ഭാരതത്തിന്റെ പ്രതിരോധ സുരക്ഷയിൽ വിള്ളലുണ്ടാക്കാൻ പാകിസ്താൻ രഹസ്യാന്വേഷണ ഏജൻസികൾ നടത്തിയ കുതന്ത്രങ്ങളെ അതിശക്തമായി തകർത്തെറിഞ്ഞ് ഇന്ത്യൻ സുരക്ഷാ ഏജൻസികൾ. ‘ഓപ്പറേഷൻ ഫയർവാൾ-2026’ (Operation Firewall-2026) എന്ന പേരിൽ ആന്ധ്രാപ്രദേശ് കൗണ്ടർ ഇന്റലിജൻസ് സെല്ലും (CIC) കേന്ദ്ര പ്രതിരോധ രഹസ്യാന്വേഷണ ഏജൻസികളും സംയുക്തമായി നടത്തിയ അതിവിദഗ്ദ്ധമായ തിരച്ചിലിൽ പാകിസ്താന്റെ ഹണിട്രാപ്പ് ചാരശൃംഖല പൂർണ്ണമായും തകർത്തു. ജാഗ്രതയോടെ പ്രവർത്തിച്ച ഇന്ത്യൻ ഏജൻസികൾ 13 നാവികസേനാ ഉദ്യോഗസ്ഥരെ കസ്റ്റഡിയിലെടുക്കുകയും കേസുമായി ബന്ധപ്പെട്ട് രണ്ട് പ്രധാന പ്രതികളെ അറസ്റ്റ് ചെയ്യുകയും ചെയ്തു.
വിശാഖപട്ടണത്തെ ഈസ്റ്റേൺ നേവൽ കമാൻഡിലെ നാവികനായ പ്രദീപ് മുഖർജി, നാവികസേനയിലെ കരാർ ഡ്രൈവർ അന്നം സായ് വരപ്രസാദ് എന്നിവരാണ് പിടിയിലായത്. വ്യാജ സോഷ്യൽ മീഡിയ പ്രൊഫൈലുകൾ സൃഷ്ടിച്ച് ‘ജോഷിത പാൽ’, ‘അൻവി മേത്ത’ എന്നീ വ്യാജ പേരുകളിൽ ഇന്ത്യക്കാരായ നാവികരെ പ്രലോഭിപ്പിക്കാനായിരുന്നു പാകിസ്താൻ ശ്രമിച്ചത്. മുംബൈയിലെ കപ്പൽ നിർമ്മാണ കമ്പനി ജീവനക്കാരിയായും ഡൽഹിയിലെ സൈക്കോളജിസ്റ്റായും നടിച്ചാണ് പാക് ചാരന്മാർ പ്രതിരോധ വിവരങ്ങൾ ചോർത്താൻ ശ്രമിച്ചത്.
ഇന്ത്യൻ സുരക്ഷാ വിവരങ്ങൾ ചോർത്താൻ ക്രിപ്‌റ്റോകറൻസിയും ഹവാല പണവും വാഗ്ദാനം ചെയ്ത് വ്യാജ വാട്‌സ്ആപ്പ് അക്കൗണ്ടുകൾ വഴിയായിരുന്നു പാക് ഏജന്റുമാരുടെ നീക്കം. എന്നാൽ ഇന്ത്യയുടെ കൗണ്ടർ ഇന്റലിജൻസ് വിഭാഗവും ആന്റി ടെററിസം സ്‌ക്വാഡും (ATS) ചേർന്ന് കേരളം, ആന്ധ്രാപ്രദേശ്, മഹാരാഷ്ട്ര, കർണാടക, ഗുജറാത്ത്, ഗോവ, ഡൽഹി, തമിഴ്‌നാട്, ഛത്തീസ്ഗഡ്, ബിഹാർ തുടങ്ങി 10 സംസ്ഥാനങ്ങളിൽ ഒരേസമയം നടത്തിയ മിന്നൽ പരിശോധനയിലൂടെ പാക് നീക്കം കൃത്യമായി പൊളിച്ചടുക്കി. 2019-ൽ ‘ഓപ്പറേഷൻ ഡോൾഫിൻസ് നോസ്’ വഴി പാക് ചാരശൃംഖല തകർത്തതുപോലെ, ഭാരതത്തിന്റെ പ്രതിരോധ നിരീക്ഷണ സംവിധാനങ്ങൾ എത്രത്തോളം ശക്തവും സജ്ജവുമാണെന്ന് തെളിയിക്കുന്നതാണ് ഈ പുതിയ വിജയം.
