ചീഫ് ഇലക്ഷൻ കമ്മീഷണർ ഗ്യാനേഷ് കുമാർ 48 മണിക്കൂറിനകം രാജി വെക്കണമെന്ന് ആവശ്യപ്പെട്ട് കോക്ക്റോച്ച് ജനതാ പാർട്ടി (സി.ജെ.പി). സി.ജെ.പി സ്ഥാപകൻ അഭിജീത് ദിപ്കെയാണ് ഡൽഹിയിൽ വാർത്താസമ്മേളനം വിളിച്ച് നിർണായകമായ ഈ മുന്നറിയിപ്പ് നൽകിയത്. നിശ്ചിത സമയത്തിനുള്ളിൽ ചീഫ് ഇലക്ഷൻ കമ്മീഷണർ സ്ഥാനമൊഴിഞ്ഞില്ലെങ്കിൽ രാജ്യവ്യാപകമായി വൻ പ്രതിഷേധ പരിപാടികൾ സംഘടിപ്പിക്കുമെന്നും ഡൽഹിയിൽ ‘ജന്ദർ മന്തർ 2.0’ മോഡൽ സമരം ആരംഭിക്കുമെന്നും അദ്ദേഹം മുന്നറിയിപ്പ് നൽകി.
രാജ്യത്തെ ജനാധിപത്യത്തിനും തിരഞ്ഞെടുപ്പ് സംവിധാനത്തിനും നിലവിൽ ഏറ്റവും വലിയ ഭീഷണിയാണ് സി.ഇ.സി ഗ്യാനേഷ് കുമാറെന്ന് അഭിജീത് ദിപ്കെ ആരോപിച്ചു. വോട്ടർ പട്ടികയുടെ പ്രത്യേക തീവ്ര പുനഃപരിശോധനയുമായി (എസ്.ഐ.ആർ) ബന്ധപ്പെട്ട നടപടികൾ ഉടനടി മരവിപ്പിക്കണമെന്നും അദ്ദേഹം ആവശ്യപ്പെട്ടു. കമ്മീഷനിൽ വിയോജിപ്പുകൾ നിലനിൽക്കെ ഏകപക്ഷീയമായി തീരുമാനം എടുത്തത് ജനാധിപത്യ തത്വങ്ങൾക്ക് വിരുദ്ധമാണെന്നും, സുതാര്യവും നീതിയുക്തവുമായ തിരഞ്ഞെടുപ്പ് ഉറപ്പാക്കാൻ നിലവിലെ സി.ഇ.സി പദവിയിൽ നിന്ന് മാറണമെന്നും പാർട്ടി വ്യക്തമാക്കി.
ഇലക്ഷൻ കമ്മീഷന്റെ വഴിവിട്ട നടപടികൾക്കെതിരെ പ്രതിപക്ഷ കക്ഷികളും സാധാരണക്കാരും തെരുവിൽ ഇറങ്ങണമെന്ന് സി.ജെ.പി ആഹ്വാനം ചെയ്തു. ഈ വിഷയത്തിൽ എല്ലാ രാഷ്ട്രീയ പാർട്ടികളും വ്യക്തമായ നിലപാട് സ്വീകരിക്കണമെന്നും അഭിജീത് ദിപ്കെ ആവശ്യപ്പെട്ടു. വോട്ടർമാരുടെ അവകാശങ്ങൾ സംരക്ഷിക്കുന്നതിനായി സി.ഇ.സി രാജിവെക്കുന്നത് വരെയും അട്ടിമറികൾ നിർത്തിവെക്കുന്നത് വരെയും ശക്തമായ പ്രക്ഷോഭവുമായി മുന്നോട്ടുപോകാനാണ് പാർട്ടിയുടെ തീരുമാനം.
