ഭാവിയെ വിറപ്പിക്കുന്ന സൈനികശക്തി എന്നത് ഒരു രാജ്യം കൈവശം വെച്ചിരിക്കുന്ന ആയുധങ്ങളുടെയോ പ്ലാറ്റ്‌ഫോമുകളുടെയോ എണ്ണത്തിലല്ല, മറിച്ച് വിവരങ്ങൾ വേഗത്തിൽ മനസ്സിലാക്കുന്നതിലും ഉചിതമായ തീരുമാനങ്ങളെടുത്ത് അത് നടപ്പിലാക്കുന്നതിലുമാണെന്ന് കേന്ദ്ര പ്രതിരോധ മന്ത്രി രാജ്‌നാഥ് സിംഗ്. ഡൽഹിയിൽ നടന്ന നരേന്ദ്ര മോഹൻ സ്മാരക പ്രഭാഷണത്തിലും തുടർന്ന് ജോധ്പൂർ എയർഫോഴ്‌സ് സ്റ്റേഷനിൽ നടന്ന തരംഗ് ശക്തി-2026 സംയുക്ത വ്യോമസേനാ അഭ്യാസത്തിലെ പ്രതിനിധികളെ അഭിസംബോധന ചെയ്തും സംസാരിക്കുകയായിരുന്നു അദ്ദേഹം.
പ്രതിരോധ സാങ്കേതികവിദ്യയിലെ ആത്മനിർഭരതയും വിശ്വസ്ത രാജ്യങ്ങളുമായുള്ള ശക്തമായ പങ്കാളിത്തവും ഭാവിയിലെ വെല്ലുവിളികളെ നേരിടാൻ അത്യാവശ്യമാണെന്ന് അദ്ദേഹം ഓർമ്മിപ്പിച്ചു. പരമ്പരാഗത കര-നാവിക-വ്യോമ മേഖലകൾക്കപ്പുറം ബഹിരാകാശം, സൈബർ, ഇലക്ട്രോണിക് വാർഫെയർ, വിവര സാങ്കേതിക മേഖലകളിലേക്ക് ആധുനിക യുദ്ധങ്ങൾ വ്യാപിച്ച് കഴിഞ്ഞതായും ഡ്രോണുകൾ, ആർട്ടിഫിഷ്യൽ ഇന്റലിജൻസ്, കൃത്യതയുള്ള ദീർഘദൂര ആയുധങ്ങൾ എന്നിവ സൈനിക പ്രവർത്തനങ്ങളുടെ ദിശ മാറ്റുകയാണെന്നും അദ്ദേഹം ചൂണ്ടിക്കാട്ടി.
പ്രതിരോധ മേഖലയിലെ സ്വാശ്രയത്വം എന്നാൽ ഒറ്റപ്പെട്ടു ജീവിക്കുക എന്നല്ല അർത്ഥമാക്കുന്നത്, മറിച്ച് നിർണായക സാങ്കേതികവിദ്യകൾ രാജ്യത്തിനുള്ളിൽ തന്നെ രൂപകൽപ്പന ചെയ്യാനും നിർമ്മിക്കാനും പരിപാലിക്കാനുമുള്ള ശേഷിയാണെന്ന് പ്രതിരോധ മന്ത്രി പറഞ്ഞു. ഇന്ത്യ സ്വന്തമായി വികസിപ്പിച്ചെടുത്ത തേജസ് യുദ്ധവിമാനം, ധ്രുവ്, രുദ്ര, പ്രചണ്ഡ്, ലൈറ്റ് യൂട്ടിലിറ്റി ഹെലികോപ്റ്ററുകൾ, ആകാശ് എയർ ഡിഫൻസ് സിസ്റ്റം എന്നിവ രാജ്യത്തിന്റെ തദ്ദേശീയ ശേഷിക്ക് തെളിവാണെന്ന് അദ്ദേഹം എടുത്തുപറഞ്ഞു.
അഞ്ചാം തലമുറ സ്റ്റെൽത്ത് ഫൈറ്റർ സാങ്കേതികവിദ്യ കൈവരിക്കുന്നതിനുള്ള സുപ്രധാന നാഴികക്കല്ലാണ് അഡ്വാൻസ്ഡ് മീഡിയം കോംബാറ്റ് എയർക്രാഫ്റ്റ് (AMCA) പദ്ധതി. ഭാവിയിലെ പ്രതിരോധ ബന്ധങ്ങൾ വെറും ആയുധക്കച്ചവടത്തിനപ്പുറം സാങ്കേതികവിദ്യയിലും പരസ്പര വിശ്വാസത്തിലും അധിഷ്ഠിതമായിരിക്കും. സെപ്റ്റംബർ 26 മുതൽ ഒക്ടോബർ 12 വരെ നടക്കുന്ന തരംഗ് ശക്തി അഭ്യാസത്തിൽ പങ്കെടുത്ത എട്ട് രാജ്യങ്ങളിലെയും 32 നിരീക്ഷണ രാജ്യങ്ങളിലെയും വ്യോമസേനകൾക്ക് അനുഭവം പങ്കുവെക്കാനും സഹകരണം ഉറപ്പാക്കാനും വലിയ അവസരമാണ് ലഭിച്ചതെന്നും രാജ്‌നാഥ് സിംഗ് കൂട്ടിച്ചേർത്തു.
