എസ്എഫ്ഐ പ്രവർത്തകർക്കെതിരായ പോലീസ് നടപടിയിൽ പ്രതിഷേധിച്ച് സിപിഎം സംഘടിപ്പിച്ച സെക്രട്ടേറിയറ്റ് മാർച്ചിനിടെ പോലീസുകാരനെതിരെ പരസ്യമായി വധഭീഷണി മുഴക്കി സിപിഎം തിരുവനന്തപുരം ജില്ലാ സെക്രട്ടറി വി ജോയി എംഎൽഎ. കന്റോൺമെന്റ് പോലീസ് സ്റ്റേഷനിലെ എസ്ഐ ഗോകുലിനെ ലക്ഷ്യമിട്ടായിരുന്നു എംഎൽഎയുടെ വിവാദ പരാമർശം.
അസിസ്റ്റന്റ് കമ്മീഷണർ വി ജയചന്ദ്രനോട് സംസാരിക്കവേ, പോലീസുകാരന്റെ നടപടികൾ കൊണ്ട് പൊറുതിമുട്ടിയാൽ കൊലപാതകം വരെ നടന്നേക്കാമെന്ന് ജോയി മുന്നറിയിപ്പ് നൽകുകയായിരുന്നു. മുൻ മന്ത്രി കടകംപള്ളി സുരേന്ദ്രൻ, ആനാവൂർ നാഗപ്പൻ തുടങ്ങിയ മുതിർന്ന സിപിഎം നേതാക്കളുടെ സാന്നിധ്യത്തിലായിരുന്നു സംഭവം. ഇതിന്റെ ദൃശ്യങ്ങൾ സമൂഹമാധ്യമങ്ങളിൽ പ്രചരിച്ചതോടെ വിഷയം വലിയ രാഷ്ട്രീയ വിവാദമായി മാറിയിട്ടുണ്ട്.
യൂണിവേഴ്സിറ്റി മെൻസ് ഹോസ്റ്റലിനുള്ളിൽ അതിക്രമിച്ചു കയറി എസ്എഫ്ഐ പ്രവർത്തകരെ മർദിച്ചത് കന്റോൺമെന്റ് സ്റ്റേഷനിലെ സിഐ സതീഷ് കുമാറും എസ്ഐ ഗോകുലും ചേർന്നാണെന്നാണ് സിപിഎമ്മിന്റെ ആരോപണം. പോലീസുകാരുടെ ഭാഗത്തുനിന്നുണ്ടായ അതിക്രമത്തിൽ പ്രതിഷേധിച്ചും ബന്ധപ്പെട്ട ഉദ്യോഗസ്ഥർക്കെതിരെ അടിയന്തര നടപടി ആവശ്യപ്പെട്ടുമാണ് സിപിഎമ്മിന്റെയും എസ്എഫ്ഐയുടെയും ജില്ലാ കമ്മിറ്റികളുടെ നേതൃത്വത്തിൽ സെക്രട്ടേറിയറ്റിലേക്ക് പ്രതിഷേധ മാർച്ച് സംഘടിപ്പിച്ചത്. എന്നാൽ ഭരണകക്ഷിയുടെ എംഎൽഎയും ജില്ലാ സെക്രട്ടറിയുമായ നേതാവ് ഉന്നത പോലീസ് ഉദ്യോഗസ്ഥർക്ക് മുന്നിൽ വെച്ച് പോലീസുകാരനെതിരെ വധഭീഷണി മുഴക്കിയത് വലിയ വിമർശനങ്ങൾക്കിടയാക്കിയിട്ടുണ്ട്.
