പാകിസ്ഥാൻ രഹസ്യാന്വേഷണ ഏജന്റുമായി പ്രതിരോധ വിവരങ്ങൾ പങ്കുവെച്ചതിന് ഇന്ത്യൻ നാവികസേനാ ഉദ്യോഗസ്ഥൻ കോയമ്പത്തൂരിൽ അറസ്റ്റിൽ. പശ്ചിമ ബംഗാൾ സ്വദേശിയായ പ്രദീപ് മുഖർജി (31) എന്ന നാവികനെയാണ് ആന്ധ്രാപ്രദേശ് പൊലീസിന്റെ കൗണ്ടർ ഇന്റലിജൻസ് (സിഐ) സെൽ അറസ്റ്റ് ചെയ്തത്. സോഷ്യൽ മീഡിയയിലൂടെ വ്യാജ പ്രൊഫൈലിലെത്തിയ പാക് വനിതാ ഏജന്റിന്റെ ഹണിട്രാപ്പിൽ പെട്ടാണ് ഇയാൾ രാജ്യസുരക്ഷയെ ബാധിക്കുന്ന നിർണ്ണായക വിവരങ്ങൾ കൈമാറിയതെന്ന് ടൈംസ് ഓഫ് ഇന്ത്യ റിപ്പോർട്ട് ചെയ്തു.
2014-ൽ നാവികസേനയിൽ ചേർന്ന പ്രദീപ് മുഖർജി വിശാഖപട്ടണത്തെ ഈസ്റ്റേൺ നേവൽ കമാൻഡിന് കീഴിലാണ് സേവനമനുഷ്ഠിച്ചുവന്നിരുന്നത്. കോയമ്പത്തൂരിലെ ഐഎൻഎസ് അഗ്രണിയിൽ മാനേജ്‌മെന്റ് ഡെവലപ്‌മെന്റ് പരിശീലന കോഴ്സിനായി എത്തിയതായിരുന്നു ഇയാൾ. കോഴ്സ് ആരംഭിച്ചതിന് തൊട്ടുപിന്നാലെയാണ് പ്രതിരോധ വിവരങ്ങൾ ചോർത്തിയതുമായി ബന്ധപ്പെട്ട് ആന്ധ്രാ പൊലീസ് കൗണ്ടർ ഇന്റലിജൻസ് വിഭാഗം ഇയാളെ കസ്റ്റഡിയിലെടുത്തത്.
