2027 ലോകകപ്പ് ക്രിക്കറ്റ് മത്സരക്രമം ഐസിസി പുറത്തുവിട്ടു. പ്രധാന മത്സരങ്ങളിൽ 12 ടീമുകളെ എയും ബിയും എന്നിങ്ങനെ രണ്ട് ഗ്രൂപ്പുകളായി തിരിച്ചാണ് ടൂർണമെന്റ് ക്രമീകരിച്ചിരിക്കുന്നത്. പ്രമുഖ ടീമുകളായ ഇന്ത്യ, പാകിസ്ഥാൻ, ഓസ്ട്രേലിയ, സിംബാബ്‌വെ, അഫ്ഗാനിസ്ഥാൻ എന്നിവർ ഗ്രൂപ്പ് എയിലാണ് ഉൾപ്പെട്ടിരിക്കുന്നത്. ഒക്ടോബർ ഏഴിന് നിലവിലെ ചാമ്പ്യന്മാരായ ഓസ്ട്രേലിയക്കെതിരെയാണ് ഇന്ത്യയുടെ ആദ്യ മത്സരം. ശുഭ്മൻ ഗിൽ നയിക്കുന്ന ഇന്ത്യൻ ടീം ഒക്ടോബർ പത്തിന് ജോഹന്നാസ്ബർഗിൽ നടക്കുന്ന പോരാട്ടത്തിൽ പരമ്പരാഗത വൈരികളായ പാകിസ്ഥാനെ നേരിടും.
പുതിയ മത്സരക്രമം അനുസരിച്ച് ടൂർണമെന്റിൽ ഇന്ത്യയും പാകിസ്ഥാനും തമ്മിൽ മൂന്ന് തവണ വരെ ഏറ്റുമുട്ടാൻ സാധ്യതയുണ്ട്. ഗ്രൂപ്പ് ഘട്ടത്തിൽ ഇരു ടീമുകളും ഏറ്റുമുട്ടിയ ശേഷം, ഗ്രൂപ്പുകളിൽ നിന്ന് മുന്നിലെത്തുന്ന പോയിന്റുള്ള ടീമുകൾ സൂപ്പർ 7 ഘട്ടത്തിലേക്ക് യോഗ്യത നേടും. ഇവിടെ നിന്ന് ആദ്യ നാല് സ്ഥാനങ്ങളിലെത്തുന്ന ടീമുകൾ സെമി ഫൈനലിലേക്ക് മുന്നേറും. ഇതോടെ സൂപ്പർ 7 ഘട്ടത്തിലും തുടർന്ന് സെമി ഫൈനലിലോ ഫൈനലിലോ ഇന്ത്യ-പാക് പോരാട്ടത്തിന് വീണ്ടും കളമൊരുങ്ങിയേക്കാം. 2023-ൽ ഇന്ത്യയെ പരാജയപ്പെടുത്തി കിരീടം നേടിയ ഓസ്ട്രേലിയയാണ് നിലവിലെ ചാമ്പ്യന്മാർ.
