ആധുനിക യുദ്ധങ്ങളുടെ സ്വഭാവം മുൻപെങ്ങുമില്ലാത്ത വിധം അതിവേഗം മാറിമറിയുകയാണെന്നും, അതിർത്തിയിൽ പോരാടുന്ന സൈനികർ മാത്രമല്ല രാജ്യം മുഴുവനുമാണ് ഇനി യുദ്ധത്തിൽ പങ്കാളികളാകുന്നതെന്നും സംയുക്ത സൈനിക മേധാവി (സി.ഡി.എസ്) ജനറൽ എൻ.എസ് രാജ സുബ്രഹ്മണി. രാജ്യത്തിന്റെ സുരക്ഷാ പരിസ്ഥിതിയും ഭാവി യുദ്ധതന്ത്രങ്ങളും ചർച്ച ചെയ്യുന്നതിനായി സംഘടിപ്പിച്ച പ്രമുഖ പ്രതിരോധ സമ്മേളനമായ ‘ഡെഫ്കോൺ 2026’ (Defcon 2026)-ൽ സംസാരിക്കവെയാണ് ആഗോള സൈനിക സാഹചര്യങ്ങളെയും സാങ്കേതിക മുന്നേറ്റങ്ങളെയും വിശകലനം ചെയ്തുകൊണ്ട് സി.ഡി.എസ് സുപ്രധാന സന്ദേശം നൽകിയത്.
നമുക്ക് ഉൾക്കൊള്ളാൻ കഴിയുന്നതിലും വേഗത്തിലാണ് യുദ്ധങ്ങളുടെ രീതിശാസ്ത്രം മാറിക്കൊണ്ടിരിക്കുന്നത്. ഇതിന് അനുസൃതമായി ഇന്ത്യയുടെ പ്രതിരോധ സംവിധാനങ്ങൾ അടിയന്തരമായി മാറേണ്ടതുണ്ട്. ആഗോള രാഷ്ട്രീയത്തിലെയും സാമ്പത്തിക രംഗത്തെയും ചലനങ്ങൾ ഇന്ന് പരസ്പരം ബന്ധപ്പെട്ടിരിക്കുന്നു. ലോകത്തിന്റെ ഏതെങ്കിലും ഒരു കോണിലുണ്ടാകുന്ന സംഘർഷങ്ങൾ മറ്റ് പ്രദേശങ്ങളെ നേരിട്ട് ബാധിക്കുന്ന അവസ്ഥയാണുള്ളത്. അതിനാൽ, കരയിലും കടലിലും ബഹിരാകാശത്തും ഒരുപോലെ നേരിടേണ്ടിവരുന്ന വിവിധ രീതിയിലുള്ള യുദ്ധസാഹചര്യങ്ങൾക്ക് ഇന്ത്യ എപ്പോഴും സജ്ജമായിരിക്കണമെന്ന് അദ്ദേഹം ഓർമ്മിപ്പിച്ചു.
യുദ്ധ ഭൂമിയിൽ നിന്ന് വിദൂരമായി സ്ഥിതി ചെയ്യുന്ന സാധാരണക്കാരോ രാജ്യത്തെ അടിസ്ഥാന സൗകര്യങ്ങളോ പുതിയ കാലത്തെ സംഘർഷങ്ങളിൽ സുരക്ഷിതമായിരിക്കുമെന്ന് ഇനി കരുതാൻ കഴിയില്ല. ‘ഇന്ന് ആരും എവിടെയും സുരക്ഷിതരല്ല. സൈനികർ മാത്രമല്ല, രാജ്യം മുഴുവനാണ് യുദ്ധത്തിലാകുന്നത്. സുരക്ഷിതമായ ഒരു ഇടവും ഇനി ബാക്കിയില്ല,’ നിലവിലുള്ള റഷ്യ-ഉക്രെയ്ൻ സംഘർഷത്തെ ഉദാഹരണമായി ചൂണ്ടിക്കാട്ടി അദ്ദേഹം വ്യക്തമാക്കി. ഒരു സമയം ഒരു തരം യുദ്ധത്തിന് മാത്രം തയ്യാറെടുക്കുന്ന പരമ്പരാഗത ശൈലി ഇന്ത്യയ്ക്ക് ഇനി അനുയോജ്യമല്ലെന്നും, ഒരേസമയം ഉയർന്നുവരുന്ന ഒന്നിലധികം ഭീഷണികളെ ചെറുക്കാൻ ശേഷിയുള്ള പ്രതിരോധ ആവാസവ്യവസ്ഥയാണ് നാം കെട്ടിപ്പടുക്കേണ്ടതെന്നും ജനറൽ സുബ്രഹ്മണി ചൂണ്ടിക്കാട്ടി.
