തൃശ്ശൂർ : തൃശ്ശൂർ പുത്തൂരിലെ സുവോളജിക്കൽ പാർക്കിൽ പരിചരണത്തിലായിരുന്ന ‘നന്ദു’ എന്ന പതിനാലുകാരനായ ആൺകടുവയ്ക്ക് ദയാവധം നൽകി. വായിൽ ബാധിച്ച ക്യാൻസർ രോഗം അതീവ ഗുരുതരമായതിനെ തുടർന്ന് സഹിക്കാനാവാത്ത വേദന അനുഭവിച്ച കടുവയെ ചീഫ് വൈൽഡ് ലൈഫ് വാർഡന്റെ ഉത്തരവ് പ്രകാരമാണ് വേദനയില്ലാത്ത മരണത്തിലേക്ക് നയിച്ചത്. വർഷങ്ങൾക്ക് മുൻപ് വയനാടൻ വനമേഖലയിൽ നിന്ന് പരിക്കുകളോടെ വനംവകുപ്പ് രക്ഷപ്പെടുത്തി തൃശ്ശൂരിലേക്ക് എത്തിച്ചതായിരുന്നു നന്ദുവിനെ.
കുറച്ചു കാലം മുൻപാണ് നന്ദുവിന്റെ വായയ്ക്കുള്ളിൽ ക്യാൻസറിന്റെ ലക്ഷണങ്ങൾ കണ്ടെത്തുന്നത്. തുടർന്ന് വിദഗ്ദ്ധ വെറ്ററിനറി ഡോക്ടർമാരുടെ നേതൃത്വത്തിൽ പ്രത്യേക ചികിത്സ നൽകി വരികയായിരുന്നു. എന്നാൽ അടുത്ത ദിവസങ്ങളിൽ രോഗം മൂർച്ഛിച്ച് വ്രണങ്ങൾ പടരുകയും വായ അടയ്ക്കാൻ പോലും കഴിയാത്ത അവസ്ഥയിലാകുകയും ചെയ്തു. കീമോതെറാപ്പി നൽകാനുള്ള സാധ്യതകൾ പരിശോധിച്ചെങ്കിലും ആരോഗ്യസ്ഥിതി മോശമായതിനാൽ അത് സാധ്യമായിരുന്നില്ല. പോഷകാഹാരവും വെള്ളവും ഉള്ളിൽ ചെല്ലാതെ ആരോഗ്യനില തീർത്തും വഷളായതോടെ കടുവ അതികഠിനമായ ശാരീരിക വേദന അനുഭവിക്കുകയായിരുന്നു.
രോഗം ഭേദമാകാനോ ആരോഗ്യനില മെച്ചപ്പെടാനോ യാതൊരുവിധ സാധ്യതയുമില്ലെന്ന് വിദഗ്ദ്ധ ഡോക്ടർമാർ സമഗ്ര പരിശോധനകൾക്ക് ശേഷം വ്യക്തമാക്കുകയായിരുന്നു. കടുവയുടെ തീവ്രമായ വേദന ഒഴിവാക്കുന്നതിനായി നാഷണൽ ടൈഗർ കൺസർവേഷൻ അതോറിറ്റിയുടെ കർശന മാർഗ്ഗനിർദ്ദേശങ്ങൾ പാലിച്ചാണ് ദയാവധം നടപ്പാക്കിയത്. തുടർന്ന് മണ്ണുത്തി വെറ്ററിനറി സർവകലാശാലയിൽ പോസ്റ്റ്മോർട്ടം നടപടികൾ പൂർത്തിയാക്കി. പോസ്റ്റ്മോർട്ടത്തിന് ശേഷം ഔദ്യോഗിക പ്രോട്ടോക്കോൾ പൂർണ്ണമായി പാലിച്ച് തൃശ്ശൂർ സുവോളജിക്കൽ പാർക്ക് വളപ്പിൽ തന്നെ മൃതദേഹം സംസ്കരിച്ചു.
