ലാഹോർ: അമേരിക്കൻ വിദേശകാര്യ വകുപ്പും ട്രഷറിയും ആഗോള ഭീകരനായി പ്രഖ്യാപിച്ച പാകിസ്താൻ മാർക്കസി മുസ്ലിം ലീഗ് (പി.എം.എം.എൽ) നേതാവ് മഹമ്മൂദ് സർവാർ ലാഹോറിൽ മരിച്ചു. മുംബൈ ഭീകരാക്രമണത്തിന്റെ സൂത്രധാരൻ ഹാഫിസ് സയീദിന്റെ ജമാഅത്ത് ഉദ്ധവയുടെ (JuD) രാഷ്ട്രീയ വിഭാഗമാണ് പാകിസ്താൻ മാർക്കസി മുസ്ലിം ലീഗ്. ഞായറാഴ്ച വീടിനുള്ളിൽ ഏണിപ്പടിയിൽ നിന്ന് വഴുതി വീണ് തലയ്ക്കേറ്റ കടുത്ത പരിക്കാണ് മരണകാരണമെന്നാണ് പാകിസ്താൻ പ്രാദേശിക മാധ്യമങ്ങൾ റിപ്പോർട്ട് ചെയ്യുന്നത്.
വീട്ടിൽ നിന്ന് പള്ളിയിലേക്ക് നമസ്കാരത്തിനായി പോകുന്നതിനിടെയാണ് സർവാർ കുഴഞ്ഞുവീണതെന്നാണ് പി.എം.എം.എൽ വക്താവ് ഔദ്യോഗികമായി അറിയിച്ചത്. എന്നാൽ 24NewsHD ടിവി ചാനൽ ഉൾപ്പെടെയുള്ള പ്രാദേശിക മാധ്യമങ്ങൾ ഇയാൾ കോണിപ്പടിയിൽ നിന്നും തലകീഴായി വീഴുകയായിരുന്നുവെന്ന് വെളിപ്പെടുത്തി. ജമാഅത്ത് ഉദ്ധവയുടെ ഭീകരപ്രവർത്തനങ്ങൾക്ക് സാമ്പത്തിക സഹായമെത്തിക്കൽ, ആയുധക്കടത്ത്, ഇന്ത്യക്കെതിരെ വിദ്വേഷ പ്രചാരണം തുടങ്ങിയ കുറ്റങ്ങൾ ചുമത്തിയാണ് അമേരിക്ക സർവാറിനെ ആഗോള ഭീകരരുടെ പട്ടികയിൽ ഉൾപ്പെടുത്തിയിരുന്നത്.
2019 മുതൽ ലാഹോറിലെ കോട്ട് ലഖ്പത് ജയിലിൽ വിവിധ ഭീകരവിരുദ്ധ കേസുകളിൽ ശിക്ഷ അനുഭവിക്കുന്ന ഹാഫിസ് സയീദിന്റെ അടുത്ത അനുയായി കൂടിയായിരുന്നു സർവാർ. ഇയാളുടെ മരണത്തിൽ ഖാലിദ് മസൂദ് സിന്ധു, സൈഫുള്ള ഖസൂരി, ഹാഫിസ് തൽഹ സയീദ്, യാക്കൂബ് ഷെയ്ഖ് തുടങ്ങിയ പ്രധാന പാകിസ്താനി നേതാക്കൾ അനുശോചനം രേഖപ്പെടുത്തി. ഞായറാഴ്ച രാത്രി ലാഹോറിലെ ചുബുർജിയിലുള്ള ജമാഅത്ത് ഉദ്ധവയുടെ ആസ്ഥാനമായ ജാമിയ അൽ-ഖാദ്സിയയിലാണ് ഇയാളുടെ മൃതദേഹം സംസ്കരിക്കുന്നതിനുള്ള ചടങ്ങുകൾ നടന്നത്.