യുദ്ധക്കളത്തിലെ വിജയപരാജയങ്ങൾ നിർണ്ണയിക്കുന്നതിൽ സാങ്കേതികവിദ്യയുടെയും വിവരങ്ങളുടെയും (Data) പങ്ക് നിർണ്ണായകമാണെന്ന് സി.ഡി.എസ് പറഞ്ഞു. “ഇന്നത്തെ യുദ്ധരംഗത്ത് സോഫ്റ്റ്വെയറാണ് രാജാവ്. ഭാവിയിലെ യുദ്ധവിജയങ്ങൾ തീരുമാനിക്കപ്പെടുന്നത് അത്യാധുനിക സോഫ്റ്റ്വെയറുകളിലും ആൽഗരിതങ്ങളിലും ഒരു സെൻസറിനെ മറ്റൊന്നുമായി ബന്ധിപ്പിക്കുന്ന ശൃംഖലകളിലുമാണ്. ആയുധ പ്ലാറ്റ്ഫോമുകൾ പ്രധാനമാണെങ്കിലും അതിനു ചുറ്റുമുള്ള സാങ്കേതിക നിർമ്മിതിയാണ് (Architecture) അതിനേക്കാൾ പ്രധാനം,” അദ്ദേഹം കൂട്ടിച്ചേർത്തു. ഡാറ്റയെ ഒരു തന്ത്രപ്രധാനമായ വിഭവമായി കാണണം. വിവരങ്ങൾ ശേഖരിക്കുക മാത്രമല്ല, അത് സുരക്ഷിതമായി സംസ്കരിച്ച് ശരിയായ സമയത്ത് ശരിയായ ആളുകളിലേക്ക് എത്തിക്കാനുള്ള സുരക്ഷിത ആശയവിനിമയ ചാനലുകൾ വികസിപ്പിക്കണം.
ഇന്റലിജൻസ്, മിഷൻ പ്ലാനിംഗ്, നിർണ്ണായക തീരുമാനങ്ങൾ എടുക്കൽ എന്നിവയിൽ ആർട്ടിഫിഷ്യൽ ഇന്റലിജൻസിന് (AI) വലിയ പങ്ക് വഹിക്കാനാകും. എന്നാൽ, വിവരങ്ങൾ അപൂർണ്ണമായിരിക്കുന്ന യുദ്ധസാഹചര്യങ്ങളിലും കാര്യക്ഷമമായി പ്രവർത്തിക്കാൻ സൈനിക എ.ഐ സംവിധാനങ്ങൾക്ക് സാധിക്കണം. ഇന്ത്യയ്ക്ക് വൻതോതിലുള്ള സാങ്കേതികവിദ്യ വികസിപ്പിക്കാനും അത് വിജയകരമായി നടപ്പിലാക്കാനുമുള്ള ശേഷിയുണ്ട്. നമ്മുടെ ഡിജിറ്റൽ രംഗത്തെ വിപ്ലവമായ ‘യു.പി.ഐ’ (UPI) ഇതിന് മികച്ച ഉദാഹരണമാണ്. ഇത്തരത്തിലുള്ള സാങ്കേതിക മുന്നേറ്റങ്ങളെ രാജ്യത്തിന്റെ പ്രതിരോധ മേഖലയിലേക്കും കൂട്ടിയോജിപ്പിക്കണം.
പ്രതിരോധ മേഖലയിൽ പുതിയ കാര്യങ്ങൾ പഠിക്കാനും അതിവേഗം മാറ്റങ്ങൾ ഉൾക്കൊള്ളാനുമുള്ള ശേഷിയാണ് ഏറ്റവും പ്രധാനം. “നാം ആവശ്യത്തിന് കാര്യങ്ങൾ പഠിക്കുന്നുണ്ടോ എന്നതല്ല, മറിച്ച് എത്ര വേഗത്തിലാണ് പുതിയ കാര്യങ്ങൾ പഠിച്ചെടുക്കുന്നത് എന്നതാണ് ചോദ്യം.” യുദ്ധരംഗത്ത് അതിവേഗം മാറ്റങ്ങളോട് പ്രതികരിക്കുന്ന വിഭാഗത്തിനായിരിക്കും മേൽക്കോയ്മ ലഭിക്കുക. അടിയന്തര സാഹചര്യങ്ങളിൽ പ്രതിരോധ ഉൽപ്പാദനം കുറഞ്ഞ സമയത്തിനുള്ളിൽ നൂറിരട്ടിയായി വർദ്ധിപ്പിക്കാൻ ഇന്ത്യൻ പ്രതിരോധ വ്യവസായ മേഖലയ്ക്ക് സാധിക്കണമെന്നും, അതിനായി സൈന്യവും സാങ്കേതിക കമ്പനികളും പ്രതിരോധ മേഖലയിലെ മറ്റ് പങ്കാളികളും തമ്മിൽ കൂടുതൽ ആഴത്തിലുള്ള സഹകരണം ഉണ്ടാകണമെന്നും സി.ഡി.എസ് ജനറൽ എൻ.എസ് രാജ സുബ്രഹ്മണി ആഹ്വാനം ചെയ്തു.
