ലോകത്തിലെ കപ്പൽ നിർമ്മാണത്തിന്റെ ഒരു ശതമാനത്തിൽ താഴെ മാത്രം നിർമ്മിക്കുന്ന ഇന്ത്യയ്ക്ക്, അടുത്ത ദശകത്തിനുള്ളിൽ ലോകത്തിലെ നാലാമത്തെ വലിയ കപ്പൽ നിർമ്മാണ രാജ്യമായി ഉയരാൻ സാധിക്കുമെന്ന് പ്രധാനമന്ത്രിയുടെ സാമ്പത്തിക ഉപദേശക സമിതി അംഗം സഞ്ജീവ് സന്യാൽ വ്യക്തമാക്കി.
ലോകത്തിലെ രണ്ടാമത്തെ വലിയ സ്റ്റീൽ ഉത്പാദക രാജ്യമെന്ന പദവി, സമൃദ്ധമായ തൊഴിൽ സേന, കപ്പൽ നിർമ്മാണ-രൂപകൽപ്പന ശേഷി എന്നിവയുൾപ്പെടെ കപ്പൽ നിർമ്മാണരംഗത്ത് വളർച്ച കൈവരിക്കാൻ ആവശ്യമായ എല്ലാ ഘടകങ്ങളും ഇന്ത്യയ്ക്കുണ്ടെന്ന് അദ്ദേഹം പറഞ്ഞു.
19-ാം നൂറ്റാണ്ടിലെ കാലഹരണപ്പെട്ട നിയമങ്ങൾ ഉൾപ്പെടെയുള്ള സമുദ്ര-ഷിപ്പിംഗ് സംബന്ധമായ നിയമങ്ങളിൽ മാറ്റങ്ങൾ വരുത്താൻ ഇന്ത്യക്ക് സാധിച്ചിട്ടുണ്ടെന്ന് അദ്ദേഹം കൂട്ടിച്ചേർത്തു. സങ്കീർണ്ണമായ കപ്പലുകൾ നിർമ്മിക്കാനുള്ള ഇന്ത്യയുടെ കഴിവ് വാണിജ്യ കപ്പൽ നിർമ്മാണ മേഖലയിലേക്ക് വ്യാപിക്കാൻ മികച്ചൊരു അടിത്തറ നൽകുന്നുണ്ടെന്നും, അടുത്ത പത്ത വർഷത്തിനുള്ളിൽ കപ്പൽ നിർമ്മാണത്തിൽ ഇന്ത്യ നാലാം സ്ഥാനത്ത് എത്തുമെന്ന കാര്യത്തിൽ ന്യായമായ പ്രതീക്ഷ വെച്ചുപുലർത്താമെന്നും അദ്ദേഹം വ്യക്തമാക്കി. പുതിയ നിയമങ്ങളും നിക്ഷേപങ്ങളും രാജ്യത്തിന്റെ സമുദ്രമേഖലയ്ക്ക് വലിയ പിന്തുണയാണ് നൽകുന്നത്.
