പഞ്ചാബിലെ രാജപുരയ്ക്ക് സമീപമുള്ള ചിത്കാര സർവകലാശാല കാമ്പസിൽ അർദ്ധരാത്രിയിൽ വിദ്യാർത്ഥികൾ വൻ പ്രതിഷേധവും അക്രമവും നടത്തി. രണ്ട് പെൺകുട്ടികളെ കാമ്പസിൽ നിന്ന് കാണാതായെന്ന വ്യാജ വാർത്ത സോഷ്യൽ മീഡിയയിൽ പ്രചരിച്ചതിനെ തുടർന്നാണ് വിദ്യാർത്ഥികൾ തെരുവിലിറങ്ങിയത്. നൂറുകണക്കിന് വിദ്യാർത്ഥികൾ തടിച്ചുകൂടിയതോടെ കാമ്പസിനുള്ളിലെ സ്ഥിതിഗതികൾ നിയന്ത്രണതീതമാകുകയും സംഘർഷത്തിൽ കലാശിക്കുകയുമായിരുന്നു.
പ്രതിഷേധത്തിനിടെ രോഷാകുലരായ വിദ്യാർത്ഥികൾ സർവകലാശാലാ വസ്തുവകകൾ നശിപ്പിക്കുകയും സുരക്ഷാ ഉദ്യോഗസ്ഥരുമായി ഏറ്റുമുട്ടുകയും ചെയ്തു. വിവരമറിഞ്ഞ് സ്ഥലത്തെത്തിയ പോലീസ് വാഹനങ്ങൾക്കുനേരെ ആക്രമണമുണ്ടായതായും റിപ്പോർട്ടുകളുണ്ട്. സംഭവത്തിന്റെ ദൃശ്യങ്ങൾ സമൂഹമാധ്യമങ്ങളിൽ വ്യാപകമായി പ്രചരിച്ചതോടെ ഉന്നത പോലീസ് ഉദ്യോഗസ്ഥർ കാമ്പസിലെത്തി വിദ്യാർത്ഥികളുമായും അധികൃതരുമായും ചർച്ചകൾ നടത്തി.
എന്നാൽ കാണാതായെന്ന് പറയപ്പെടുന്ന കുട്ടികളെക്കുറിച്ച് കൃത്യമായ വിവരങ്ങളോ പരാതികളോ ഇല്ലെന്ന് പോലീസ് വ്യക്തമാക്കിയിട്ടുണ്ട്. പ്രചരിക്കുന്ന വാർത്തകൾ വെറും അഭ്യൂഹങ്ങൾ മാത്രമാണെന്നും സർവകലാശാലയിലെ എല്ലാ വിദ്യാർത്ഥികളും പൂർണ്ണ സുരക്ഷിതരാണെന്നും അധികൃതർ അറിയിച്ചു. ക്രമസമാധാനം വീണ്ടെടുക്കാൻ കാമ്പസിൽ കൂടുതൽ പോലീസിനെ വിന്യസിക്കുകയും സംഭവത്തെക്കുറിച്ച് വിശദമായ അന്വേഷണം ആരംഭിക്കുകയും ചെയ്തിട്ടുണ്ട്.
