മൈതാനത്തിലെ വീര്യവും ആവേശവും നിറഞ്ഞ പ്രകടനത്തിന് പേരുകേട്ട വിരാട് കോഹ്‌ലിയുടെ തികച്ചും വ്യത്യസ്തമായ മറ്റൊരു മുഖത്തെക്കുറിച്ച് വെളിപ്പെടുത്തി പാകിസ്ഥാൻ ഓൾറൗണ്ടർ ഷദാബ് ഖാൻ. ‘ബിയർഡ് ബിഫോർ വിക്കറ്റ്’ എന്ന ടോക്ക് ഷോയിൽ സംസാരിക്കവേയാണ് താരം കോഹ്‌ലിയുമായുള്ള ആദ്യ കൂടിക്കാഴ്ചയെക്കുറിച്ചും ഇരുവർക്കുമിടയിലെ അടുപ്പത്തെക്കുറിച്ചും മനസ്സുതുറന്നത്.
ടിവിയിൽ കാണുന്ന രോഷാകുലനായ കളിക്കാരനിൽ നിന്ന് തികച്ചും വ്യത്യസ്തമായ, സൗഹൃദപരമായ പെരുമാറ്റമാണ് നേരിട്ട് കണ്ടപ്പോൾ കോഹ്‌ലിയിൽ നിന്ന് അനുഭവപ്പെട്ടതെന്ന് ഷദാബ് പറഞ്ഞു. മൈതാനത്തെ തീക്ഷ്ണമായ പോരാട്ടവീര്യം കണ്ട പരിചയമുള്ള തനിക്ക്, കളിയിലെ ഇതിഹാസമായ ഒരു താരം നൽകിയ ഊഷ്മളമായ സ്വീകരണം വലിയ അത്ഭുതമായിരുന്നുവെന്ന് അദ്ദേഹം കൂട്ടിച്ചേർത്തു.
ഇരുവരും തമ്മിലുള്ള സംഭാഷണങ്ങളിലെ മറ്റൊരു കൗതുകകരമായ കാര്യവും ഷദാബ് വെളിപ്പെടുത്തി. ആദ്യമായി കണ്ടുമുട്ടിയപ്പോൾ തനിക്ക് പഞ്ചാബി ഭാഷ അറിയാമോ എന്ന് കോഹ്‌ലി ചോദിച്ചുവെന്നും, അറിയാമെന്ന് പറഞ്ഞത് മുതൽ പിന്നീട് കാണുമ്പോഴെല്ലാം കോഹ്‌ലി തന്നോട് സംസാരിക്കുന്നത് പഞ്ചാബിയിലാണെന്നും ഷദാബ് പറഞ്ഞു. ഇന്ത്യ-പാകിസ്ഥാൻ ചിരവൈരികളുടെ പോരാട്ടത്തിന്റെ പിരിമുറുക്കങ്ങൾക്കപ്പുറം ഇരു രാജ്യങ്ങളിലെയും താരങ്ങൾ തമ്മിലുള്ള നല്ല ബന്ധത്തിന്റെ ഉദാഹരണമായി ഈ സംഭവം മാറിയിരിക്കുകയാണ്.
