തിരുവനന്തപുരം: കേന്ദ്ര ആയൂഷ് മന്ത്രാലയവും സംസ്ഥാന ആരോഗ്യ വകുപ്പും സംയുക്തമായി സംഘടിപ്പിച്ച ദേശീയ ആയൂർവേദ ദിനാചരണവുമായി ബന്ധപ്പെട്ട് തെറ്റായ വാർത്ത നൽകിയ മനോരമ പത്രത്തിനെതിരെ രൂക്ഷവിമർശനവുമായി തിരുവനന്തപുരം മേയർ വി.വി. രാജേഷ്. മന്ത്രി എത്താൻ വൈകിയതിൽ മേയർ പ്രതിഷേധിച്ചു എന്ന രീതിയിൽ നൽകിയ വാർത്ത പൂർണ്ണമായും തെറ്റാണെന്നും, പറയാത്ത കാര്യങ്ങൾ വാസ്തവവിരുദ്ധമായി പ്രചരിപ്പിച്ച് അസ്വസ്ഥത ഉണ്ടാക്കാനാണ് പത്രം ശ്രമിക്കുന്നതെന്നും മേയർ സോഷ്യൽ മീഡിയയിൽ കുറിച്ചു.
ആരോഗ്യ മന്ത്രി കെ. മുരളീധരൻ ഉദ്ഘാടനം ചെയ്യാനിരുന്ന പരിപാടിയിൽ ബുധനാഴ്ച ക്യാബിനറ്റ് ദിനമായതിനാൽ അദ്ദേഹം വരാൻ വൈകുമെന്ന വിവരം മന്ത്രിയുടെ ഓഫീസ് മുൻകൂട്ടി അറിയിച്ചിരുന്നുവെന്ന് മേയർ വ്യക്തമാക്കി. മുൻകൂട്ടി നിശ്ചയിച്ച മറ്റ് ഔദ്യോഗിക പരിപാടികൾ ഉള്ളതിനാൽ സംഘാടകരുടെയും മന്ത്രിയുടെ സ്റ്റാഫിന്റെയും അനുമതിയോടെയാണ് താൻ പ്രസംഗിച്ച് ആശംസകൾ അർപ്പിച്ച് മടങ്ങിയത്. എന്നാൽ ‘മോദിയുടെ ചിത്രമില്ല: പ്രതിഷേധിച്ച് മേയർ, മന്ത്രി മുരളീധരൻ എത്താൻ വൈകിയതിലും പ്രതിഷേധം’ എന്ന പേരിൽ മനോരമ നൽകിയ വാർത്ത വ്യാജമാണെന്ന് മേയർ ചൂണ്ടിക്കാട്ടി.
60 ശതമാനം സാമ്പത്തിക പങ്കാളിത്തമുള്ള കേന്ദ്ര പദ്ധതിയുടെ പരിപാടിയിൽ പ്രധാനമന്ത്രിയുടെ ചിത്രം ഉൾപ്പെടുത്തണമെന്ന് ആവശ്യപ്പെട്ടത് ശരിയാണെന്നും അത് തന്റെ ഉത്തരവാദിത്തമാണെന്നും രാജേഷ് പറഞ്ഞു. എന്നാൽ മന്ത്രി വൈകിയതിൽ പ്രതിഷേധിച്ചു എന്ന തരത്തിൽ തെറ്റായ വാർത്ത നൽകി ഔദ്യോഗിക പ്രോട്ടോകോൾ പോലും അറിയാത്ത അഹങ്കാരിയാണ് മേയറെന്ന് വരുത്തിതീർക്കാനും ഭരണാധികാരികൾക്കിടയിൽ അകൽച്ചയുണ്ടാക്കാനും ബോധപൂർവ്വമായ ശ്രമമാണ് പത്രം നടത്തിയത്. ഇത്തരത്തിൽ അസ്വസ്ഥത പടർത്തുന്ന വാർത്തകൾ നൽകി സഹായിക്കരുതെന്നും തെറ്റുതിരുത്താൻ പത്രത്തിന്റെ ചുമതലപ്പെട്ടവർ തയ്യാറാകണമെന്നും വി.വി. രാജേഷ് ആവശ്യപ്പെട്ടു.
