‘വോട്ട് ചോരി’ ആരോപണങ്ങൾക്കെതിരെ സുപ്രീം കോടതിയിൽ ഹർജി സമർപ്പിക്കുന്നതിനും വോട്ടർ പട്ടികയുടെ പ്രത്യേക തീവ്രമായ പരിഷ്കരണം (SIR) താൽക്കാലികമായി നിർത്തുന്നതിനുമായി ഇൻഡി സഖ്യ നേതാക്കൾ സുപ്രീം കോടതിയിലേക്ക് പ്രഖ്യാപിച്ച മാർച്ചിന് ഡൽഹിയിൽ ആരംഭമായി. “ചലോ ഡൽഹി – ജനാധിപത്യത്തിനായുള്ള മാർച്ച്” എന്ന സന്ദേശവുമായി രാഹുൽ ഗാന്ധിയുടെയും മല്ലികാർജുൻ ഖാർഗെയുടെയും നേതൃത്വത്തിലാണ് പ്രതിപക്ഷ നേതാക്കളും പ്രവർത്തകരും സുപ്രീം കോടതി ലക്ഷ്യമാക്കി നീങ്ങുന്നത്. വോട്ട് കവർച്ച ആരോപണങ്ങളിൽ ചീഫ് ഇലക്ഷൻ കമ്മീഷണർ ജ്ഞാനേഷ് കുമാർ രാജി വെക്കണമെന്ന ആവശ്യമാണ് പ്രതിപക്ഷം ഉന്നയിക്കുന്നത്. വിഷയത്തിൽ സുപ്രീം കോടതിയിൽ ഹർജി സമർപ്പിക്കാനാണ് നേതാക്കളുടെ നീക്കം.
നേരത്തെ ചീഫ് ജസ്റ്റിസ് സൂര്യ കാന്തുമായി കൂടിക്കാഴ്ച നടത്താൻ പ്രതിപക്ഷ നേതാക്കൾ അനുമതി തേടിയിരുന്നെങ്കിലും കേസ് നിലവിൽ കോടതിയുടെ പരിഗണനയിലുള്ളതിനാൽ കൂടിക്കാഴ്ച സാധ്യമല്ലെന്ന് അദ്ദേഹം വ്യക്തമാക്കുകയായിരുന്നു. എന്നാൽ പ്രതിപക്ഷ നേതാക്കളുടെ സംഘത്തിന് കോടതി വളപ്പിൽ പ്രവേശിച്ച് രജിസ്ട്രിയിൽ ഹർജി ഫയൽ ചെയ്യുന്നതിന് അനുമതി നൽകിയിട്ടുണ്ട്. ഈ പ്രതിഷേധത്തിൽ മമതാ ബാനർജി, രേവന്ത് റെഡ്ഡി തുടങ്ങിയ പ്രമുഖ നേതാക്കളും പങ്കാളികളായി പ്രതിപക്ഷ ഐക്യം പ്രഖ്യാപിച്ചു. തിരഞ്ഞെടുപ്പ് സംവിധാനത്തിലെ സുതാര്യത ഉറപ്പാക്കുകയും ഭരണഘടന തത്വങ്ങൾ സംരക്ഷിക്കുകയുമാണ് തങ്ങളുടെ പ്രധാന ലക്ഷ്യമെന്ന് രാഹുൽ ഗാന്ധി വ്യക്തമാക്കി.
പ്രതിഷേധ മാർച്ചിന്റെ പശ്ചാത്തലത്തിൽ ഡൽഹി നഗരത്തിൽ സുരക്ഷാ ക്രമീകരണങ്ങൾ ശക്തമാക്കിയിട്ടുണ്ട്. സുപ്രീം കോടതിക്ക് ചുറ്റും കനത്ത പോലീസ്, പാരാമിലിട്ടറി സേനകളെ വിന്യസിക്കുകയും വലിയ ബാരിക്കേഡുകൾ ഉയർത്തുകയും ചെയ്തു. സുരക്ഷ മുൻനിർത്തി രാജീവ് ചൗക്ക്, മാണ്ഡി ഹൗസ്, പട്ടേൽ ചൗക്ക് ഉൾപ്പെടെയുള്ള പ്രമുഖ മെട്രോ സ്റ്റേഷനുകളിൽ താൽക്കാലിക നിയന്ത്രണങ്ങൾ ഏർപ്പെടുത്തിയിട്ടുണ്ട്. സോഷ്യൽ മീഡിയ വഴി തെറ്റായ വിവര പ്രചരണം തടയാൻ പോലീസിന്റെ പ്രത്യേക നിരീക്ഷണവും നടക്കുന്നുണ്ട്. വരും ദിവസങ്ങളിലും ഈ വിഷയത്തിൽ നിയമപരമായും രാഷ്ട്രീയമായും പ്രക്ഷോഭം തുടരാനാണ് ഇൻഡി സഖ്യത്തിന്റെ തീരുമാനം.
