ദുബായ്: ഇസ്രായേലിലെ ബെൻ ഗുറിയോൺ അന്താരാഷ്ട്ര വിമാനത്താവളത്തിലെ പാസഞ്ചർ ടെർമിനലിലേക്ക് വിമാനം ഇടിച്ചുകയറ്റി വൻ ഭീകരാക്രമണം നടത്താൻ പദ്ധതിയൊരുക്കിയതായി ഫ്ലൈ ദുബായ് കോ-പൈലറ്റിന്റെ ഞെട്ടിക്കുന്ന വെളിപ്പെടുത്തൽ. കഴിഞ്ഞ സെപ്റ്റംബർ 30-ന് ദുബായിൽ നിന്ന് ടെൽ അവീവിലേക്ക് പറന്ന വിമാനം തട്ടിയെടുക്കാൻ ശ്രമിച്ച ഒമാൻ സ്വദേശിയായ ഫസ്റ്റ് ഓഫീസർ ഹമാം അൽ ഹമ്മാമി (29) ആണ് പിടിയിലായത്. അമേരിക്കയിലെ 9/11 ഭീകരാക്രമണത്തിൽ നിന്ന് പ്രചോദനം ഉൾക്കൊണ്ടാണ് ആക്രമണം നടത്താൻ ലക്ഷ്യമിട്ടതെന്ന് യുഎഇ അറ്റോർണി ജനറൽ ഹമദ് സെയ്ഫ് അൽ ഷംസി വ്യക്തമാക്കി.
വിമാനത്തിലുണ്ടായിരുന്ന 174 യാത്രക്കാരിൽ ഭൂരിഭാഗവും ഇസ്രായേൽ പൗരന്മാരായിരുന്നു. യാത്രക്കിടെ കോക്പിറ്റിലുണ്ടായിരുന്ന ക്യാപ്റ്റൻ സ്മിത് മച്ചാറിനെ കോക്പിറ്റിലെ എമർജൻസി ആക്സ് (കോടാലി) ഉപയോഗിച്ച് ആക്രമിച്ച ശേഷമാണ് ഹമ്മാമി വിമാനം തട്ടിയെടുക്കാൻ ശ്രമിച്ചത്. തുടർന്ന് വിമാനത്തിന്റെ നിയന്ത്രണം ഏറ്റെടുത്ത് മിനിറ്റിൽ പതിനേഴായിരത്തോളം അടി താഴേക്ക് വിമാനം അതിവേഗം പതിപ്പിച്ചു. എന്നാൽ കടുത്ത പരിക്കുകളോടെയും ക്യാപ്റ്റൻ സ്മിത് കോക്പിറ്റിന്റെ വാതിൽ തുറന്നുകൊടുത്തതോടെ, വിമാനത്തിലുണ്ടായിരുന്ന യാത്രക്കാരും ജീവനക്കാരും ചേര്‍ന്ന് സഹപൈലറ്റിനെ ബലമായി കീഴ്പ്പെടുത്തുകയായിരുന്നു. തുടർന്ന് വിമാനം അടിയന്തരമായി സൗദി അറേബ്യയിലെ തബൂക്കിൽ ലാൻഡ് ചെയ്യിച്ചാണ് വൻ ദുരന്തം ഒഴിവാക്കിയത്.
ആക്രമണം നടത്തുന്നതിനായി മുൻകൂട്ടി ആസൂത്രണം നടത്തിയാണ് ഇയാൾ ഫ്ലൈ ദുബായിൽ ജോലിയിൽ പ്രവേശിച്ചതെന്ന് അന്വേഷണ ഏജൻസികൾ കണ്ടെത്തി. ഇതിനായി ഇയാൾ മുൻപ് രണ്ടുതവണ ടെൽ അവീവിലേക്ക് സർവീസ് നടത്തി വിമാനത്താവളത്തിന്റെ ഭൂപടവും വിമാനത്തിന്റെ സഞ്ചാരപാതയും കൃത്യമായി നിരീക്ഷിച്ചിരുന്നു.2017 മുതൽ തീവ്രവാദ ആശയങ്ങളിൽ ആകൃഷ്ടനായ ഇയാൾ ഒറ്റയ്ക്കാണ് ആക്രമണത്തിന് പദ്ധതിയിട്ടതെന്നും നിലവിൽ യുഎഇ അന്വേഷണ ഏജൻസികൾ ഇയാളെ ചോദ്യം ചെയ്തുവരികയാണെന്നും അധികൃതർ കൂട്ടിച്ചേർത്തു.
