ന്യൂഡൽഹി : ബംഗ്ലാദേശ് പ്രധാനമന്ത്രിയായി ചുമതലയേറ്റ ശേഷം താരിഖ് റഹ്മാൻ നടത്തുന്ന ആദ്യ ഔദ്യോഗിക ഇന്ത്യ സന്ദർശനം ഓഗസ്റ്റ് മൂന്നാം വാരത്തോടെ ഉണ്ടാകുമെന്ന് റിപ്പോർട്ടുകൾ. ഓഗസ്റ്റ് 20 നും 25 നും ഇടയിലുള്ള തീയതികളിലാണ് ഇരു രാജ്യങ്ങളുടെയും നയതന്ത്ര പ്രതിനിധികൾ ചർച്ചകൾ നടത്തി വരുന്നത്. ധാക്കയിലെ ഇന്ത്യൻ ഹൈക്കമ്മീഷണർ ദിനേശ് ത്രിവേദി ന്യൂഡൽഹിയിലെത്തി പ്രധാനമന്ത്രി നരേന്ദ്ര മോദിയുമായി നടത്തിയ നിർണ്ണായക കൂടിക്കാഴ്ചയ്ക്ക് പിന്നാലെയാണ് സന്ദർശന തീയതികൾ സംബന്ധിച്ച പ്രാഥമിക ധാരണയായത്. 2024-ൽ ശൈഖ് ഹസീന സർക്കാർ പുറത്തായതിനെത്തുടർന്ന് ഇരു രാജ്യങ്ങളും തമ്മിൽ നിലനിന്നിരുന്ന നയതന്ത്ര തണുപ്പൻ മനോഭാവത്തിന് വിരാമമിട്ട് ഉഭയകക്ഷി ബന്ധം സാധാരണ നിലയിലാക്കാൻ ഈ സന്ദർശനം സഹായിക്കുമെന്നാണ് ഇരുപക്ഷത്തിന്റെയും പ്രതീക്ഷ.
ഡൽഹിക്കും ധാക്കയ്ക്കും ഒരുപോലെ തന്ത്രപ്രധാനമായ ഈ സന്ദർശനത്തിൽ ഇരുരാജ്യങ്ങളും തമ്മിലുള്ള അത്യന്തം സങ്കീർണ്ണമായ നിരവധി വിഷയങ്ങൾ ചർച്ചയായേക്കും. ഇന്ത്യയിൽ അഭയം തേടിയിരിക്കുന്ന മുൻ പ്രധാനമന്ത്രി ശൈഖ് ഹസീനയെ വിട്ടുനൽകണമെന്ന ബംഗ്ലാദേശിന്റെ ആവശ്യം ശക്തമായി നിലനിൽക്കുമ്പോൾ തന്നെയാണ് ഈ കൂടിക്കാഴ്ച നടക്കുന്നത്. കൂടാതെ, മുൻപ് നിർത്തിവെച്ച വിസ സേവനങ്ങൾ പുനരാരംഭിക്കൽ, ഇരുരാജ്യങ്ങളും തമ്മിലുള്ള നദീജല പങ്കിടൽ കരാറുകൾ, ഊർജ്ജ-വ്യാപാര ബന്ധങ്ങൾ ശക്തിപ്പെടുത്തൽ തുടങ്ങിയവ ചർച്ചകളിൽ പ്രധാന വിഷയങ്ങളാകും. അതിർത്തി സുരക്ഷ ഉറപ്പാക്കുന്നതിനൊപ്പം ബംഗ്ലാദേശ് മണ്ണ് ഇന്ത്യ വിരുദ്ധ പ്രവർത്തനങ്ങൾക്ക് ഉപയോഗിക്കാൻ അനുവദിക്കില്ലെന്ന ഉറപ്പ് നേടാനും ന്യൂഡൽഹി ലക്ഷ്യമിടുന്നു.
ദക്ഷിണേഷ്യയിലെ മാറിയ ഭരണകൂട സാഹചര്യത്തിൽ ഇന്ത്യയുടെ നയതന്ത്ര സമീപനത്തിന്റെ കൂടി പരീക്ഷണമാണ് ഈ സന്ദർശനം. വർഷങ്ങളായി ശൈഖ് ഹസീനയുടെ അവാമി ലീഗുമായി മാത്രം അടുത്ത ബന്ധം പുലർത്തിയിരുന്ന ഇന്ത്യയ്ക്ക് ബി.എൻ.പി (ബംഗ്ലാദേശ് നാഷണലിസ്റ്റ് പാർട്ടി) നേതാവായ താരിഖ് റഹ്മാനുമായുള്ള ബന്ധം പുതുക്കിയെടുക്കുക എന്നത് ഏറെ നിർണ്ണായകമാണ്. ചൈനയുടെ പ്രാദേശിക സ്വാധീനം വർദ്ധിച്ചുവരുന്ന പശ്ചാത്തലത്തിൽ, അയൽരാജ്യമായ ബംഗ്ലാദേശുമായി വിശ്വസനീയമായ ഒരു സാമ്പത്തിക-സുരക്ഷാ പങ്കാളിത്തം കെട്ടിപ്പടുക്കുന്നത് ദക്ഷിണേഷ്യയിൽ ഇന്ത്യയുടെ തന്ത്രപ്രധാനമായ സ്ഥാനം ഭദ്രമാക്കാൻ അത്യന്താപേക്ഷിതമാണ്.
