രാജ്യത്തെ ഏറ്റവും തിരക്കേറിയ ഏഴ് ഹൈ-ഡെൻസിറ്റി റെയിൽവേ കോറിഡോറുകളിൽ ട്രാക്കുകളുടെ എണ്ണം നാലായി ഉയർത്തുന്ന നാലുവരി പാത വികസന പദ്ധതിക്ക് പ്രധാനമന്ത്രി നരേന്ദ്ര മോദിയുടെ അധ്യക്ഷതയിൽ ചേർന്ന കേന്ദ്ര മന്ത്രിസഭ അംഗീകാരം നൽകി. ഡൽഹി-മുംബൈ, മുംബൈ-ചെന്നൈ, ചെന്നൈ-കൊൽക്കത്ത, കൊൽക്കത്ത-ഡൽഹി എന്നീ സ്വർണ്ണ ചതുർഭുജ പാതകളും ഡൽഹി-ചെന്നൈ, മുംബൈ-കൊൽക്കത്ത, ഡൽഹി-ഗുവാഹത്തി എന്നീ പ്രധാന പാതകളുമാണ് ഈ പദ്ധതിയിൽ ഉൾപ്പെടുന്നത്. റെയിൽവേയുടെ മൊത്തം ഗതാഗതത്തിന്റെ 40 ശതമാനത്തോളം കൈകാര്യം ചെയ്യുന്ന ഈ റൂട്ടുകളുടെ ശേഷി വർദ്ധിപ്പിക്കുന്നത് ട്രെയിൻ സർവീസുകളുടെ വേഗതയും കാര്യക്ഷമതയും വർദ്ധിപ്പിക്കാൻ സഹായിക്കുമെന്ന് കേന്ദ്ര റെയിൽവേ മന്ത്രി അശ്വിനി വൈഷ്ണവ് അറിയിച്ചു.
മൈനിംഗ്, വ്യവസായ മേഖലകളെ ബന്ധിപ്പിക്കുന്ന ഖരഗ്പൂർ-ജാർസുഗുഡ, കട്നി-പേന്ദ്ര റോഡ്, ബിലാസ്പൂർ-പേന്ദ്ര റോഡ് എന്നീ മൂന്ന് മൾട്ടി-ട്രാക്കിംഗ് പദ്ധതികൾക്കായി 10,700 കോടിയിലധികം രൂപ ചെലവഴിക്കും. ഈ പദ്ധതികൾ പൂർത്തിയാകുന്നതോടെ കൽക്കരി, ഇരുമ്പയിര് തുടങ്ങി വിവിധ ചരക്കുകളുടെ നീക്കം കൂടുതൽ വേഗത്തിലാകുകയും യാത്രാ ട്രെയിനുകളുടെ സമയബന്ധിതമായ സർവീസ് ഉറപ്പാക്കാൻ സാധിക്കുകയും ചെയ്യും. നിലവിൽ നാലുവരി പാതയുടെ ഭാഗമായി 2000 കിലോമീറ്ററോളം ട്രാക്ക് നിർമ്മാണം പൂർത്തിയായിട്ടുണ്ടെന്നും ബാക്കി 4000 കിലോമീറ്റർ നീളമുള്ള ഭാഗത്തിന്റെ വിശദമായ പദ്ധതി റിപ്പോർട്ട് തയ്യാറാക്കിക്കൊണ്ടിരിക്കുകയാണെന്നും മന്ത്രി വ്യക്തമാക്കി.
പുതിയ ട്രാക്കുകൾ വരുന്നതോടെ ചരക്ക് ട്രെയിനുകളും യാത്രാ ട്രെയിനുകളും വ്യത്യസ്ത പാതകളിലൂടെ ഓടിക്കാൻ സാധിക്കുമെന്നത് പാളം തെറ്റലും ഗതാഗതക്കുരുക്കും ഒഴിവാക്കാൻ സഹായിക്കും. പ്രധാന നഗരങ്ങൾ തമ്മിലുള്ള യാത്രാ സമയം കുറയ്ക്കുന്നതിനും വന്ദേ ഭാരത് പോലുള്ള അതിവേഗ ട്രെയിനുകൾ കൂടുതൽ എണ്ണത്തിൽ സർവീസ് നടത്തുന്നതിനും ഇത് വഴിമരുന്ന് ഇടും. റെയിൽവേയുടെ വലിയ അടിസ്ഥാന സൗകര്യ വികസനത്തിന് തുടക്കം കുറിക്കുന്ന ഈ നടപടി വരും വർഷങ്ങളിൽ ഇന്ത്യൻ റെയിൽവേയുടെ മുഖച്ഛായ തന്നെ മാറ്റുമെന്നാണ് കണക്കാക്കുന്നത്.
