ഇസ്ലാമാബാദ്: പാകിസ്ഥാൻ പ്രധാനമന്ത്രി ഷെഹ്ബാസ് ഷെരീഫിന്റെ നേതൃത്വത്തിലുള്ള ഭരണകൂടം ജനകീയ പിന്തുണയില്ലാത്ത വ്യാജ സർക്കാരാണെന്നും, സൈന്യത്തിന്റെ താളത്തിനൊത്ത് തുള്ളുന്ന അധികാരമില്ലാത്ത ഭരണാധികാരികളാണ് നാടുവാഴുന്നതെന്നും തുറന്നടിച്ച് പ്രതിപക്ഷ നേതാവും ജമിയത്ത് ഉലമ-ഇ-ഇസ്ലാം (JUI-F) അധ്യക്ഷനുമായ മൗലാന ഫസൽ ഉർ റഹ്മാൻ. ഭരണഘടനയുടെ പരിധികൾ ലംഘിച്ച് എല്ലാ അധികാരങ്ങളും സ്വന്തം ചുമലിലേക്ക് മാറ്റുന്ന സൈനിക നേതൃത്വം അതിവേഗം ആ ഭാരത്തിന് താഴെ അമർന്ന് തകരുമെന്ന് മൾട്ടാനിൽ സംഘടിപ്പിച്ച വൻ പൊതുസമ്മേളനത്തെ അഭിസംബോധന ചെയ്തുകൊണ്ട് റഹ്മാൻ മുന്നറിയിപ്പ് നൽകി.
ഖൈബർ പഖ്തുൻഖ്വ പ്രവിശ്യയിലെ ഇമ്രാൻ ഖാന്റെ പാകിസ്ഥാൻ തെഹ്രീകെ ഇൻസാഫ് (PTI) സർക്കാരിനെ പുറത്താക്കി ഒക്ടോബർ 11-ന് പ്രസിഡന്റ് ആസിഫ് അലി സർദാരി അടിയന്തരാവസ്ഥയും ഗവർണർ ഭരണവും ഏർപ്പെടുത്തിയ പശ്ചാത്തലത്തിലാണ് ഈ രാഷ്ട്രീയ കൊടുങ്കാറ്റ്. ജനാധിപത്യത്തെയും പാർലമെന്ററി മൂല്യങ്ങളെയും തകിടം മറിക്കുന്ന നീക്കങ്ങളാണ് സൈന്യവും ഇപ്പോഴത്തെ ഷെഹ്ബാസ് ഷെരീഫ് സർക്കാരും നടത്തുന്നതെന്ന് അദ്ദേഹം ആരോപിച്ചു. രാജ്യത്ത് സൈന്യവും ബ്യൂറോക്രസിയും ജനങ്ങൾ തിരഞ്ഞെടുത്ത സർക്കാരും അവരവരുടെ ഭരണഘടനാപരമായ അതിരുകൾക്കുള്ളിൽ നിന്ന് പ്രവർത്തിച്ചാൽ മാത്രമേ പാകിസ്ഥാന് മുന്നോട്ടുപോകാൻ സാധിക്കൂ എന്ന് ഫസൽ ഉർ റഹ്മാൻ കൂട്ടിച്ചേർത്തു.
അടിയന്തരാവസ്ഥ പ്രഖ്യാപനത്തിന് പിന്നിൽ പ്രവർത്തിച്ച പ്രസിഡന്റ് ആസിഫ് അലി സർദാരിയെയും പിപിപിയെയും കടുത്ത ഭാഷയിലാണ് റഹ്മാൻ വിമർശിച്ചത്. എന്നാൽ, മൗലാന ഫസൽ ഉർ റഹ്മാന്റെ പ്രസംഗത്തിനെതിരെ പഞ്ചാബ് മുഖ്യമന്ത്രി മറിയം നവാസ് അതിരൂക്ഷമായ പ്രതികരണവുമായി രംഗത്തെത്തി. പാക് കരസേനാ മേധാവി ഫീൽഡ് മാർഷൽ ജനറൽ ആസിം മുനീറിനെതിരെ നടത്തുന്ന ഇത്തരം പ്രസ്താവനകൾ ഓരോ ദേശസ്നേഹിയായ പാകിസ്ഥാനിയുടെയും വികാരത്തെ മുറിവേൽപ്പിക്കുന്നതാണെന്നും ഖൈബർ പഖ്തുൻഖ്വയിലെ ഭരണപരാജയത്തെ ചോദ്യം ചെയ്യുന്നതിന് പകരം അഴിമതിക്കാരെ പിന്തുണയ്ക്കുന്ന സമീപനമാണ് പ്രതിപക്ഷം സ്വീകരിക്കുന്നതെന്നും മറിയം നവാസ് കുറ്റപ്പെടുത്തി. അടിയന്തരാവസ്ഥയ്ക്ക് പിന്നാലെ ഭരണപക്ഷവും പ്രതിപക്ഷവും തമ്മിലുള്ള പോര് കടുത്തതോടെ പാകിസ്ഥാൻ വൻ രാഷ്ട്രീയ പ്രതിസന്ധിയിലേക്കാണ് നീങ്ങുന്നത്.
