ക്രിക്കറ്റ് മൈതാനത്തും പുറത്തും എപ്പോഴും വ്യത്യസ്തമായ ശൈലി കൊണ്ട് ശ്രദ്ധ നേടുന്ന ഇന്ത്യൻ വിക്കറ്റ് കീപ്പർ ബാറ്റർ റിഷഭ് പന്തും മുൻ ഇന്ത്യൻ നായകൻ എം.എസ്. ധോണിയും ഒന്നിച്ചുള്ള പുതിയ വീഡിയോ സമൂഹമാധ്യമങ്ങളിൽ തരംഗമാകുന്നു. ഇരുവരും ഒത്തുചേർന്ന ഒരു സൗഹൃദ പാർട്ടിയുടെ ദൃശ്യങ്ങളാണ് ഇപ്പോൾ ഇന്റർനെറ്റിൽ വലിയ തോതിൽ പ്രചരിക്കുന്നത്.
ഒരു ഹോട്ടൽ മുറിയെന്ന് തോന്നിക്കുന്ന സ്ഥലത്ത് സുഹൃത്തുക്കൾക്കൊപ്പം പന്ത് സോഫയിലിരുന്ന് സംസാരിക്കുന്നതും ധോണി പശ്ചാത്തലത്തിൽ നിൽക്കുന്നതുമാണ് വീഡിയോയിലുള്ളത്. തുടർന്ന് സംഘത്തോടൊപ്പം നിന്ന് ഫോട്ടോയെടുക്കാൻ ധോണി പന്തിന് എന്തോ കൈമാറുന്നതും ദൃശ്യങ്ങളിൽ കാണാം.
ഫോട്ടോയെടുക്കാനായി എല്ലാവരെയും ഒരുമിച്ച് കൂട്ടുന്നതിനിടയിൽ, മുതിർന്ന ഒരാളോട് “ഞാൻ ഇപ്പോൾ ഒരു ഹുക്ക വലിച്ചിട്ട് വരാം” എന്ന് ധോണി ഹിന്ദിയിൽ പറയുന്നത് ദൃശ്യങ്ങളിൽ വ്യക്തമല്ലെങ്കിലും കേൾക്കാമെന്നാണ് സമൂഹമാധ്യമങ്ങളിലെ സംസാരം. ധോണിയുടെ ഈ പരാമർശമാണ് ആരാധകർക്കിടയിൽ ഇപ്പോൾ വലിയ ചർച്ചയ്ക്ക് വഴിവെച്ചിരിക്കുന്നത്.
മുൻപും സഹതാരങ്ങൾ പലരും അഭിമുഖങ്ങളിൽ ധോണിയുടെ ഹുക്കയോടുള്ള താല്പര്യത്തെക്കുറിച്ച് പരാമർശിച്ചിട്ടുണ്ടെങ്കിലും, പുതിയ വീഡിയോ പുറത്തുവന്നതോടെ ക്രിക്കറ്റ് പ്രേമികൾക്കിടയിൽ ഇത് വീണ്ടും വലിയ കൗതുകമായി മാറിയിരിക്കുകയാണ്. അതേസമയം, വീഡിയോ എപ്പോൾ എവിടെവെച്ച് ചിത്രീകരിച്ചതാണെന്ന കാര്യത്തിൽ ഔദ്യോഗികമായ സ്ഥിരീകരണങ്ങൾ ഒന്നും തന്നെ പുറത്തുവന്നിട്ടില്ല.
