അതിർത്തി കടന്നുള്ള ഭീകരവാദത്തിനെതിരെ പാകിസ്ഥാൻ വിശ്വസനീയമായ നടപടികൾ സ്വീകരിക്കണമെന്ന് ഇന്ത്യ വ്യക്തമാക്കി. ന്യൂഡൽഹിയിൽ നടന്ന പ്രതിവാര മാധ്യമ സമ്മേളനത്തിൽ വിദേശകാര്യ മന്ത്രാലയ വക്താവ് രൺധീർ ജൈസ്വാളാണ് ഇക്കാര്യം വ്യക്തമാക്കിയത്. ഭീകരവാദത്തെ നേരിടാൻ സായുധ സേന പ്രതിജ്ഞാബദ്ധമാണെന്ന പാകിസ്ഥാൻ ചീഫ് ഓഫ് ഡിഫൻസ് ഫോഴ്സ് ഫീൽഡ് മാർഷ്മാൽ ആസിം മുനീറിന്റെ പ്രസ്താവനയോട് പ്രതികരിക്കുകയായിരുന്നു അദ്ദേഹം. വാക്കുകളല്ല, മറിച്ച് പ്രവൃത്തിയിലൂടെയാണ് പാകിസ്ഥാൻ തങ്ങളുടെ പ്രതിബദ്ധത തെളിയിക്കേണ്ടത്. പാകിസ്ഥാൻ പറയുന്നത് ലോകം വിശ്വസിക്കണമെങ്കിൽ അതിർത്തി കടന്നുള്ള ഭീകരവാദത്തിനെതിരെ ശക്തമായ നടപടികൾ ഉണ്ടാകണമെന്നും അദ്ദേഹം കൂട്ടിച്ചേർത്തു.
കഴിഞ്ഞ വർഷം പഹൽഗാം ആക്രമണത്തിന് ശേഷം, അതിർത്തി കടന്നുള്ള ഭീകരവാദത്തിന് നൽകുന്ന പിന്തുണ പാകിസ്ഥാൻ പൂർണ്ണമായും അവസാനിപ്പിക്കണമെന്ന നിലപാടിലാണ് ഇന്ത്യ ഉറച്ചുനിൽക്കുന്നത്. രാജ്യത്ത് വർദ്ധിച്ചുവരുന്ന ഭീകരവാദ ഭീഷണിയെ പ്രതിരോധിക്കാൻ പാക് സേന പ്രതിജ്ഞാബദ്ധമാണെന്ന് പെഷവാറിലെ കോർപ്സ് ആസ്ഥാനം സന്ദർശിക്കവേ ആസിം മുനീർ അവകാശപ്പെട്ടിരുന്നു. താലിബാൻ ഭരണകൂടം തങ്ങളുടെ മണ്ണിൽ ഭീകരവാദികൾക്ക് താവളം ഒരുക്കുന്നുവെന്ന് ഇസ്ലാമാബാദ് നിരന്തരം ആരോപിക്കുന്നുണ്ടെങ്കിലും, പാകിസ്ഥാനെതിരെ സ്വന്തം ഭൂമി ഉപയോഗിക്കാൻ അനുവദിക്കുന്നില്ലെന്നാണ് അഫ്ഗാനിസ്ഥാന്റെ നിലപാട്.
ഇതിനിടയിലാണ് അഫ്ഗാനിസ്ഥാൻ അതിർത്തിയിൽ പാകിസ്ഥാൻ നടത്തിയ വ്യോമാക്രമണങ്ങളെ ഇന്ത്യ ശക്തമായി അപലപിച്ചത്. ഒരു പരമാധികാരിയായ അയൽരാജ്യത്തിന് നേരെ ഇത്തരം ആക്രമണങ്ങൾ ഉണ്ടാകുന്നത് പ്രാദേശിക സമാധാനത്തെയും സുരക്ഷയെയും തകരാറിലാക്കുമെന്ന് വിദേശകാര്യ മന്ത്രാലയം വ്യക്തമാക്കി. അഫ്ഗാനുമായുള്ള അതിർത്തി പ്രദേശങ്ങളിൽ പാകിസ്ഥാൻ സുരക്ഷാ സേന നടത്തിയ വ്യോമാക്രമണങ്ങളിൽ ചാവേറുകൾ ഉൾപ്പെടെ 28 ഭീകരവാദികൾ കൊല്ലപ്പെട്ടതായി പാകിസ്ഥാൻ തിങ്കളാഴ്ച വ്യക്തമാക്കിയിരുന്നു.
