ലണ്ടൻ: മാഞ്ചസ്റ്ററിലെ പ്രമുഖ മേയറും ലേബർ പാർട്ടി നേതാവുമായ ആൻഡി ബേർൺഹാം അടുത്തിടെ സന്ദർശിക്കുകയും പുകഴ്ത്തുകയും ചെയ്ത പ്രമുഖ മസ്ജിദിൽ, ശിക്ഷിക്കപ്പെട്ട താലിബാൻ ഭീകരന്റെ സംസ്കാര ചടങ്ങുകൾ നടത്തിയത് ബ്രിട്ടനിൽ വലിയ രാഷ്ട്രീയ കൊടുങ്കാറ്റിന് തിരികൊളുത്തി. മാഞ്ചസ്റ്റർ സെൻട്രൽ മോസ്കിലാണ് ബ്രിട്ടനിൽ തീവ്രവാദ പ്രവർത്തനങ്ങൾക്ക് ശിക്ഷ അനുഭവിക്കവേ ജയിലിൽ വെച്ച് മരണപ്പെട്ട മുൻ താലിബാൻ ഭീകരൻ മുനീർ ഫറൂഖിയുടെ മയ്യത്ത് നമസ്കാരം (ജനാസ) നടന്നത്. സംഭവത്തിൽ ഭരണകക്ഷിയായ ലേബർ പാർട്ടിക്കെതിരെ കടുത്ത വിമർശനവുമായി പ്രതിപക്ഷം രംഗത്തെത്തിയിട്ടുണ്ട്.
2011-ൽ ബ്രിട്ടനിൽ യുവാക്കളെ ഭീകരവാദത്തിലേക്ക് ആകൃഷ്ടരാക്കാനും അഫ്ഗാനിസ്താനിലേക്ക് പോരാടാൻ അയക്കാനുമായി റിക്രൂട്ട്മെന്റ് സെന്റർ നടത്തിയത് ഉൾപ്പെടെയുള്ള കുറ്റങ്ങൾക്ക് നാല് ജീവപര്യന്തം തടവിന് ശിക്ഷിക്കപ്പെട്ട വ്യക്തിയാണ് പാകിസ്താൻ വംശജനായ മുനീർ ഫറൂഖി. സെപ്റ്റംബർ അവസാനത്തോടെ 69-ാം വയസ്സിൽ ജയിലിൽ വെച്ചാണ് ഇയാൾ മരണപ്പെട്ടത്. സെപ്റ്റംബർ 30-ന് മാഞ്ചസ്റ്റർ സെൻട്രൽ മോസ്കിൽ നടന്ന ഇയാളുടെ സംസ്കാര ചടങ്ങിൽ നൂറിലധികം പേർ പങ്കെടുത്തതായി ബ്രിട്ടീഷ് മാധ്യമങ്ങൾ റിപ്പോർട്ട് ചെയ്തു.
കഴിഞ്ഞ റമദാൻ മാസത്തിൽ ഈ മസ്ജിദിൽ നടന്ന ഇഫ്താർ വിരുന്നിൽ ഗ്രേറ്റർ മാഞ്ചസ്റ്റർ മേയർ ആൻഡി ബേർൺഹാമും ലേബർ പാർട്ടി എം.പിമാരായ ഡെബി എബ്രഹാംസ്, അഫ്സൽ ഖാൻ എന്നിവരും പങ്കൈടുത്തിരുന്നു. പള്ളിയിൽ പ്രാർത്ഥനയ്‌ക്കെത്തിയവർക്ക് നേരെയുണ്ടായ ഒരു സുരക്ഷാ ഭീഷണിയെ തുടർന്ന് പിന്തുണ പ്രഖ്യാപിക്കാനാണ് നേതാക്കൾ അന്ന് മസ്ജിദ് സന്ദർശിച്ചതും പ്രസംഗിച്ചതും. എന്നാൽ ഭീകരവാദ കേസിൽ പ്രതിയായ വ്യക്തിയുടെ സംസ്കാര ചടങ്ങ് നടക്കാൻ അതേ മസ്ജിദ് അനുമതി നൽകിയത് ബ്രിട്ടനിൽ വലിയ വിവാദമായിരിക്കുകയാണ്.
സംഭവത്തിന് പിന്നാലെ ലേബർ പാർട്ടി നേതൃത്വത്തിനെതിരെ ഷാഡോ ഹോം സെക്രട്ടറി ക്രിസ് ഫിൽപ്പ് രൂക്ഷമായ ആക്രമണം അഴിച്ചുവിട്ടു. രാജ്യത്തിന്റെ സുരക്ഷയ്ക്ക് ഏറ്റവും വലിയ ഭീഷണിയായ ഇസ്ലാമിക തീവ്രവാദത്തോട് വിട്ടുവീഴ്ച ചെയ്യുന്ന സമീപനമാണ് ലേബർ പാർട്ടി സ്വീകരിക്കുന്നതെന്ന് അദ്ദേഹം കുറ്റപ്പെടുത്തി. ഭീകരന്റെ മയ്യത്ത് നമസ്കാരം നടന്ന മസ്ജിദുമായി ബന്ധം പുലർത്തിയതിൽ പ്രധാനമന്ത്രി മാപ്പ് പറയണമെന്നും പ്രതിപക്ഷം ആവശ്യപ്പെട്ടു. അതേസമയം ഉയർന്നുവന്ന വിവാദങ്ങളിൽ മസ്ജിദ് അധികൃതരോ ബ്രിട്ടീഷ് പ്രധാനമന്ത്രിയുടെ ഓഫീസോ ഇതുവരെ ഔദ്യോഗികമായി പ്രതികരിച്ചിട്ടില്ല.
