ഇന്ത്യയ്‌ക്കെതിരായ മൂന്നാമത്തെയും അവസാനത്തെയും ഏകദിനത്തിൽ വെസ്റ്റ് ഇൻഡീസിന് ചരിത്ര വിജയം സമ്മാനിച്ച തകർപ്പൻ ഇന്നിംഗ്സിന് പിന്നാലെ മുൻ ഇന്ത്യൻ നായകൻ എം.എസ്. ധോണിയുടെ ഉപദേശത്തെക്കുറിച്ച് വെളിപ്പെടുത്തി വിൻഡീസ് നായകൻ ഷായ് ഹോപ്പ്. മുല്ലാൻപൂരിൽ ഇന്ത്യയുയർത്തിയ 352 റൺസ് എന്ന കൂറ്റൻ ലക്ഷ്യം പിന്തുടരുമ്പോൾ ധോണി പണ്ട് നൽകിയ “നാം കരുതുന്നതിനേക്കാൾ കൂടുതൽ സമയം കളത്തിൽ നമ്മുടെ മുന്നിലുണ്ട്” എന്ന വാക്കുകകൾ തന്റെ മനസ്സിൽ ഉണ്ടായിരുന്നുവെന്ന് ഹോപ്പ് പറഞ്ഞു.
ശാരീരിക ബുദ്ധിമുട്ടുകളും പേശിവലിവും അവഗണിച്ച് ക്രീസിൽ നിലയുറപ്പിച്ച ഹോപ്പ്, 143 പന്തിൽ 162 റൺസുമായി പുറത്താകാതെ നിന്ന് വെസ്റ്റ് ഇൻഡീസിനെ 10 പന്തുകൾ ബാക്കിനിൽക്കെ അഞ്ച് വിക്കറ്റിന്റെ അവിശ്വസനീയ വിജയത്തിലേക്ക് നയിക്കുകയായിരുന്നു. ഏകദിന ചരിത്രത്തിൽ വെസ്റ്റ് ഇൻഡീസിന്റെ ഏറ്റവും ഉയർന്ന റൺചേസാണിത്.മത്സരത്തിലുടനീളം വിക്കറ്റ് കീപ്പറായി 50 ഓവറുകൾ ഫീൽഡിൽ ചിലവഴിച്ച ശേഷമാണ് ബാറ്റിംഗ് നിരയിലെ മാറ്റങ്ങൾ കാരണം ഹോപ്പ് ഓപ്പണറായി ഇറങ്ങിയത്. ടീമിലെ ചില പ്രധാന ബാറ്റർമാർക്ക് പരിക്കേറ്റതിനാൽ വലിയ വെല്ലുവിളിയാണ് മുന്നിലുണ്ടായിരുന്നതെന്നും, എന്നാൽ ധോണിയുടെ ഉപദേശം മനസ്സിൽ വച്ച് ലക്ഷ്യത്തെ ചെറു ഘട്ടങ്ങളായി തിരിച്ച് സമാധാനത്തോടെ സമീപിക്കുകയായിരുന്നുവെന്നും ഹോപ്പ് വ്യക്തമാക്കി.
കെ.എൽ. രാഹുലിന്റെ സെഞ്ചുറിയുടെയും (129) രോഹിത് ശർമ്മയുടെ അർദ്ധസെഞ്ചുറിയുടെയും (92) മികവിൽ ഇന്ത്യ പടുത്തുയർത്തിയ കൂറ്റൻ സ്കോർ ഹോപ്പിന്റെ തകർപ്പൻ പ്രകടനത്തോടെ നിഷ്പ്രഭമാകുകയായിരുന്നു. ആദ്യ രണ്ട് മത്സരങ്ങളും ജയിച്ച് ഇന്ത്യ 2-1ന് പരമ്പര സ്വന്തമാക്കിയെങ്കിലും, വിൻഡീസിന് ഈ വിജയം വലിയ ആത്മവിശ്വാസമാണ് നൽകുന്നത്.
