തിരുവനന്തപുരം: സംസ്ഥാനത്ത് മഴക്കാലത്ത് മാത്രം കണ്ടുവന്നിരുന്ന ഡെങ്കിപ്പനി ഇനി വർഷം മുഴുവൻ നിലനിൽക്കുന്ന മഹാമാരിയായി മാറുന്നു. മുൻവർഷങ്ങളെ അപേക്ഷിച്ച് രോഗബാധിതരുടെയും മരണപ്പെടുന്നവരുടെയും എണ്ണത്തിൽ വൻ വർധനവാണ് റിപ്പോർട്ട് ചെയ്യുന്നത്. ഈ വർഷം സെപ്റ്റംബർ 24 വരെയുള്ള കണക്കുകൾ പ്രകാരം സംസ്ഥാനത്ത് 11,281 പേർക്കാണ് ഡെങ്കിപ്പനി സ്ഥിരീകരിച്ചത്. രോഗബാധയെ തുടർന്ന് 42 പേർക്ക് ജീവൻ നഷ്ടമാവുകയും ചെയ്തു.
കഴിഞ്ഞ വർഷത്തെ ആകെ കണക്കുകളെ പോലും മറികടക്കുന്ന രോഗവ്യാപനമാണ് ഇത്തവണ ഉണ്ടായിരിക്കുന്നത്.2025-ൽ വർഷം മുഴുവനായി 10,886 പേർക്കായിരുന്നു ഡെങ്കിപ്പനി ബാധിച്ചത്. അന്ന് രോഗം മൂലം 56 മരണങ്ങളാണ് റിപ്പോർട്ട് ചെയ്തിരുന്നത്. എന്നാൽ ഇത്തവണ ഒൻപത് മാസം പിന്നിടുമ്പോൾ തന്നെ രോഗികളുടെ എണ്ണം മുൻവർഷത്തെക്കാൾ ഉയർന്നു എന്നത് ആരോഗ്യവകുപ്പിനെയും പൊതുജനങ്ങളെയും ഒരുപോലെ ആശങ്കയിലാക്കുന്നു.
മഴക്കാലത്ത് മാത്രം കണ്ടിരുന്ന രോഗം ഇപ്പോൾ വർഷത്തിന്റെ തുടക്കം മുതൽ തന്നെ ഉയർന്ന തോതിൽ റിപ്പോർട്ട് ചെയ്യുന്നുണ്ടെന്നതാണ് ഏറ്റവും ഭയപ്പെടുത്തുന്ന കാര്യം. സാധാരണയായി രോഗബാധ കുറയാറുള്ള ജനുവരി മാസത്തിൽ മാത്രം 378 പേർക്ക് രോഗം സ്ഥിരീകരിക്കുകയും നാലുപേർ മരണപ്പെടുകയും ചെയ്തിരുന്നു. അതിനുശേഷം മൺസൂൺ ദുർബലമായ സെപ്റ്റംബർ മാസത്തിൽ, വെറും 24 ദിവസത്തിനുള്ളിൽ മാത്രം 1,330 പേർക്കാണ് ഡെങ്കിപ്പനി ബാധിച്ചത്.
കാലാവസ്ഥാ വ്യതിയാനവും ഈഡിസ് കൊതുകുകളുടെ എണ്ണത്തിലുണ്ടായ വൻ വർധനവുമാണ് രോഗം വർഷം മുഴുവൻ നിലനിൽക്കാൻ കാരണമായി വിദഗ്ധർ ചൂണ്ടിക്കാണിക്കുന്നത്. വീടുകളിലും സ്ഥാപനങ്ങളിലും കെട്ടിക്കിടക്കുന്ന തെളിഞ്ഞ വെള്ളത്തിലാണ് ഈഡിസ് കൊതുകുകൾ മുട്ടയിട്ടു പെരുകുന്നത്. ഇടവിട്ടു പെയ്യുന്ന മഴയും തുടർന്നുള്ള അന്തരീക്ഷ ഊഷ്മാവും കൊതുകു വളരാൻ അനുയോജ്യമായ സാഹചര്യമൊരുക്കുന്നു.
ലക്ഷണങ്ങൾ കണ്ടാലുടൻ സ്വയം ചികിത്സ ഒഴിവാക്കി അടുത്തുള്ള പ്രാഥമിക ആരോഗ്യ കേന്ദ്രത്തിലോ ആശുപത്രിയിലോ ചികിത്സ തേടണമെന്ന് ആരോഗ്യവകുപ്പ് നിർദ്ദേശിച്ചു. കഠിനമായ പനി, തലവേദന, കണ്ണുകൾക്ക് പിന്നിലെ വേദന, പേശികളിലും സന്ധികളിലും ഉണ്ടാകുന്ന കഠിനമായ വേദന എന്നിവയാണ് പ്രധാന ലക്ഷണങ്ങൾ. രോഗവ്യാപനം തടയാനായി ആഴ്ചയിലൊരിക്കൽ ‘ഡ്രൈ ഡേ’ ആചരിക്കാനും വീടും പരിസരവും ശുചിയായി സൂക്ഷിക്കാനും പൊതുജനങ്ങൾ ശ്രദ്ധിക്കണമെന്ന് അധികൃതർ മുന്നറിയിപ്പ് നൽകുന്നു.
