ഡൽഹിയിൽ നടന്ന പ്രതിഷേധവുമായി ബന്ധപ്പെട്ട് പൊലീസിന്റെ കസ്റ്റഡിയിലായിരുന്ന സിജെപി നേതാക്കളായ അഭിജീത് ദിപ്കെ, സൗരവ് ദാസ്, അശുതോഷ് രംഗ എന്നിവരെ എക്സിക്യൂട്ടീവ് മജിസ്‌ട്രേറ്റിന് മുന്നിൽ ഹാജരാക്കിയ ശേഷം വിട്ടയച്ചു. അറസ്റ്റ് രേഖപ്പെടുത്തിയ ശേഷമാണ് 24 മണിക്കൂർ നീണ്ട കസ്റ്റഡിക്കൊടുവിൽ കർശന ജാമ്യവ്യവസ്ഥകളോടെ ഇവരെ മോചിപ്പിച്ചത്.
ഒരു വർഷത്തേക്ക് സമാധാന അന്തരീക്ഷം തകർക്കുന്ന യാതൊരുവിധ പ്രവർത്തനങ്ങളിലും ഏർപ്പെടരുതെന്ന നിബന്ധനയിലാണ് ജാമ്യം അനുവദിച്ചിരിക്കുന്നത്. അതേസമയം ഗുരുഗ്രാമിൽ നിന്ന് കസ്റ്റഡിയിലെടുത്ത പ്രമുഖ യൂട്യൂബർ ധ്രുവ് റാഠിയെയും പൊലീസ് മോചിപ്പിച്ചിട്ടുണ്ട്. ഇനിവരുന്ന പ്രതിഷേധങ്ങളിൽ പങ്കെടുത്താൽ ശക്തമായ നിയമനടപടി നേരിടേണ്ടിവരുമെന്ന മുന്നറിയിപ്പോടെയാണ് ധ്രുവിനെ വിട്ടയച്ചത്.
മോചനത്തിന് പിന്നാലെ പൊലീസിന് തങ്ങളെ വിട്ടയക്കേണ്ടി വന്നതാണെന്നും ‘കോക്രോച്ചുകൾ ഒരിക്കലും മരിക്കില്ലെ’ന്നും സിജെപി സോഷ്യൽ മീഡിയയിലൂടെ പ്രതികരിച്ചു. ഇന്നലത്തെ സമരവുമായി ബന്ധപ്പെട്ട് നിയമം കയ്യിലെടുക്കൽ, ഔദ്യോഗിക കൃത്യനിർവഹണം തടസ്സപ്പെടുത്തൽ, പൊലീസിന് നേരെ ആക്രമണം നടത്തൽ തുടങ്ങിയ ഗുരുതര വകുപ്പുകൾ ചുമത്തി ഡൽഹി പൊലീസ് ഇതിനോടകം 20 എഫ്‌ഐആറുകൾ രജിസ്റ്റർ ചെയ്തിട്ടുണ്ട്. ഉച്ചയ്ക്ക് ശേഷം മാധ്യമങ്ങളെ കണ്ട് തുടർ സമരപരിപാടികൾ പ്രഖ്യാപിക്കുമെന്ന് സിജെപി നേതാവ് അശുതോഷ് രംഗ പറഞ്ഞു.
