ജയിലിൽ കഴിയുന്ന സ്ഥാപകനും മുൻ പ്രധാനമന്ത്രിയുമായ ഇമ്രാൻ ഖാന്റെ മോചനം ആവശ്യപ്പെട്ട് പാകിസ്ഥാൻ തെഹ്റീക്-ഇ-ഇൻസാഫ് (പി.ടി.ഐ) പ്രഖ്യാപിച്ച ലോംഗ് മാർച്ചിന് മുന്നോടിയായി പാകിസ്ഥാനിൽ കനത്ത സുരക്ഷാ ലോക്ക്ഡൗൺ പ്രഖ്യാപിച്ചു. സെപ്റ്റംബർ 27-ന് ഇസ്ലാമാബാദിലേക്ക് നടത്താൻ നിശ്ചയിച്ചിരിക്കുന്ന മാർച്ചിനെ നേരിടാൻ പ്രധാന ഹൈവേകളും മോട്ടോർവേകളും അടച്ചിടുകയും, പഞ്ചാബിലുടനീളം സെക്ഷൻ 144 പ്രഖ്യാപിക്കുകയും ചെയ്തിട്ടുണ്ട്. കൂടാതെ സൈന്യത്തിന്റെയും റേഞ്ചേഴ്സിന്റെയും സേവനം തേടുകയും സെൻസിറ്റീവ് മേഖലകളിൽ മൊബൈൽ, ഇന്റർനെറ്റ് സേവനങ്ങൾ നിയന്ത്രിക്കാൻ തീരുമാനിക്കുകയും ചെയ്തിട്ടുണ്ട്.
ഖൈബർ പക്തൂൺഖ്വയെയും ഇസ്ലാമാബാദിനെയും ബന്ധിപ്പിക്കുന്ന പ്രധാന പാതകളായ എം-1, എം-14 മോട്ടോർവേകളും ജി.ടി. റോഡും വിവിധ ഭാഗങ്ങളിൽ അടച്ചു. അട്ടോക് മേഖലയിൽ കന്റെയ്നറുകളും മണൽച്ചാക്കുകളും നിരത്തി പ്രവേശന കവാടങ്ങൾ പൂർണ്ണമായും ബാരിക്കേഡ് ചെയ്തിരിക്കുകയാണ്. ഇസ്ലാമാബാദിൽ 22,000-ത്തിലധികം സുരക്ഷാ ഉദ്യോഗസ്ഥരെയും അട്ടോക്കിൽ 30,000-ത്തിലധികം പേരെയും വിന്യസിച്ചിട്ടുണ്ട്. ഇതിന് പുറമെ പഞ്ചാബിലും ഇസ്ലാമാബാദിലും ഒക്ടോബർ 5 വരെ സെക്ഷൻ 144 പ്രഖ്യാപിക്കുകയും അഞ്ചിലധികം ആളുകൾ ഒത്തുകൂടുന്നത് നിരോധിക്കുകയും ചെയ്തു.
സുരക്ഷാ മുൻകരുതലുകളുടെ ഭാഗമായി ഇസ്ലാമാബാദ്, റാവൽപിണ്ടി, അട്ടോക് എന്നിവിടങ്ങളിൽ മൊബൈൽ-ഇന്റർനെറ്റ് സേവനങ്ങൾ താൽക്കാലികമായി റദ്ദാക്കുമെന്നും അധികൃതർ അറിയിച്ചു. സുരക്ഷാ ക്രമീകരണങ്ങളുടെ ഭാഗമായി ഇസ്ലാമാബാദിലെ വിദ്യാഭ്യാസ സ്ഥാപനങ്ങളിൽ അവധി പ്രഖ്യാപിക്കുകയും ഓൺലൈൻ ക്ലാസുകളിലേക്ക് മാറ്റുകയും ചെയ്തിട്ടുള്ളത് ജനജീവിതത്തെയും ബാധിച്ചിട്ടുണ്ട്.
