വിമാന ഇന്ധനമായ ഏവിയേഷൻ ടർബൈൻ ഫ്യൂവ.ലിന്റെ മൂല്യവർദ്ധിത നികുതിയായ വാറ്റ് (VAT) വെട്ടിക്കുറച്ച തമിഴ്നാട് സർക്കാരിന്റെ നിർണ്ണായക തീരുമാനത്തിന് കേന്ദ്ര സർക്കാരിന്റെ അപൂർവ്വ അഭിനന്ദനം. സംസ്ഥാനത്തെ വ്യോമയാന മേഖലയ്ക്കും വിമാന കമ്പനികൾക്കും വലിയ ആശ്വാസം നൽകുന്നതാണ് മുഖ്യമന്ത്രി സി. ജോസഫ് വിജയ് നേതൃത്വം നൽകുന്ന സർക്കാരിന്റെ ഈ നടപടി. ചെന്നൈയിൽ വാറ്റ് നികുതി 29 ശതമാനത്തിൽ നിന്ന് 16 ശതമാനമായാണ് കുറച്ചത്. മറ്റ് വിമാനത്താവളങ്ങളിൽ ഇത് ഒരു ശതമാനമാക്കി മാറ്റുകയും ചെയ്തിട്ടുണ്ട്.
തമിഴ്നാട് സർക്കാരിന്റെ ഈ നീക്കം അഭിനന്ദനാർഹമാണെന്ന് കേന്ദ്ര വ്യോമയാന മന്ത്രി റാം മോഹൻ നായിഡു വ്യക്തമാക്കി. സാധാരണക്കാർക്ക് വിമാന യാത്ര കൂടുതൽ വേഗത്തിലും എളുപ്പത്തിലും ലഭ്യമാക്കാൻ കേന്ദ്രവും സംസ്ഥാനങ്ങളും ഒരുമിച്ച് പ്രവർത്തിക്കണമെന്ന് അദ്ദേഹം ആവശ്യപ്പെട്ടു. രാജ്യത്തെ യാത്രക്കാരുടെ താല്പര്യങ്ങൾ സംരക്ഷിക്കുക എന്നതാണ് സർക്കാരുകളുടെ പ്രധാന ലക്ഷ്യമെന്നും മുഖ്യമന്ത്രി വിജയ്‌ക്ക് അദ്ദേഹം നന്ദി അറിയിക്കുകയും ചെയ്തു. ഈ പുതിയ ഇളവുകൾ ഒക്ടോബർ 31-ന്റെ അർദ്ധരാത്രി മുതൽ നിലവിൽ വരുമെന്ന് ഔദ്യോഗിക ഗസറ്റ് വിജ്ഞാപനത്തിൽ പറയുന്നു.
ഉയർന്ന ഇന്ധന വിലയും പ്രവർത്തനച്ചെലവും മൂലം പ്രതിസന്ധിയിലായിരുന്ന വ്യോമയാന മേഖലയ്ക്ക് ഈ നികുതിക്കുറവ് വലിയൊരു ആശ്വാസമാകും. കുറഞ്ഞ ചെലവിൽ കൂടുതൽ സർവീസുകൾ നടത്താനും പുതിയ റൂട്ടുകൾ ആരംഭിക്കാനും ഈ തീരുമാനം വിമാന കമ്പനികളെ സഹായിക്കുമെന്നാണ് വിലയിരുത്തപ്പെടുന്നത്. വരും ദിവസങ്ങളിൽ ഈ ഇളവുകളുടെ പ്രയോജനം വിമാന യാത്രികർക്കും ലഭിക്കുമെന്നാണ് പ്രതീക്ഷിക്കുന്നത്.
