പാകിസ്ഥാൻ ക്രിക്കറ്റ് ബോർഡിൽ (പിസിബി) ഏതെങ്കിലും തരത്തിലുള്ള പ്രധാന ചുമതലകൾ ഏറ്റെടുക്കാൻ തനിക്ക് താല്പര്യമില്ലെന്ന് മുൻ പാക് പേസർ ഷോയ്ബ് അക്തർ വ്യക്തമാക്കി. ക്രിക്കറ്റ് രാഷ്ട്രീയത്തിൽ നിന്നും പിസിബിയിൽ നിന്നും വിട്ടുനിൽക്കാൻ അന്തരിച്ച അമ്മ നൽകിയ ഉപദേശം താൻ കർശനമായി പിന്തുടരുമെന്നും അദ്ദേഹം കൂട്ടിച്ചേർത്തു.
പിസിബിയുടെ ചീഫ് സെലക്ടറായോ മറ്റ് പ്രധാന തസ്തികകളിലോ അക്തർ ചുമതലയേറ്റെടുക്കുമെന്ന തരത്തിൽ മാധ്യമങ്ങളിലും സോഷ്യൽ മീഡിയയിലും പ്രചരിക്കുന്ന വാർത്തകൾ പൂർണ്ണമായും തെറ്റാണെന്നും ഊഹാപോഹങ്ങൾ മാത്രമാണെന്നും അദ്ദേഹം പറഞ്ഞു. നിലവിൽ ഹൂസ്റ്റണിൽ സ്വകാര്യ സന്ദർശനത്തിലുള്ള അക്തർ, പാകിസ്ഥാൻ പിസിബി ചെയർമാൻ മൊഹ്സിൻ നഖ്‌വിയുമായി കൂടിക്കാഴ്ച നടത്തിയോ എന്ന കാര്യം വ്യക്തമാക്കിയില്ലെങ്കിലും ചീഫ് സെലക്ടർ പദവി നൽകുന്നത് സംബന്ധിച്ച് യാതൊരുവിധ ഔദ്യോഗിക ചർച്ചകളും നടന്നിട്ടില്ലെന്ന് പി ടി വി സ്പോർട്സിന് നൽകിയ അഭിമുഖത്തിൽ സ്ഥിരീകരിച്ചു.
പാകിസ്ഥാൻ ക്രിക്കറ്റിന്റെ പുരോഗതിയും വിജയവുമാണ് താൻ ആഗ്രഹിക്കുന്നതെന്നും എന്നാൽ ബോർഡിന്റെ ഭാഗമാകാതെ തന്നെ മറ്റ് പല വഴികളിലൂടെയും രാജ്യത്തെ ക്രിക്കറ്റിനെ സേവിക്കാൻ തനിക്ക് സാധിക്കുമെന്നും അക്തർ കൂട്ടിച്ചേർത്തു
