷ്ടിച്ചാണ് രക്ഷപ്പെട്ടതെന്ന് പരിക്കേറ്റ ഉദ്യോഗസ്ഥൻ വ്യക്തമാക്കി. പോലീസുകാരെ ആക്രമിച്ചവരെയും പൊതുമുതൽ നശിപ്പിച്ചവരെയും തിരിച്ചറിഞ്ഞു വരികയാണെന്നും ഇവർക്കെതിരെ കർശനമായ ക്രിമിനൽ നടപടികൾക്ക് പുറമെ പാസ്പോർട്ട് റദ്ദാക്കൽ ഉൾപ്പെടെയുള്ള കടുത്ത തീരുമാനങ്ങൾ ഉണ്ടാകുമെന്നും ഡൽഹി പോലീസ് വൃത്തങ്ങൾ മുന്നറിയിപ്പ് നൽകി.
പ്രക്ഷോഭവുമായി ബന്ധപ്പെട്ടുണ്ടായ അക്രമങ്ങളിൽ ഡൽഹി പോലീസ് ഇതുവരെ പത്തോളം എഫ്ഐആറുകൾ രജിസ്റ്റർ ചെയ്തിട്ടുണ്ട്. അക്രമത്തിൽ പങ്കെടുത്തവരെയും കൃത്യമായ ഗൂഢാലോചനയ്ക്ക് പിന്നിൽ പ്രവർത്തിച്ചവരെയും തിരിച്ചറിയാൻ ഇരുന്നൂറിലധികം വീഡിയോ ദൃശ്യങ്ങളാണ് പോലീസ് നിലവിൽ പരിശോധിക്കുന്നത്. മറുഭാഗത്ത്, സമാധാനപരമായ പ്രതിഷേധത്തെ അടിച്ചമർത്താനാണ് പോലീസ് ശ്രമിക്കുന്നതെന്ന് സിജെപി നേതാക്കൾ ആരോപിക്കുമ്പോഴും, ക്രമസമാധാനം തകർക്കാൻ ശ്രമിക്കുന്നവർക്കെതിരെ വിട്ടുവീഴ്ചയില്ലാത്ത നടപടികളുമായി മുന്നോട്ടുപോകാനാണ് പോലീസിന്റെ തീരുമാനം.
ബുധനാഴ്ച വൈകുന്നേരം ജന്തർ മന്തറിന് സമീപം നടന്ന കല്ലേറിൽ അസിസ്റ്റന്റ് പോലീസ് കമ്മീഷണർ (എസിപി) വിവേക് ഭഗതിന് തലയ്ക്ക് പരിക്കേൽക്കുകയും നിരവധി പരിക്കുകൾ പറ്റുകയും ചെയ്തിരുന്നു. കൊണാട്ട് പ്ലേസ് ഡിവിഷനിൽ നിയമിതനായ ഭഗതിനെ സംഭവത്തെത്തുടർന്ന് ആർഎംഎൽ ആശുപത്രിയിലെ അത്യാഹിത വിഭാഗത്തിലേക്ക് മാറ്റി. അദ്ദേഹത്തിന്റെ മുകൾ ഭാഗത്തും താഴെ ഭാഗത്തും കൈകാലുകളിലും തോളിലും ഒന്നിലധികം ചതവുകൾ ഡോക്ടർമാർ കണ്ടെത്തി, കൂടാതെ തലയുടെ പിൻഭാഗത്തുള്ള പാരീറ്റോ-ആൻസിപിറ്റൽ മേഖലയിൽ വീക്കവും ഉണ്ടായിരുന്നു. ചെവിയിൽ നിന്ന് രക്തസ്രാവവും ഛർദ്ദിയും ഉണ്ടായതായി ഓഫീസർ റിപ്പോർട്ട് ചെയ്തു. ഭഗത്തിനെ സർജറി വിഭാഗം പരിശോധിക്കുകയും ആവശ്യമായ വൈദ്യചികിത്സ നൽകുകയും ചെയ്തതായി ആശുപത്രി അധികൃതർ അറിയിച്ചു.
