റിയാദ്: യമനിലെ ഹൂതി വിമതരുടെ ഡ്രോൺ-മിസൈൽ ആക്രമണങ്ങൾ ശക്തമായ പശ്ചാത്തലത്തിൽ സൗദി അറേബ്യയിലുള്ള ഇന്ത്യൻ പൗരന്മാർക്ക് ജാഗ്രതാ നിർദേശവുമായി റിയാദിലെ ഇന്ത്യൻ എംബസി. സൗദി സുരക്ഷാ വിഭാഗവും പ്രാദേശിക ഭരണകൂടവും പുറപ്പെടുവിച്ച അടിയന്തര സുരക്ഷാ മാനദണ്ഡങ്ങൾ കർശനമായി പാലിക്കണമെന്ന് ഞായറാഴ്ച പുറത്തിറക്കിയ വാർത്താക്കുറിപ്പിൽ എംബസി നിർദേശിച്ചു.
ആക്രമണ ഭീഷണിയോ മുന്നറിയിപ്പുകളോ ഉണ്ടാകുമ്പോൾ കെട്ടിടങ്ങൾക്കും വീടുകൾക്കും പുറത്തിറങ്ങരുതെന്നും അപകടസാധ്യത പൂർണ്ണമായും മാറുന്നതുവരെ തുറസ്സായ സ്ഥലങ്ങളിൽ നിൽക്കരുതെന്നും നിർദേശത്തിൽ പറയുന്നു. വീടുകളുടെയും കെട്ടിടങ്ങളുടെയും ബാൽക്കണികളിലോ ടെറസിലോ നിൽക്കരുത്. ജനലുകൾ, ഗ്ലാസ് ചുവരുകൾ എന്നിവയിൽ നിന്ന് വിട്ടുനിൽക്കാനും കെട്ടിടങ്ങൾക്കുള്ളിലെ ഏറ്റവും സുരക്ഷിതമായ ഉൾമുറികളിലേക്ക് (Interior Rooms) മാറാനും എംബസി ആവശ്യപ്പെട്ടു.
ആക്രമണ സമയത്ത് പുറത്തുള്ളവർ തൊട്ടടുത്തുള്ള ഉറപ്പുള്ള കെട്ടിടങ്ങളിലോ സുരക്ഷിത തണലുകളിലോ അഭയം തേടണം. ആളുകൾ കൂട്ടംകൂടി നിൽക്കുന്നതും അപകട സാധ്യതയുള്ള പ്രദേശങ്ങളും പൂർണ്ണമായും ഒഴിവാക്കണം. ഡ്രൈവ് ചെയ്യുമ്പോഴാണ് എമർജൻസി അലേർട്ടുകൾ ലഭിക്കുന്നതെങ്കിൽ വാഹനം റോഡിന്റെ വശങ്ങളിലേക്ക് ഒതുക്കി നിർത്തണം. പാലങ്ങൾക്ക് താഴെയോ വൻകിട ബഹുനില കെട്ടിടങ്ങൾക്ക് സമീപത്തോ വാഹനം നിർത്തരുത്. കൂടാതെ, ആക്രമണ ദൃശ്യങ്ങളോ ചിത്രങ്ങളോ പകർത്തുന്നതും സോഷ്യൽ മീഡിയയിൽ പ്രചരിപ്പിക്കുന്നതും പൂർണ്ണമായി ഒഴിവാക്കണമെന്നും സുരക്ഷാ ഏജൻസികളുടെ നിർദേശങ്ങൾ ഔദ്യോഗിക ചാനലുകളിലൂടെ മാത്രം പിന്തുടരണമെന്നും എംബസി വ്യക്തമാക്കി.
ഒക്ടോബർ 10-ന് റിയാദിലെ കിംഗ് ഖാലിദ് അന്താരാഷ്ട്ര വിമാനത്താവളത്തിന് നേരെ ഹൂതികൾ നടത്തിയ മാരകമായ മിസൈൽ ആക്രമണത്തിൽ ഒരു ഇന്ത്യൻ പൗരൻ കൊല്ലപ്പെടുകയും നിരവധി പേർക്ക് പരിക്കേൽക്കുകയും ചെയ്തിരുന്നു. ഇതിനു പിന്നാലെയാണ് സൗദിയിലുള്ള ലക്ഷക്കണക്കിന് പ്രവാസികളായ ഇന്ത്യൻ പൗരന്മാരുടെ സുരക്ഷ മുൻനിർത്തി എംബസി വീണ്ടും അടിയന്തര സുരക്ഷാ നിർദേശങ്ങൾ പുറപ്പെടുവിച്ചത്.
ഏതെങ്കിലും തരത്തിലുള്ള അപകട സാഹചര്യങ്ങളോ സഹായമോ ഉണ്ടായാൽ മക്ക, മദീന, റിയാദ്, കിഴക്കൻ പ്രവിശ്യ (Eastern Province) എന്നിവിടങ്ങളിലുള്ളവർക്ക് 911 എന്ന നമ്പറിലും, സൗദിയിലെ മറ്റ് പ്രദേശങ്ങളിലുള്ളവർക്ക് 998 എന്ന നമ്പറിലും അടിയന്തര സേവനങ്ങളെ ബന്ധപ്പെടാവുന്നതാണെന്ന് നിർദേശത്തിൽ വ്യക്തമാക്കുന്നു. കൂടാതെ റിയാദിലെ ഇന്ത്യൻ എംബസിയുടെയും ജിദ്ദ കോൺസുലേറ്റിന്റെയും 24 മണിക്കൂറും പ്രവർത്തിക്കുന്ന ഹെൽപ്പ് ലൈൻ നമ്പറുകളിലും പ്രവാസികൾക്ക് ബന്ധപ്പെടാം.
