ഗ്ലാസ്ഗോയിൽ നടക്കുന്ന 2026-ലെ കോമൺവെൽത്ത് ഗെയിംസിന്റെ നാലാം ദിനത്തിൽ വനിതകളുടെ 48 കിലോഗ്രാം വെയിറ്റ്ലിഫ്റ്റിംഗിൽ പുതിയ ഗെയിംസ് റെക്കോർഡോടെ തകർപ്പൻ വിജയം നേടി ഇന്ത്യയുടെ മിന്നും താരം മീരാഭായ് ചാനു. സ്നാച്ച് വിഭാഗത്തിൽ 85 കിലോഗ്രാം ഉയർത്തി സ്വന്തം പേരിലുള്ള കോമൺവെൽത്ത് ഗെയിംസ് റെക്കോർഡ് തകർത്താണ് ഒളിമ്പിക് വെള്ളി മെഡൽ ജേതാവായ മീരാഭായ് ചാനു ഗ്ലാസ്ഗോയിൽ ഇന്ത്യയുടെ ആദ്യ സ്വർണ്ണ മെഡൽ സ്വന്തമാക്കിയത്. മത്സരത്തിൽ എതിരാളികളെ ബഹുദൂരം പിന്നിലാക്കിയ താരം, ക്ലീൻ ആൻഡ് ജെർക്ക് വിഭാഗത്തിൽ തന്റെ ആദ്യ ശ്രമത്തിൽ തന്നെ 105 കിലോഗ്രാം വിജയകരമായി ഉയർത്തിയാണ് സ്വർണ്ണം ഉറപ്പിച്ചത്.
ഈ വിജയത്തോടെ കോമൺവെൽത്ത് ഗെയിംസ് ചരിത്രത്തിൽ തുടർച്ചയായ മൂന്നാം സ്വർണ്ണമെന്ന അപൂർവ്വ നേട്ടമാണ് മീരാഭായ് ചാനു തന്റെ പേരിൽ കുറിച്ചത്. 2018-ലെ ഗോൾഡ് കോസ്റ്റ് ഗെയിംസിലും 2022-ലെ ബർമിംഗ്ഹാം ഗെയിംസിലും സ്വർണ്ണം നേടിയ മീരാഭായ്, 2014-ൽ ഇതേ ഗ്ലാസ്ഗോയിൽ വെച്ച് നടന്ന കോമൺവെൽത്ത് അരങ്ങേറ്റത്തിൽ വെള്ളി മെഡലും കരസ്ഥമാക്കിയിരുന്നു. നാല് കോമൺവെൽത്ത് ഗെയിംസുകളിൽ നിന്നായി മൂന്ന് സ്വർണ്ണവും ഒരു വെള്ളിയും നേടി ടൂർണമെന്റിന്റെ ചരിത്രത്തിലെ ഏറ്റവും മികച്ച ഇന്ത്യൻ താരങ്ങളിലൊരാളായി മാറാൻ 31-കാരിയായ ഈ മണിപ്പൂരി താരത്തിന് സാധിച്ചു.
തുടക്കത്തിലെ തിരിച്ചടികൾക്ക് ശേഷം ഗെയിംസിൽ ഭാരോദ്വഹനത്തിലൂടെ ഇന്ത്യ വൻ തിരിച്ചു വരവാണ് നടത്തുന്നത്. പുരുഷന്മാരുടെ 60 കിലോഗ്രാം വിഭാഗത്തിൽ ഋഷികാന്ത സിംഗ് ചാനാംബം വെള്ളി മെഡൽ നേടിയതിന് പിന്നാലെയാണ് മീരാഭായിയിലൂടെ ഇന്ത്യ ഈ ടൂർണമെന്റിലെ ആദ്യ സ്വർണ്ണപ്പതക്കത്തിൽ മുത്തമിട്ടത്. രാജ്യത്തിന്റെ അഭിമാനം വാനോളമുയർത്തിയ മീരാഭായ് ചാനുവിനെ പ്രധാനമന്ത്രി നരേന്ദ്ര മോദിയും കേന്ദ്ര കായിക മന്ത്രാലയവും അഭിനന്ദനങ്ങൾ അറിയിച്ചു. അനായാസമായ ഈ തകർപ്പൻ ജയത്തോടെ വരാനിരിക്കുന്ന അന്താരാഷ്ട്ര ടൂർണമെന്റുകളിലും ഇന്ത്യയുടെ മെഡൽ പ്രതീക്ഷകൾക്ക് പുതിയ ഊർജ്ജം പകർന്നിരിക്കുകയാണ് മീരാഭായ് ചാനു.
