ഡൽഹിയിൽ പ്രതിഷേധങ്ങൾക്കും ധർണകൾക്കുമായി മൂന്ന് പുതിയ ഔദ്യോഗിക വേദികൾ നിശ്ചയിച്ച് ഡൽഹി പോലീസ്. പ്രധാനമന്ത്രിയുടെ വസതിക്കും പാർലമെന്റിനും തൊട്ടടുത്തുള്ള ജന്ദർ മന്ദറിനെ ഔദ്യോഗിക സമരവേദികളുടെ പട്ടികയിൽ നിന്ന് ഒഴിവാക്കി ഡൽഹി പോലീസ് ഉത്തരവിറക്കി. കേന്ദ്ര ആഭ്യന്തര മന്ത്രാലയം രൂപീകരിച്ച പ്രത്യേക ഉന്നതതല സമിതിയുടെ കൃത്യമായ നിരീക്ഷണങ്ങളുടെയും നിർദ്ദേശങ്ങളുടെയും അടിസ്ഥാനത്തിലാണ് തലസ്ഥാന നഗരിയുടെ സുരക്ഷ മുൻനിർത്തിയുള്ള ഈ നിർണായക തീരുമാനം.
ദേശീയ തലസ്ഥാനത്തെ അതീവ സുരക്ഷാ മേഖലയിൽ രാഷ്ട്രീയ നാടകങ്ങളും വഴിയോര തടസ്സങ്ങളും സൃഷ്ടിച്ച് ചാനൽ ക്യാമറകൾക്ക് മുന്നിൽ പ്രഹസനം നടത്താൻ ശ്രമിക്കുന്നവർക്ക് കനത്ത പ്രഹരമാണ് ഈ തീരുമാനം. വെറും അഞ്ഞൂറോ ആയിരമോ ആളുകളെ കൂട്ടിയിട്ട് ജന്ദർ മന്ദറിലെ ഇടുങ്ങിയ റോഡുകളിൽ വലിയ ജനസഞ്ചയമാണെന്ന വ്യാജ പ്രതീതി സൃഷ്ടിക്കുന്നവർക്കാണ് ഈ തീരുമാനത്തോടെ പണി കിട്ടിയിരിക്കുന്നത്. ഇടുങ്ങിയ തെരുവുകളായതിനാൽ പോലീസ് ഒഴിപ്പിക്കാൻ ശ്രമിക്കുമ്പോൾ തിക്കും തിരക്കുമുണ്ടാക്കി അനാവശ്യ ക്രമസമാധാന പ്രശ്നങ്ങൾ സൃഷ്ടിക്കുക എന്നതായിരുന്നു ഇവരുടെ സ്ഥിരം തന്ത്രം. പാർലമെന്റിലേക്ക് വെറും രണ്ട് കിലോമീറ്റർ മാത്രം ദൂരമുള്ള ഇവിടെ സമരം ചെയ്ത് പബ്ലിസിറ്റി നേടാനുള്ള സാധ്യതകളാണ് ഇതോടെ അടഞ്ഞത്. ഇനി മുതൽ സമരം നടത്തണമെങ്കിൽ അഞ്ച് കിലോമീറ്റർ അകലെയുള്ള രാം ലീല മൈതാനത്തോ 15 കിലോമീറ്റർ അകലെയുള്ള ബുരാരി ഗ്രൗണ്ടിലോ സിബിഡി ഗ്രൗണ്ടിലോ പോകേണ്ടി വരും.
രാം ലീല മൈതാനം പോലെയുള്ള വലിയ ഗ്രൗണ്ടുകളിൽ 500 പേരെ നിർത്തിയാൽ അത് ക്യാമറയിൽ പോലും കാണില്ലെന്നതാണ് പ്രക്ഷോഭകരെ അസ്വസ്ഥരാക്കുന്നത്. മാത്രവുമല്ല, രാം ലീല മൈതാനം നിലവിൽ നവരാത്രി ആഘോഷങ്ങൾക്കായി ബുക്ക് ചെയ്തിരിക്കുന്നതിനാൽ ഇനി അടുത്ത ഒരു മാസത്തേക്ക് 15 കിലോമീറ്റർ ദൂരെയുള്ള ബുരാരി ഗ്രൗണ്ടിൽ പോയി കിടക്കേണ്ടി വരും. തലസ്ഥാനത്ത് ചാനൽ ക്യാമറകൾക്ക് മുന്നിൽ വീരവാദം പറഞ്ഞ് ജനങ്ങളെ ബുദ്ധിമുട്ടിച്ച പ്രതിപക്ഷത്തിന് ദേശീയ സുരക്ഷ ഉയർത്തിപ്പിടിച്ചുള്ള ഈ തീരുമാനം വൻ തിരിച്ചടിയായി മാറി കഴിഞ്ഞു.
