തിരുവനന്തപുരം കോർപ്പറേഷനിലെ തൃക്കണ്ണാപുരം വാർഡിലെ സിപിഎം കൗൺസിലർ അജിൻ കൈക്കൂലി ചോദിക്കുകയും ഭീഷണിപ്പെടുത്തുകയും ചെയ്ത സംഭവം ഒളിക്യാമറ ദൃശ്യങ്ങളിലൂടെയും ശബ്ദരേഖയിലൂടെയും പുറത്തുവന്നു. പേയാട് സ്വദേശി സഞ്ജുവിന്റെ 19 സെന്റ് ഭൂമിയുടെ വിൽപനയുമായി ബന്ധപ്പെട്ട തടസ്സങ്ങൾ നീക്കിനൽകാൻ 10 ലക്ഷം രൂപയാണ് കൗൺസിലർ ആവശ്യപ്പെട്ടത്. പണം നൽകിയില്ലെങ്കിൽ ഡിവൈഎഫ്‌ഐ പ്രവർത്തകരെ കൊണ്ട് വസ്തുവിൽ കൊടികുത്തിക്കുമെന്നും നിർമ്മാണ പ്രവൃത്തികൾ തടസ്സപ്പെടുത്തുമെന്നും ഇയാൾ ഭീഷണിപ്പെടുത്തി. അടിയന്തരമായി മൂന്ന് ലക്ഷം രൂപയെങ്കിലും നൽകണമെന്നും മറ്റു രാഷ്ട്രീയ പാർട്ടികൾ ഇടപെട്ടാൽ കാര്യങ്ങൾ വഷളാകുമെന്നും കൗൺസിലർ ഫോൺ സംഭാഷണത്തിൽ മുന്നറിയിപ്പ് നൽകുന്നുണ്ട്.
തൃക്കണ്ണാപുരം എംഎൽഎ റോഡിനോട് ചേർന്നുള്ള 19 സെന്റ് സ്ഥലം പ്ലോട്ടുകളാക്കി തിരിച്ചു വിൽക്കുന്നതിനിടെയാണ് കൗൺസിലറുടെ അനധികൃത ഇടപെടലുണ്ടാകുന്നത്. ഭൂമിയിൽ പുറമ്പോക്ക് ഉണ്ടെന്നും അത് തരപ്പെടുത്തി തരാമെന്നും അല്ലെങ്കിൽ തരംമാറ്റി വിൽക്കാൻ സഹായിക്കാമെന്നും പറഞ്ഞാണ് പണം ആവശ്യപ്പെട്ടത്. പുറമ്പോക്ക് ഭൂമിയിലൂടെയുള്ള തോടും ഓടയും ചൂണ്ടിക്കാട്ടി പോലീസിനെയും വില്ലേജ് ഓഫീസറെയും കൊണ്ട് പണി തടയിപ്പിക്കുമെന്നും, പാർട്ടിക്കാർ കൊടികുത്തിയാൽ പണം മുഴുവൻ ബ്ലോക്കാകുമെന്നും ഇയാൾ ഭീഷണി മുഴക്കി. എന്നാൽ, വില്ലേജ് ഓഫീസർ ഉൾപ്പെടെയുള്ള ഉദ്യോഗസ്ഥരുടെ പരിശോധനകൾക്ക് ശേഷമാണ് വസ്തുവിന്റെ പോക്കുവരവ് പൂർത്തിയായതെന്നും ഭൂമിക്ക് നിയമപരമായ തടസ്സങ്ങളൊന്നുമില്ലെന്നും ഉടമ സഞ്ജു വ്യക്തമാക്കുന്നു.
കൈക്കൂലി ആവശ്യപ്പെടലും ഭീഷണിയും സഹിക്കവയ്യാതെ ഭൂവുടമ കോർപ്പറേഷൻ അധികാരികളെ സമീപിച്ചെങ്കിലും യാതൊരു നടപടിയും ഉണ്ടായില്ലെന്ന് ആക്ഷേപമുണ്ട്. ഇത് ഒത്തുകളിയാണെന്ന സംശയം ഉയർത്തുന്നതോടൊപ്പം സംഭവത്തിൽ പോലീസിനും ആഭ്യന്തര മന്ത്രിക്കും പരാതി നൽകിയിട്ടുണ്ടെന്ന് സഞ്ജു അറിയിച്ചു. കൈക്കൂലി ചോദിക്കുന്നതിന്റെ ഒളിക്യാമറ ദൃശ്യങ്ങളും ഭീഷണിപ്പെടുത്തുന്ന ഫോൺ സംഭാഷണവും പുറത്തുവന്നതോടെ തിരുവനന്തപുരത്ത് വിഷയം വലിയ രാഷ്ട്രീയ കോളിളക്കമായി മാറിയിട്ടുണ്ട്.
