ലോക്‌സഭാ പ്രതിപക്ഷ നേതാവ് രാഹുൽ ഗാന്ധിക്കെതിരെയും കോൺഗ്രസ് പാർട്ടിക്ക് നേതൃത്വം നൽകുന്ന ശൈലിക്കെതിരെയും രൂക്ഷമായ വിമർശനവുമായി ഉത്തർപ്രദേശ് മുഖ്യമന്ത്രി യോഗി ആദിത്യനാഥ് രംഗത്തെത്തി. അവിശ്വാസം മാത്രം വളർത്തുന്ന ഇത്തരം നേതൃത്വത്തിൽ നിന്ന് കോൺഗ്രസ് എത്രയും വേഗം മുക്തി നേടണമെന്ന് അദ്ദേഹം ആവശ്യപ്പെട്ടു. ഡൽഹിയിൽ ഇൻഡി സഖ്യം നടത്തുന്ന പ്രതിഷേധങ്ങൾ പൊതുജനങ്ങൾക്ക് വലിയ ബുദ്ധിമുട്ടുകൾ ഉണ്ടാക്കുന്നുണ്ടെന്നും രാജ്യത്ത് അരാജകത്വം സൃഷ്ടിക്കാനാണ് പ്രതിപക്ഷം ശ്രമിക്കുന്നതെന്നും അദ്ദേഹം ആരോപിച്ചു.
തിരഞ്ഞെടുപ്പ് കമ്മീഷനെയും ഭരണഘടനാ സ്ഥാപനങ്ങളെയും പ്രതിപക്ഷം നിരന്തരം സംശയ നിഴലിൽ നിർത്തുകയാണെന്ന് യോഗി ആദിത്യനാഥ് പറഞ്ഞു. തിരഞ്ഞെടുപ്പുകളിൽ വിജയിക്കുമ്പോൾ അത് സ്വന്തം കഴിവായി കാണുന്ന കോൺഗ്രസ്, തോൽക്കുമ്പോൾ വോട്ടിംഗ് മെഷീനുകളെയും തിരഞ്ഞെടുപ്പ് കമ്മീഷനെയും കുറ്റപ്പെടുത്തുന്നത് പതിവാക്കിയിരിക്കുകയാണ്. വോട്ട് മോഷണം ആരോപിച്ചുള്ള പ്രതിപക്ഷത്തിന്റെ നീക്കങ്ങൾ കേവലം രാഷ്ട്രീയ ലാഭത്തിനു വേണ്ടിയുള്ള നാടകമാണെന്നും രാജ്യത്തെ ജനങ്ങൾ ഇതിനകം തന്നെ ഇത് തിരിച്ചറിഞ്ഞിട്ടുണ്ടെന്നും അദ്ദേഹം കൂട്ടിച്ചേർത്തു.
രാജ്യത്തിന്റെ ജനാധിപത്യ മൂല്യങ്ങളെ തകർത്തുകൊണ്ട് വികസന പാത തടസ്സപ്പെടുത്താനാണ് കോൺഗ്രസ് നേതൃത്വം ശ്രമിക്കുന്നത്. ഭരണഘടനയെയും രാജ്യത്തിന്റെ പാരമ്പര്യത്തെയും അപമാനിക്കുന്ന നിലപാടുകൾ നിർത്തിവച്ച് ഉത്തരവാദിത്തമുള്ള പ്രതിപക്ഷമായി പ്രവർത്തിക്കാൻ നേതാക്കൾ തയ്യാറാകണം. സ്വന്തം പരാജയങ്ങൾ മറച്ചുവെക്കാൻ ഭരണഘടനാ സ്ഥാപനങ്ങൾക്ക് നേരെ ചോദ്യങ്ങൾ ഉന്നയിക്കുന്ന രാഹുൽ ഗാന്ധിയുടെ ശൈലി രാജ്യത്തിന് ഒട്ടും അനുയോജ്യമല്ലെന്നും യോഗി ആദിത്യനാഥ് വ്യക്തമാക്കി.
