ഇസ്ലാമാബാദ്: സെപ്റ്റംബർ 27 ഞായറാഴ്ച പാകിസ്ഥാനിൽ എന്തും സംഭവിക്കാമെന്ന ഭീതിജനകമായ അന്തരീക്ഷം നിലനിൽക്കെ തലസ്ഥാന നഗരിയായ ഇസ്ലാമാബാദിൽ കടുത്ത സുരക്ഷാ മുൻകരുതലുകൾ. നഗരത്തിലേക്ക് പ്രവേശിക്കുന്ന പ്രധാന പാതകളിലെല്ലാം ഇരുപതിനായിരത്തോളം വരുന്ന ഭീമൻ ഷിപ്പിങ് കണ്ടെയ്നറുകൾ നിരത്തി താൽക്കാലിക കോട്ടമതിലുകൾ നിർമ്മിച്ച് പാക് സർക്കാർ ഗതാഗതം പൂർണ്ണമായും തടഞ്ഞു. ഇതിനുപുറമേ, തലസ്ഥാനത്തെയും പരിസര പ്രദേശങ്ങളിലെയും പ്രമുഖ ആശുപത്രികളോട് അടിയന്തര സാഹചര്യം നേരിടാൻ തക്കവിധം കിടക്കകൾ ഒഴിച്ചിടാനും അടിയന്തര ചികിത്സാ സൗകര്യങ്ങൾ സജ്ജമാക്കാനും സർക്കാർ പ്രത്യേക നിർദ്ദേശം നൽകിയിട്ടുണ്ട്.
മുൻ പ്രധാനമന്ത്രിയും പാകിസ്ഥാൻ തെഹ്രീകെ ഇൻസാഫ് (പി.ടി.ഐ) അധ്യക്ഷനുമായ ഇമ്രാൻ ഖാനെ ജയിലിൽ നിന്ന് മോചിപ്പിക്കണമെന്ന് ആവശ്യപ്പെട്ട് പ്രതിപക്ഷം പ്രഖ്യാപിച്ചിട്ടുള്ള വൻ പ്രതിഷേധ മാർച്ചാണ് പാക് സർക്കാരിനെ വൻ പ്രതിരോധത്തിലാക്കിയിരിക്കുന്നത്. ഇമ്രാൻ ഖാന്റെ ആഹ്വാനപ്രകാരം ലക്ഷക്കണക്കിന് പ്രവർത്തകർ ഇസ്ലാമാബാദിലേക്ക് ഒഴുകിയെത്തുമെന്ന രഹസ്യാന്വേഷണ റിപ്പോർട്ടുകളുടെ അടിസ്ഥാനത്തിലാണ് ഭരണകൂടം സൈനിക തലത്തിലുള്ള സുരക്ഷാ സജ്ജീകരണങ്ങൾ ഒരുക്കുന്നത്. പോലീസിനും അർദ്ധസൈനിക വിഭാഗങ്ങൾക്കും പുറമെ വൻതോതിൽ സുരക്ഷാ സേനയെയും നഗരത്തിൽ വിന്യസിച്ചിട്ടുണ്ട്.
പ്രതിഷേധക്കാർ തലസ്ഥാനത്തേക്ക് കടക്കുന്നത് തടയാൻ ഇൻറർനെറ്റ്, മൊബൈൽ സേവനങ്ങൾ പൂർണ്ണമായി വിച്ഛേദിക്കാനും നീക്കമുണ്ട്. അതിനിടെ, സർക്കാരിന്റെ അടിച്ചമർത്തൽ നടപടികൾ വകവെക്കാതെ ലക്ഷ്യസ്ഥാനത്ത് എത്തുമെന്ന് പി.ടി.ഐ നേതൃത്വം വ്യക്തമാക്കി. വരുംദിവസങ്ങളിൽ പാകിസ്ഥാൻ കൂടുതൽ ആഭ്യന്തര പ്രക്ഷോഭങ്ങളിലേക്ക് നീങ്ങുമെന്ന സൂചനയാണ് പുറത്തുവരുന്ന വാർത്തകൾ നൽകുന്നത്.
