ഐക്യരാഷ്ട്രസഭയുടെ വേദിയിൽ പാകിസ്താന് ശക്തമായ തിരിച്ചടി നൽകി ഇന്ത്യ. സ്വന്തം രാജ്യത്ത് വളർത്തിയെടുത്ത ഭീകരവാദം ഇപ്പോൾ പാകിസ്താന് തന്നെ വിനയായി മാറിക്കൊണ്ടിരിക്കുകയാണെന്ന് ഇന്ത്യ ഐക്യരാഷ്ട്രസഭയുടെ ആറാം കമ്മിറ്റിയിൽ (ലിഗൽ കമ്മിറ്റി) വ്യക്തമാക്കി. പാകിസ്താൻ നേതാക്കളുടെ തന്നെ മുൻകാല പ്രസ്താവനകൾ ഉദ്ധരിച്ചുകൊണ്ടായിരുന്നു ഇന്ത്യയുടെ ഫസ്റ്റ് സെക്രട്ടറി രഘു പുരിയുടെ നിശിതമായ വിമർശനം. പാകിസ്താൻ നിർമ്മിച്ചെടുത്ത ‘ഫ്രാങ്കൻസ്റ്റൈൻ’ രാക്ഷസൻ ഭരണകൂടത്തിന്റെ നിയന്ത്രണം വിട്ട് സ്വന്തം നാട്ടിൽ നാശം വിതയ്ക്കുകയാണെന്ന് അദ്ദേഹം തുറന്നടിച്ചു.
ഭീകരവാദത്തിനെതിരെയുള്ള പോരാട്ടത്തിൽ തങ്ങളാണ് മുൻനിരയിലെ ഇരകളെന്ന് ലോകത്തിന് മുന്നിൽ അഭിനയിക്കുന്ന പാകിസ്താന്റെ യഥാർത്ഥ മുഖം ഇന്ത്യ തുറന്നുകാട്ടി. മുൻ പാകിസ്താൻ പ്രധാനമന്ത്രി നവാസ് ഷെരീഫും മകളും പഞ്ചാബ് മുഖ്യമന്ത്രിയുമായ മറിയം നവാസ് ഷെരീഫും മുൻപ് നടത്തിയ വെളിപ്പെടുത്തലുകൾ ഇന്ത്യ വേദിയിൽ ചൂണ്ടിക്കാട്ടി. 2018-ൽ മുംബൈ ഭീകരാക്രമണത്തെക്കുറിച്ച് നവാസ് ഷെരീഫ് നടത്തിയ അഭിമുഖത്തിലെ വാക്കുകളും, സ്വന്തം അയൽ പ്രവിശ്യകളിൽ നിന്നാണ് പഞ്ചാബ് നേരിടുന്ന ഏറ്റവും വലിയ ഭീഷണിയെന്ന് അടുത്തിടെ മറിയം നവാസ് പ്രസ്താവിച്ചതും രഘു പുരി ഓർമ്മിപ്പിച്ചു. ഭീകരരെ വേർതിരിച്ചു കാണാൻ കഴിയില്ലെന്ന വാസ്തവം പാകിസ്താൻ സമ്മതിക്കേണ്ടിവരുമെന്ന് അദ്ദേഹം വ്യക്തമാക്കി.
പഹൽഗാം ഭീകരാക്രമണത്തിന് മറുപടിയായി ഇന്ത്യ നടത്തിയ ‘ഓപ്പറേഷൻ സിന്ദൂർ’ തിരിച്ചടിയെക്കുറിച്ചുള്ള പാകിസ്താന്റെ വ്യാജ അവകാശവാദങ്ങളെയും ഇന്ത്യ തള്ളിക്കളഞ്ഞു. തകർന്നടിഞ്ഞ വ്യോമസേനാ താവളങ്ങളും റൺവേകളിലെ വലിയ ഗർത്തങ്ങളുമാണ് വിജയമെന്ന് കരുതുന്നതെങ്കിൽ പാകിസ്താന് ആ സന്തോഷത്തിൽ ആറാടാമെന്ന് ഇന്ത്യൻ നയതന്ത്രജ്ഞൻ പരിഹസിച്ചു. സൈന്യത്തിന്റെ പരാജയം മറച്ചുവെക്കാൻ ഐക്യരാഷ്ട്രസഭയെ തെറ്റിദ്ധരിപ്പിക്കുന്ന പാകിസ്താന്റെ വ്യാജ പ്രചാരണങ്ങളെയും നയതന്ത്ര നീക്കങ്ങളെയും ഇന്ത്യ ശക്തമായ ഭാഷയിൽ അപലപിച്ചു.
