വിദേശരാജ്യങ്ങളിൽ ഉയർന്ന ശമ്പളമുള്ള ജോലി വാഗ്ദാനം ചെയ്ത് ഉദ്യോഗാർത്ഥികളിൽ നിന്ന് ലക്ഷക്കണക്കിന് രൂപ തട്ടിയെടുത്ത കേസിലെ മുഖ്യപ്രതിയും പ്രമുഖ റിക്രൂട്ട്മെന്റ് ഏജൻസിയുടെ ഉടമയുമായ യുവതി തിരുവനന്തപുരം വിമാനത്താവളത്തിൽ വച്ച് പൊലീസിന്റെ പിടിയിലായി. കൊച്ചി ഇടപ്പള്ളിയിലും പാലാരിവട്ടത്തുമായി പ്രവർത്തിക്കുന്ന ‘ആംസ്റ്റർ ഓവർസീസ് പ്രൈവറ്റ് ലിമിറ്റഡ്’, ‘ആംസ്റ്റർ ഇമിഗ്രേഷൻ ഓവർസീസ്’ എന്നീ സ്ഥാപനങ്ങളുടെ സി.ഇ.ഒയും എം.ഡിയുമായ കൊല്ലം സ്വദേശി പാർവതി മായ ഷാജിയാണ് ഇമിഗ്രേഷൻ വിഭാഗത്തിന്റെ സഹായത്തോടെ കസ്റ്റഡിയിലായത്. പ്രതിക്കായി പൊലീസ് നേരത്തെ ലുക്കൗട്ട് നോട്ടീസ് പുറപ്പെടുവിച്ചിരുന്നു. വിദേശത്തുനിന്ന് വിമാനത്താവളത്തിലിറങ്ങിയ ഉടൻ കസ്റ്റഡിയിലെടുത്ത പാർവതിയെ പാലാരിവട്ടം പൊലീസ് കൊച്ചിയിലെത്തിച്ച് അറസ്റ്റ് രേഖപ്പെടുത്തും.
അർമേനിയ, പോളണ്ട് തുടങ്ങിയ രാജ്യങ്ങളിൽ ആകർഷകമായ തൊഴിൽ അവസരങ്ങളും ഉയർന്ന ശമ്പളവും വാഗ്ദാനം ചെയ്തായിരുന്നു പ്രധാനമായും തട്ടിപ്പ് നടന്നത്. തൃശൂർ എരുമപ്പെട്ടി സ്വദേശിയായ യുവാവിന് അർമേനിയയിൽ പ്രതിമാസം ഒന്നര ലക്ഷം രൂപ ശമ്പളമുള്ള ജോലി വാഗ്ദാനം ചെയ്ത് 4 ലക്ഷം രൂപ തട്ടിയെടുത്തതാണ് ഇതിലെ ആദ്യ കേസ്. കേന്ദ്ര ഗവൺമെന്റിന്റെയോ എമിഗ്രേഷൻ വിഭാഗത്തിന്റെയോ യാതൊരുവിധ ലൈസൻസുമില്ലാതെ പ്രവർത്തിച്ചിരുന്ന സ്ഥാപനം 2023 ഡിസംബറിൽ തുക കൈപ്പറ്റിയ ശേഷം ജോലിയോ വിസയോ നൽകിയില്ല. പണം തിരികെ ചോദിച്ചപ്പോൾ പരാതിക്കാരിയായ ഭാര്യയെ സമൂഹമാധ്യമങ്ങൾ വഴി അപമാനിക്കുമെന്ന് ഭീഷണിപ്പെടുത്തിയതായും പരാതിയിലുണ്ട്.
എറണാകുളം ജുഡീഷ്യൽ ഫസ്റ്റ് ക്ലാസ് മജിസ്ട്രേറ്റ് കോടതിയുടെ പ്രത്യേക നിർദ്ദേശപ്രകാരമാണ് പാലാരിവട്ടം പൊലീസ് കേസ് രജിസ്റ്റർ ചെയ്തത്. പാർവതി മായ ഷാജി ഒന്നാം പ്രതിയായ കേസിൽ ഇവരുടെ ഭർത്താവ് അനീഷ് മേനോൻ, മാനേജർമാരായ അഭിജിത്ത്, അജു കെ. മാത്യു, വിഷ്ണു വിജയൻ, ഷാജി തുടങ്ങിയ ഏഴു പേർക്കെതിരെ ഭാരതീയ ന്യായ സംഹിത (BNS) വകുപ്പുകളും എമിഗ്രേഷൻ ആക്ടും പ്രകാരം കേസെടുത്തിട്ടുണ്ട്. സമാനമായ രീതിയിൽ വിദേശത്ത് ഉപരിപഠനത്തിനും തൊഴിലിനും അവസരം വാഗ്ദാനം ചെയ്ത് നിരവധി പേരിൽ നിന്ന് ആംസ്റ്റർ ഓവർസീസ് ലക്ഷങ്ങൾ തട്ടിയിട്ടുണ്ടെന്നാണ് പുറത്തുവരുന്ന വിവരങ്ങൾ. സമാനമായ രീതിയിൽ മറ്റ് സ്റ്റേഷനുകളിലും ഇവർക്കെതിരെ കേസുകൾ നിലവിലുണ്ടെന്ന് വിവരമുണ്ട്. കൂടുതൽ അന്വേഷണത്തിലൂടെ മാത്രമേ തട്ടിപ്പിന്റെ യഥാർത്ഥ വ്യാപ്തി വ്യക്തമാകൂ എന്ന് പൊലീസ് അറിയിച്ചു.
