ആപ്പിളും സാംസങ്ങും അടക്കമുള്ള ആഗോള പ്രീമിയം സ്മാർട്ട്ഫോൺ ഭീമന്മാർക്ക് വെല്ലുവിളിയുയർത്തിക്കൊണ്ട് പൂർണ്ണമായും ഇന്ത്യയിൽ രൂപകൽപ്പന ചെയ്ത് നിർമ്മിക്കുന്ന ഇന്ത്യൻ ബ്രാൻഡ് സ്മാർട്ട്ഫോൺ വൈകാതെ വിപണിയിലെത്തും. എൻ.ഡി.ടി.വി വേൾഡ് സമ്മിറ്റിൽ സംസാരിക്കവെ കേന്ദ്ര ഐ.ടി മന്ത്രി അശ്വിനി വൈഷ്ണവാണ് ഈ നിർണായക പ്രഖ്യാപനം നടത്തിയത്. 2028 ഒക്ടോബർ 23-ഓടെ സ്വന്തമായി ബൗദ്ധിക സ്വത്തവകാശവും (IP) ഡിസൈനും നിർമ്മാണ മികവുമുള്ള ഇന്ത്യൻ മൊബൈൽ ഫോൺ യാഥാർത്ഥ്യമാകുമെന്ന് അദ്ദേഹം വ്യക്തമാക്കി. ഈ തീയതി കുറിച്ചുവെച്ചോളൂ എന്ന് കാണികളോട് പറഞ്ഞ മന്ത്രി, രണ്ട് വർഷത്തെ കൃത്യമായ സമയപരിധിക്കുള്ളിൽ പദ്ധതി പൂർത്തിയാകുമെന്ന ഉറപ്പും നൽകി.
ഒരു ഫോൺ വികസിപ്പിക്കുന്നത് കേവലം ഭാഗങ്ങൾ കൂട്ടിച്ചേർക്കുന്നത് മാത്രമല്ലെന്നും കൃത്യമായ ടെക്നോളജിയും ഹാർഡ്‌വെയറും സോഫ്റ്റ്‌വെയറും സമഗ്രമായി സംയോജിപ്പിക്കുന്ന പ്രക്രിയയാണെന്നും മന്ത്രി വിശദീകരിച്ചു. ഇതിനായുള്ള പ്രാഥമിക തയ്യാറെടുപ്പുകൾ വർഷങ്ങൾക്ക് മുൻപേ ആരംഭിച്ചിരുന്നതായും ഒരു പ്രമുഖ അമേരിക്കൻ ടെലികോം സേവന ദാതാവിനായി 5G ഫോണുകൾ ഡിസൈൻ ചെയ്ത് നൽകാൻ ഇന്ത്യൻ കമ്പനിക്ക് സാധിച്ചിട്ടുണ്ടെന്നും അദ്ദേഹം ചൂണ്ടിക്കാട്ടി. രാജ്യത്ത് സ്മാർട്ട്ഫോൺ മദർബോർഡ് ഡിസൈൻ ചെയ്യാനുള്ള ശേഷി നിലവിൽ കൈവരിച്ചിട്ടുണ്ട്.
2014-ൽ ആരംഭിച്ച ‘മേയ്ക്ക് ഇൻ ഇന്ത്യ’ പദ്ധതിയിലൂടെ ഇലക്ട്രോണിക്സ് ഉൽപ്പാദനത്തിൽ ഇന്ത്യ വലിയ പുരോഗതി കൈവരിച്ചിട്ടുണ്ടെന്നും നിലവിൽ ഇന്ത്യയുടെ മൂന്നാമത്തെ ഏറ്റവും വലിയ കയറ്റുമതി മേഖലയായി ഇലക്ട്രോണിക്സ് മാറിയെന്നും വൈഷ്ണവ് കൂട്ടിച്ചേർത്തു. വൈകാതെ ഇത് രണ്ടാമത്തെ വലിയ കയറ്റുമതി മേഖലയായി മാറും. പ്രീമിയം ഫോണുകൾക്ക് ഇന്ത്യയിൽ വൻ ഡിമാൻഡുള്ള സാഹചര്യത്തിൽ, ഇന്ത്യയുടെ സ്വന്തം ഫോൺ ആഗോളതലത്തിൽ വൻ വിജയമായി മാറുമെന്നാണ് ഐ.ടി മന്ത്രാലയത്തിന്റെ പ്രതീക്ഷ.
