ന്യൂഡൽഹിയിലെ ഭാരത് മണ്ഡപത്തിൽ നടന്ന ബ്രിക്‌സ് ഉച്ചകോടിയ്ക്കിടെ പ്രധാനമന്ത്രി നരേന്ദ്ര മോദി, റഷ്യൻ പ്രസിഡന്റ് വ്ലാദിമിർ പുടിൻ, ചൈനീസ് പ്രസിഡന്റ് ഷി ജിൻപിങ് എന്നിവർക്കൊപ്പം പുഞ്ചിരിയോടെ നിൽക്കുന്ന ചെറുപ്പക്കാരനായ ഇന്ത്യൻ ഉദ്യോഗസ്ഥൻ സോഷ്യൽ മീഡിയയിലും അന്താരാഷ്ട്ര തലത്തിലും വലിയ ചർച്ചയായി മാറി. ലോക നേതാക്കളുടെ അപൂർവ്വ ചിത്രത്തിൽ പ്രത്യക്ഷപ്പെട്ട ഈ ഉദ്യോഗസ്ഥൻ കേരളത്തിലെ കൊച്ചി സ്വദേശിയും 2017 ബാച്ച് ഐഎഫ്എസ് (ഇന്ത്യൻ ഫോറിൻ സർവീസ്) ഉദ്യോഗസ്ഥനുമായ സിദ്ധാർത്ഥ് ബാബുവാണെന്ന് സ്ഥിരീകരിച്ചു. പ്രധാനമന്ത്രിയുടെ ഔദ്യോഗിക ഭാഷാ പരിഭാഷകനായി (ഡിപ്ലോമാറ്റിക് ഇന്റർപ്രെറ്റർ) സേവനമനുഷ്ഠിക്കുന്ന അദ്ദേഹം നിലവിൽ വിദേശകാര്യ മന്ത്രാലയത്തിൽ ഡെപ്യൂട്ടി സെക്രട്ടറിയായി ചുമതല വഹിക്കുകയാണ്.
മെക്കാനിക്കൽ എഞ്ചിനീയറിംഗ് ബിരുദധാരിയായ സിദ്ധാർത്ഥ് ബാബു സ്വകാര്യ മേഖലയിലെ കോർപ്പറേറ്റ് ജോലി ഉപേക്ഷിച്ചാണ് സിവിൽ സർവീസ് രംഗത്തേക്ക് കടന്നുവന്നത്. 2016-ലെ യുപിഎസ്സി പരീക്ഷയിൽ 15-ാം റാങ്ക് നേടി മികച്ച വിജയം കൈവരിച്ച അദ്ദേഹം ഐഎഎസ് ലഭിക്കാനുള്ള അവസരമുണ്ടായിട്ടും അന്താരാഷ്ട്ര ബന്ധങ്ങളോടുള്ള താല്പര്യം കാരണം ഐഎഫ്എസ് തിരഞ്ഞെടുക്കുകയായിരുന്നു. 2018 മുതൽ 2022 വരെ ബീജിംഗിലെ ഇന്ത്യൻ എംബസിയിൽ നയതന്ത്ര ഉദ്യോഗസ്ഥനായി സേവനം അനുഷ്ഠിച്ച അദ്ദേഹം ചൈനീസ് ഭാഷയിൽ വലിയ പ്രവീണ്യം നേടിയിട്ടുണ്ട്. പിന്നീട് അമേരിക്കയിൽ ഉപരിപഠനവും സേവനവും പൂർത്തിയാക്കിയ ശേഷമാണ് വിദേശകാര്യ മന്ത്രാലയത്തിൽ നിർണായക ചുമതലകളിലേക്ക് തിരിച്ചെത്തിയത്.
ആഗോള രാഷ്ട്രീയത്തിലെ പ്രമുഖ നേതാക്കൾ തമ്മിലുള്ള അതീവ രഹസ്യവും തന്ത്രപ്രധാനവുമായ ചർച്ചകളിൽ വാക്കുകളുടെ കൃത്യതയും നയതന്ത്ര ശൈലിയും ചോർന്നുപോകാതെ ആശയവിനിമയം ഉറപ്പാക്കുക എന്നതാണ് സിദ്ധാർത്ഥിന്റെ പ്രധാന ചുമതല. ഇതിനു മുൻപും റിപ്പബ്ലിക് ദിനാഘോഷങ്ങൾ ഉൾപ്പെടെയുള്ള പ്രമുഖ അന്താരാഷ്ട്ര ചടങ്ങുകളിൽ പ്രധാനമന്ത്രി നരേന്ദ്ര മോദിക്കൊപ്പം ഇദ്ദേഹത്തിന്റെ സാന്നിധ്യം ശ്രദ്ധിക്കപ്പെട്ടിട്ടുണ്ട്. തന്ത്രപ്രധാനമായ ആഗോള വിഷയങ്ങളിൽ ഇന്ത്യയുടെ നിലപാടുകൾ കൃത്യമായി വിദേശ നേതാക്കളിലേക്ക് എത്തിക്കുന്നതിലും നയതന്ത്ര തലത്തിലെ ഭാഷാ തടസ്സങ്ങൾ പരിഹരിക്കുന്നതിലും വിദേശകാര്യ മന്ത്രാലയത്തിലെ ഈ മലയാളി ഉദ്യോഗസ്ഥൻ നിർണായക പങ്കാണ് വഹിക്കുന്നത്.
