പച്ചക്കുപ്പായത്തിന് പകരം പ്രത്യേക പിങ്ക് നിറത്തിലുള്ള ജഴ്സിയണിഞ്ഞ് മൈതാനത്തിറങ്ങാനൊരുങ്ങി പാകിസ്താൻ ക്രിക്കറ്റ് ടീം. ഇംഗ്ലണ്ടിനെതിരായ ട്രൈ-സീരീസ് നാലാം ഏകദിന പോരാട്ടത്തിലാണ് പാക് പട പിങ്ക് ജഴ്സിയിൽ അണിനിരക്കുക. ഒക്ടോബർ 25-ന് ലാഹോറിലെ ഗദ്ദാഫി സ്റ്റേഡിയത്തിൽ നടക്കുന്ന മത്സരത്തിലാണ് ഈ വേറിട്ട കാഴ്ചയ്ക്ക് ക്രിക്കറ്റ് ലോകം സാക്ഷ്യം വഹിക്കുക. സ്തനാർബുദ ബോധവൽക്കരണത്തിന്റെ ഭാഗമായുള്ള ആഗോള ‘പിങ്ക്‌ടോബർ’ (Pinktober) പ്രചാരണത്തെ പിന്തുണച്ചാണ് പാകിസ്താൻ ക്രിക്കറ്റ് ബോർഡ് (പി.സി.ബി) ഇത്തരമൊരു തീരുമാനം കൈക്കൊണ്ടത്.
ശ്രീലങ്ക കൂടി ഉൾപ്പെടുന്ന ത്രിരാഷ്ട്ര ഏകദിന പരമ്പരയിലെ ഈ നിർണായക മത്സരത്തിൽ സ്റ്റേഡിയവും പിങ്ക് മയമാക്കാനാണ് സംഘാടകർ പദ്ധതിയിട്ടിരിക്കുന്നത്. പാകിസ്താൻ കളിക്കാർക്ക് പുറമെ, ഇംഗ്ലണ്ട് താരങ്ങളോടും മാച്ച് റഫറിമാരോടും കമന്റേറ്റർമാരോടും ബോധവൽക്കരണത്തിന്റെ ഭാഗമായി പിങ്ക് റിബണുകൾ അണിയാൻ അഭ്യർത്ഥിച്ചിട്ടുണ്ട്. മത്സരത്തിന് ഉപയോഗിക്കുന്ന വിക്കറ്റ് സ്റ്റമ്പുകൾ പിങ്ക് നിറത്തിലുള്ള ബ്രാൻഡിംഗോടെ ആയിരിക്കും. ഇതിനുപുറമെ, സ്റ്റേഡിയത്തിലെ വൻ സ്ക്രീനുകളിലും എൽ.ഇ.ഡി പെരിമീറ്റർ ബോർഡുകളിലും ബോധവൽക്കരണ സന്ദേശങ്ങൾ പ്രദർശിപ്പിക്കും.
മത്സരം നടക്കുന്ന ദിവസം സ്റ്റേഡിയത്തിലേക്ക് ആരാധകർ എത്തുന്നതിന് രണ്ട് മണിക്കൂർ മുമ്പ് തന്നെ പ്രത്യേക പിങ്ക് റിബൺ പരിപാടികൾ ആരംഭിക്കും. പാക് ക്രിക്കറ്റ് താരങ്ങളെ ഉൾപ്പെടുത്തി പ്രത്യേകമായി നിർമ്മിച്ച വീഡിയോകളിലൂടെ സ്തനാർബുദം മുൻകൂട്ടി തിരിച്ചറിയേണ്ടതിന്റെ പ്രാധാന്യത്തെക്കുറിച്ച് ഡിജിറ്റൽ മാധ്യമങ്ങളിലൂടെയും പ്രചാരണം നടത്തും. കൂടാതെ, ആരാധകർക്കായി പിങ്ക് തീമിലുള്ള വസ്ത്രങ്ങളും യാത്രാ പോളോ ഷർട്ടുകളും പി.സി.ബിയുടെ ഔദ്യോഗിക ഓൺലൈൻ-ഓഫ്‌ലൈൻ റീട്ടെയിൽ സ്റ്റോറുകൾ വഴി ലഭ്യമാക്കുമെന്നും ബോർഡ് അറിയിച്ചു.
