അർജന്റീന ഫുട്ബോൾ ടീമിന്റെയും സൂപ്പർ താരം ലയണൽ മെസ്സിയുടെയും പേരിൽ നടന്ന കോടികളുടെ തട്ടിപ്പ് കേസിൽ റിപ്പോർട്ടർ ബ്രോഡ്കാസ്റ്റിങ് കമ്പനി മാനേജിങ് ഡയറക്ടർ ആന്റോ അഗസ്റ്റിനെതിരെ എൻഫോഴ്‌സ്‌മെന്റ് ഡയറക്ടറേറ്റ് (ഇ.ഡി) അന്വേഷണം ശക്തമാക്കുന്നു. സംഭവവുമായി ബന്ധപ്പെട്ട് കൊച്ചി ഇ.ഡി. ഓഫീസ് ഉടൻ തന്നെ എൻഫോഴ്‌സ്‌മെന്റ് കേസ് ഇൻഫർമേഷൻ റിപ്പോർട്ട് (ഇ.സി.ഐ.ആർ.) രജിസ്റ്റർ ചെയ്യും. കേസിൽ വ്യക്തിപരമായി ആന്റോ അഗസ്റ്റിനെ കൂടാതെ റിപ്പോർട്ടർ ബ്രോഡ്കാസ്റ്റിങ് പ്രൈവറ്റ് ലിമിറ്റഡ് കമ്പനിയെയും ഇ.ഡി പ്രതിപ്പട്ടികയിൽ ഉൾപ്പെടുത്തും.
മെസ്സിയെയും അർജന്റീന ടീമിനെയും കേരളത്തിലെത്തിക്കാമെന്ന് വാഗ്ദാനം ചെയ്ത് വൻതോതിൽ സാമ്പത്തിക തട്ടിപ്പ് നടത്തുകയും വഴിതിരിച്ചുവിടുകയും ചെയ്തുവെന്ന പരാതിയിലാണ് നടപടി. കേസുമായി ബന്ധപ്പെട്ട് അന്വേഷണ സംഘം (എസ്.ഐ.ടി) നടത്തിയ പരിശോധനകളിൽ ലഭിച്ച സാമ്പത്തിക ഇടപാടുകളുടെയും കള്ളപ്പണം വെളുപ്പിക്കലുകളുടെയും നിർണായക രേഖകൾ മുൻനിർത്തിയാണ് ഇ.ഡി അന്വേഷണത്തിലേക്ക് കടക്കുന്നത്. പ്രതിരോധ, വിദേശനാണ്യ വിനിമയ ചട്ടങ്ങളുടെ (FEMA) ലംഘനവും കള്ളപ്പണം വെളുപ്പിക്കൽ നിരോധന നിയമത്തിന്റെ (PMLA) പരിധിയിൽ വരുന്ന കുറ്റകൃത്യങ്ങളും നടന്നിട്ടുണ്ടോ എന്നാണ് ഇ.ഡി പ്രധാനമായും പരിശോധിക്കുന്നത്.
അർജന്റീന ഫുട്ബോൾ അസോസിയേഷനുമായി (എ.എഫ്.എ) കരാറുണ്ടാക്കിയെന്ന പേരിൽ കോടിക്കണക്കിന് രൂപ വിദേശത്തേക്ക് കടത്തിയതായും സ്പോൺസർഷിപ്പ് തുകകളിൽ വലിയ ക്രമക്കേട് കാട്ടിയതായും നേരത്തെ കണ്ടെത്തലുകളുണ്ടായിരുന്നു. ഇതിന് പിന്നിൽ പ്രവർത്തിച്ച മാധ്യമ സ്ഥാപനത്തിന്റെയും അതിന്റെ തലപ്പത്തിരിക്കുന്ന വ്യക്തിയുടെയും പങ്ക് വ്യക്തമായതോടെയാണ് ഇ.ഡി കർശന നടപടികളിലേക്ക് നീങ്ങിയത്. കേസിലെ മറ്റ് സാമ്പത്തിക ഇടപാടുകളെക്കുറിച്ചും വരുംദിവസങ്ങളിൽ ആന്റോ അഗസ്റ്റിനെ ചോദ്യം ചെയ്യാനുമാണ് ഇ.ഡിയുടെ തീരുമാനം.
