അന്താരാഷ്ട്ര ക്രിക്കറ്റ് കൗൺസിൽ (ഐസിസി) തങ്ങളുടെ മത്സര നിയമാവലികളിൽ നിർണായക മാറ്റങ്ങൾ പ്രഖ്യാപിച്ചു. മത്സരം വൈകിപ്പിക്കുന്നതിനെതിരെയുള്ള പിഴ, പന്തുകളുടെ കൃത്യമായ അളവുകൾ നിർണ്ണയിക്കൽ, ഫീൽഡിംഗ് നിയമങ്ങളിലെ വ്യക്തത എന്നിവയുൾപ്പെടെ നിരവധി പ്രധാന ഭേദഗതികളാണ് നിലവിൽ വന്നിരിക്കുന്നത്. ഒക്ടോബർ 1 മുതൽ ആരംഭിക്കുന്ന എല്ലാ അന്താരാഷ്ട്ര പരമ്പരകൾക്കും ഈ പുതിയ നിയമങ്ങൾ ബാധകമായിരിക്കും. പുതിയ ഭേദഗതി പ്രകാരം പുരുഷ ക്രിക്കറ്റിൽ ബാറ്റർമാർ സമയം പാഴാക്കിയാൽ ഫീൽഡിംഗ് ടീമിന് അഞ്ച് പെനാൽറ്റി റൺസ് ലഭിക്കും.
അനുവദിച്ച സമയത്തിനുള്ളിൽ പന്ത് നേരിടാൻ ബാറ്റർ തയ്യാറായില്ലെങ്കിൽ ആദ്യ തവണ മുന്നറിയിപ്പും രണ്ടാം തവണ അന്തിമ മുന്നറിയിപ്പും നൽകും. മൂന്നാം തവണയും ഇത് ആവർത്തിച്ചാൽ ഫീൽഡിംഗ് ടീമിന് അഞ്ച് റൺസ് വിട്ടുകൊടുക്കും. കൂടാതെ, വനിതാ ക്രിക്കറ്റിലും ജൂനിയർ ക്രിക്കറ്റിലും ഉപയോഗിക്കുന്ന പന്തുകളുടെ വലിപ്പത്തിലും ഭാരത്തിലും പുതിയ നിബന്ധനകൾ ഏർപ്പെടുത്തി. വെളിച്ചക്കുറവ് മൂലം മത്സരം തടസ്സപ്പെടുന്നത് ഒഴിവാക്കാൻ ഇരു ടീമുകളുടെയും സമ്മതത്തോടെ പകലത്തെ ടെസ്റ്റ് മത്സരങ്ങളിൽ പിങ്ക് പന്തുകൾ പരീക്ഷണാടിസ്ഥാനത്തിൽ ഉപയോഗിക്കാനും ഐസിസി അനുമതി നൽകിയിട്ടുണ്ട്.
ഫീൽഡിംഗ് നിയമങ്ങളിലും റൺഔട്ട് വ്യവസ്ഥകളിലും ഐസിസി വ്യക്തത വരുത്തിയിട്ടുണ്ട്. ബാറ്ററെ ഔട്ടാക്കാനോ റൺസ് തടയാനോ വിക്കറ്റിലേക്ക് എറിയുന്ന ശ്രമങ്ങളെ മാത്രമേ ഇനി ‘ഓവർത്രോ’ ആയി കണക്കാക്കൂ എന്നും, ഫീൽഡറുടെ കയ്യിൽ നിന്ന് പന്ത് അബദ്ധത്തിൽ തട്ടിപ്പോകുന്നത് ഓവർത്രോ ആയി കണക്കാക്കില്ലെന്നും വ്യക്തമാക്കിയിട്ടുണ്ട്. റൺഔട്ടോ സ്റ്റമ്പിങ്ങോ പൂർത്തിയാക്കാൻ ഫീൽഡർക്ക് പന്തിൻമേൽ പൂർണ്ണ നിയന്ത്രണം ഉണ്ടായിരിക്കണം; പന്ത് വെറുതെ കൈയിൽ തട്ടുന്നതുകൊണ്ട് മാത്രം ഔട്ട് ആകില്ല. ഒപ്പം ടെസ്റ്റ് മത്സരങ്ങളിൽ ദിവസത്തിന്റെ അവസാന ഓവറിൽ വിക്കറ്റ് വീണാലും കാലാവസ്ഥ അനുയോജ്യമാണെങ്കിൽ ആ ഓവർ പൂർത്തിയാക്കും.
ടി20 മത്സരങ്ങളിലെ ഇന്നിംഗ്സ് ഇടവേള 15 മിനിറ്റായി നിജപ്പെടുത്തിയതും, ഏകദിന-ടി20 മത്സരങ്ങളിലെ ബ്രേക്ക് ഇടവേളകളിൽ ഹെഡ് കോച്ചിന് ഗ്രൗണ്ടിൽ പ്രവേശിക്കാൻ അനുമതി നൽകിയതും, ലെഗ്-സൈഡ് വൈഡ് നിയമം സ്ഥിരപ്പെടുത്തിയതും പുതിയ മാറ്റങ്ങളിൽ ഉൾപ്പെടുന്നു. മുൻ ഇന്ത്യൻ ക്യാപ്റ്റനും ഐസിസി ക്രിക്കറ്റ് കമ്മിറ്റി ചെയർമാനുമായ സൗരവ് ഗാംഗുലിയുടെ നേതൃത്വത്തിലാണ് ഈ ഭേദഗതികൾക്ക് രൂപം നൽകിയത്.
