ഐക്യരാഷ്ട്രസഭ ജനറൽ അസംബ്ലിയിൽ ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹുവിന്റെ പ്രസംഗത്തിനിടെ നാടകീയ രംഗങ്ങൾ. ഗാസയിലെ സൈനിക നടപടികളെയും നരഹത്യാ ആരോപണങ്ങളെയും പ്രതിരോധിക്കാൻ നെതന്യാഹു എത്തിയതോടെ വലിയ പ്രതിഷേധമാണ് അന്താരാഷ്ട്ര വേദിയിലുണ്ടായത്. പ്രസംഗം ആരംഭിച്ച ഉടൻ തന്നെ ഡെലിഗേറ്റുകൾ കൂട്ടത്തോടെ ഹാൾ വിട്ടുപോയി. ഇതിനിടെ, ന്യൂയോർക്ക് മേയർ സോഹ്റാൻ മംദാനിക്കെതിരെ കടുത്ത വിമർശനവുമായി നെതന്യാഹു രംഗത്തെത്തിയത് പുതിയ രാഷ്ട്രീയ പോരിന് തിരികൊളുത്തിയിരിക്കുകയാണ്.
ഗാസയിലെ ഇസ്രായേൽ നയങ്ങൾക്കെതിരെ രംഗത്തുവന്ന ന്യൂയോർക്ക് മേയർ സോഹ്റാൻ മംദാനിയെ നെതന്യാഹു പ്രസംഗത്തിനിടെ നേരിട്ട് വിമർശിച്ചു. “ഇരയെയും വേട്ടക്കാരനെയും തലതിരിച്ചു കാണിക്കുന്ന നിങ്ങൾക്ക് ലജ്ജ തോന്നണം” എന്നായിരുന്നു നെതന്യാഹുവിന്റെ പരാമർശം. ഇസ്രായേൽ നരഹത്യ നടത്തുന്നുവെന്ന ആരോപണം പൂർണ്ണമായും തള്ളിക്കളഞ്ഞ അദ്ദേഹം, മേയർ സത്യത്തിന്റെ മുഖത്ത് കാർക്കിച്ചു തുപ്പുകയാണെന്നും ആരോപിച്ചു. ജ്യുവിഷ് ന്യൂയോർക്കുകാർക്ക് സ്വന്തം നഗരത്തിൽ സുരക്ഷിതമായി ജീവിക്കാൻ കഴിയാത്ത സാഹചര്യമൊരുക്കാൻ മേയർ കൂട്ടുനിന്നുവെന്നും നെതന്യാഹു തുറന്നടിച്ചു.
തന്റെ പ്രസംഗത്തിൽ ഖത്തറിനെയും ഇറാനെയും ലക്ഷ്യമിട്ട് രൂക്ഷ വിമർശനങ്ങൾ ഉന്നയിച്ച ഇസ്രായേൽ പ്രധാനമന്ത്രി, യു.എസ് പ്രസിഡന്റ് ഡൊണാൾഡ് ട്രംപിനെ ഇസ്രായേലിന്റെ ഏറ്റവും ശക്തമായ പങ്കാളിയായി പ്രശംസിക്കുകയും ചെയ്തു. എന്നാൽ നെതന്യാഹുവിന്റെ വാദങ്ങൾക്കെതിരെ മറുപടിയുമായി മംദാനിയും ഖത്തറും രംഗത്തെത്തി. ഗാസയിലെ ഇസ്രായേലിന്റെ ക്രൂരതകളെ ന്യായീകരിക്കാൻ നെതന്യാഹു പച്ചക്കള്ളങ്ങൾ പ്രചരിപ്പിക്കുകയാണെന്ന് മേയർ സോഹ്റാൻ മംദാനി കുറ്റപ്പെടുത്തി. പലസ്തീൻ പ്രദേശങ്ങളിലെ ഇസ്രായേലിന്റെ അതിക്രമങ്ങളിൽ നിന്ന് ലോകത്തിന്റെ ശ്രദ്ധ തിരിക്കാനുള്ള വ്യർത്ഥശ്രമമാണ് നെതന്യാഹുവിന്റെ ആരോപണങ്ങളെന്ന് ഖത്തറും വ്യക്തമാക്കി. അന്താരാഷ്ട്ര തലത്തിൽ വലിയ കോലാഹലത്തിനാണ് ഈ യു.എൻ സമ്മേളനം വേദിയായിരിക്കുന്നത്.
