വൻ കടക്കെണിയിലും സാമ്പത്തിക പ്രതിസന്ധിയിലും ഉഴലുന്നതിനിടയിലും രാജ്യത്തിന് അന്താരാഷ്ട്ര തലത്തിൽ നിർണായക പദവി. ഐക്യരാഷ്ട്രസഭയുടെ പിന്തുണയോടെ പ്രവർത്തിക്കുന്ന ‘ബോറോവേഴ്സ് പ്ലാറ്റ്‌ഫോം’ (Borrowers’ Platform) ഗവേണിങ് കൗൺസിലിന്റെ അധ്യക്ഷസ്ഥാനം പാകിസ്താൻ ഏറ്റെടുത്തു. തായ്‌ലൻഡിലെ ബാങ്കോക്കിൽ നടന്ന ലോകബാങ്ക്-ഐ.എം.എഫ് വാർഷിക യോഗത്തിനിടയിൽ പാകിസ്താൻ ധനകാര്യ മന്ത്രി മുഹമ്മദ് ഔറംഗസീബാണ് ഈ പദവി ഔദ്യോഗികമായി സ്വീകരിച്ചത്. 13,800 കോടിയിലധികം ഡോളറിന്റെ വിദേശ കടമുള്ള ഒരു രാജ്യം തന്നെ വായ്പ വാങ്ങുന്ന രാജ്യങ്ങളുടെ ആഗോള കൂട്ടായ്മയുടെ തലപ്പത്തേക്ക് എത്തിയത് അന്താരാഷ്ട്ര തലത്തിൽ വലിയ ചർച്ചയായിട്ടുണ്ട്.
കടക്കെണിയിൽ അകപ്പെടുന്ന വികസ്വര രാജ്യങ്ങൾക്ക് തങ്ങളുടെ ശബ്ദം ഉയർത്താനും കൂട്ടായി പ്രവർത്തിക്കാനുമായി യു.എൻ കോൺഫറൻസ് ഓൺ ട്രേഡ് ആൻഡ് ഡെവലപ്‌മെന്റിന്റെ (UNCTAD) നേതൃത്വത്തിൽ രൂപീകരിച്ചതാണ് ഈ വേദി. പാരീസ് ക്ലബ്ബ് പോലുള്ള വായ്പ നൽകുന്നവരുടെ (Creditors) ശക്തമായ സംഘടനകൾ വർഷങ്ങളായി നിലവിലുണ്ടെങ്കിലും, വായ്പയെടുക്കുന്ന രാജ്യങ്ങൾക്ക് (Borrowers) ഇത്തരത്തിലൊരു സ്ഥിരമായ കൂട്ടായ്മ ഇതുവരെ ഉണ്ടായിരുന്നില്ല. ഈ അന്തരം നികത്താനാണ് മുപ്പതിലധികം വികസ്വര രാജ്യങ്ങൾ ഉൾപ്പെടുന്ന ഈ പ്ലാറ്റ്‌ഫോം രൂപീകരിച്ചത്.
പതിറ്റാടുകളായി ഐ.എം.എഫിന്റെ കടുത്ത ഉപാധികളോടെയുള്ള രക്ഷാപാക്കേജുകളും (Bailouts) ഘടനാപരമായ സാമ്പത്തിക പരിഷ്കരണങ്ങളും നടപ്പിലാക്കി പരിചയമുള്ള രാജ്യമാണ് പാകിസ്താൻ. അതിനാൽ തന്നെ കടുത്ത സാമ്പത്തിക പ്രതിസന്ധികളെയും ഉയർന്ന പലിശ നിരക്കുകളെയും എങ്ങനെ നേരിടണം എന്നതിൽ പാകിസ്താന് സ്വന്തം അനുഭവസമ്പത്ത് പങ്കുവെക്കാൻ കഴിയുമെന്നാണ് വിലയിരുത്തപ്പെടുന്നത്. 2026-27 കാലയളവിലേക്കുള്ള പ്ലാറ്റ്‌ഫോമിന്റെ കർമ്മപദ്ധതികൾക്ക് രൂപം നൽകുന്നതിലും കടം ഒരു സാമ്പത്തിക കുരുക്കായി മാറാതെ രാജ്യങ്ങളുടെ വളർച്ചയ്ക്കുള്ള ഉപകരണമാക്കി മാറ്റുന്നതിനുള്ള നയങ്ങൾ രൂപീകരിക്കുന്നതിലും പാകിസ്താൻ നേതൃത്വം നൽകും.
എന്നാൽ ഈ പദവി ലഭിച്ചതുകൊണ്ട് പാകിസ്താന്റെ സ്വന്തം കോടിക്കണക്കിന് ഡോളറിന്റെ കടബാധ്യതകൾക്ക് യാതൊരുവിധ ഇളവുകളും ലഭിക്കില്ലെന്ന് ധനകാര്യ മന്ത്രി മുഹമ്മദ് ഔറംഗസീബ് വ്യക്തമാക്കിയിട്ടുണ്ട്. ഇതൊരു കൂട്ടായ വിലപേശൽ ബ്ലോക്കോ (Collective bargaining bloc) പെട്ടെന്ന് കടം ഒഴിവാക്കാനുള്ള പദ്ധതിയോ അല്ല, മറിച്ച് വികസ്വര രാജ്യങ്ങൾ തമ്മിലുള്ള സാങ്കേതിക സഹകരണവും അറിവുകൾ പങ്കുവെക്കലും മാത്രമാണ് ലക്ഷ്യമിടുന്നത്. ലോകബാങ്കും ഐ.എം.എഫും പോലുള്ള ബഹുമുഖ ധനകാര്യ സ്ഥാപനങ്ങളിൽ നിന്നും ചൈന ഉൾപ്പെടെയുള്ള ഉഭയകക്ഷി രാജ്യങ്ങളിൽ നിന്നും വായ്പയെടുത്ത് മുന്നോട്ടുപോകുന്ന പാകിസ്താന് ഈ പുതിയ പദവി നയപരമായ ദൃശ്യപരത (Diplomatic visibility) നൽകുമെങ്കിലും, രാജ്യത്തെ ഗുരുതരമായ സാമ്പത്തിക പ്രതിസന്ധിക്ക് ഇത് പെട്ടെന്നുള്ള പരിഹാരമാകില്ലെന്നാണ് സാമ്പത്തിക വിദഗ്ധരുടെ വിലയിരുത്തൽ.
