മുഖ്യ തിരഞ്ഞെടുപ്പ് കമ്മീഷണറെ പുറത്താക്കണമെന്ന് ആവശ്യപ്പെട്ട് ജന്തർ മന്തറിൽ കോക്രോച്ച് ജനതാ പാർട്ടി നടത്താൻ നിശ്ചയിച്ചിരുന്ന പ്രതിഷേധ സമരത്തിന് മുന്നോടിയായി ഡൽഹിയിൽ സുരക്ഷ അതിശക്തമാക്കി. മണ്ഡി ഹൗസ്, ഫിറോസ് ഷാ റോഡ് തുടങ്ങിയ മേഖലകളിൽ റാപ്പിഡ് ആക്ഷൻ ഫോഴ്സിന്റെയും കേന്ദ്ര അർദ്ധസൈനിക വിഭാഗങ്ങളുടെയും നേതൃത്വത്തിൽ കനത്ത സുരക്ഷാ സന്നാഹമാണ് ഏർപ്പെടുത്തിയിരിക്കുന്നത്.
പ്രതിഷേധക്കാരുമായുള്ള സംഘർഷാവസ്ഥ ഒഴിവാക്കാനും സുതാര്യത ഉറപ്പാക്കാനുമായി ഡൽഹി പോലീസ് ഉദ്യോഗസ്ഥർക്ക് രാത്രിയിലും ദൃശ്യങ്ങൾ പകർത്താൻ കഴിയുന്ന ബോഡി ക്യാമറകൾ നൽകിയിട്ടുണ്ട്. ഇതിനുപുറമെ, വനിതാ പോലീസുകാർക്ക് നേതെയുള്ള അതിക്രമങ്ങൾ തടയാൻ വനിതാ സേനയായ ‘പിങ്ക് ഫോഴ്സിനെയും’ പ്രധാന കേന്ദ്രങ്ങളിൽ വിന്യസിച്ചിട്ടുണ്ട്.
പ്രതിഷേധത്തിന്റെ പശ്ചാത്തലത്തിൽ മുപ്പത്തിയഞ്ചായിരത്തിലധികം പോലീസുകാരെയും അർദ്ധസൈനികരെയും ഡൽഹിയിലുടനീളം വിന്യഹിച്ചിട്ടുണ്ടെന്ന് അധികൃതർ വ്യക്തമാക്കി. സുരക്ഷാ മുൻകരുതലുകളുടെ ഭാഗമായി ഡൽഹി മെട്രോയുടെ ചില സ്റ്റേഷനുകളിലെ പ്രവേശന, പുറത്തുകടക്കൽ കവാടങ്ങൾ താൽക്കാലികമായി അടച്ചു. എവിടെയെങ്കിലും പ്രതിഷേധം സംഘടിപ്പിക്കാൻ ശ്രമിക്കുന്നവരെ ഉടൻ കസ്റ്റഡിയിലെടുക്കാൻ പോലീസിന് നിർദ്ദേശം നൽകിയിട്ടുണ്ട്.
ക്രമസമാധാന പാലനത്തിനായി നിയോഗിച്ചിരിക്കുന്ന കേന്ദ്ര അർദ്ധസൈനിക വിഭാഗങ്ങൾക്ക് ആയുധങ്ങൾ നൽകേണ്ടതില്ലെന്നും നിർദ്ദേശമുണ്ട്. അതേസമയം, പോലീസിനെതിരെ വ്യാജ പ്രചാരണങ്ങൾ ലക്ഷ്യമിട്ടുള്ള വീഡിയോകൾ പ്രചരിപ്പിക്കപ്പെടാൻ സാധ്യതയുള്ളതിനാൽ പ്രക്ഷോഭകരുമായി വാക്കുതർക്കങ്ങളിൽ ഏർപ്പെടരുതെന്നും പോലീസ് ഉദ്യോഗസ്ഥർക്ക് കർശന നിർദ്ദേശം നൽകിയിട്ടുണ്ട്.
